މޮރިޝަސް އަށް ފޮނުވި ސިޓީ ނުލިބުނު، ބުނީ ހިއްސާ ކުރެވޭނީ 241 ކޮމެޓީއާ ކަމަށް: އާޒިމް

ރާއްޖެ އާއި މޮރިޝަސްއާ ދެމެދު ކަނޑުގެ ސަރަހައްދުން ފުށު އަރާ ސަރަހައްދުގެ އިން ވަކިކުރުމުގެ މައްސަލަ ބަލަމުންދަނިކޮށް، ރައީސް އިބްރާހިމް މުހައްމަދު ސޯލިހު މޮރިޝަސްގެ ބޮޑުވަޒީރަށް ފޮނުއްވި ސިޓީފުޅު ހޯދުމަށް މަޖިލީހުގައި ހިމެނޭ އިދިކޮޅު މެމްބަރުން ރައީސް އޮފީހަށް ވަޑައިގަތަސް އެ ސިޓީ ނުލިބުނު ކަމަށް، މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެ އެވެ.

ރައީސް ސިޓީފުޅެއް ފޮނުއްވީ، ޗާގޯސް އާއި ރާއްޖޭގެ ދެކުނުގެ ސަރަހައްދެއް ފުށުއަރާ ކަމަށް ބުނެ މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށަހެޅި މައްސަލައިގެ އަޑުއެހުންތައް ކުރިއަށް ދަނިކޮށެވެ. އެއީ އދ. ގައި ދެން ނަގާ ވޯޓެއްގައި ޗާގޯސްގެ މައްޗަށް މޮރިޝަސްގެ ސިޔާދަތީ ބާރު ހިނގާ ކަމަށް ރާއްޖޭން ތާއީދުކުރާނެ ކަމަށް ވިދާޅުވެ ކުރީގެ ސްޓޭންޑް ބަދަލުކޮށް މޮރިޝަސްގެ ބޮޑުވަޒީރަށް ފޮނުއްވި ސިޓީފުޅެކެވެ.

އިމުގެ މައްސަލަ ނިންމީ އެ ސިޓީ އަށް ރިއާއަތްކޮށްގެން ކަމަށާއި އެހެންވެ ރާއްޖޭގެ ކަނޑުގެ ސަރަހައްދުން ބޮޑު ބައެއް ގެއްލިފައިވާ ކަމަށް އިދިކޮޅު ފަރާތްތަކުން ދަނީ ތުހުމަތުކުރަމުންނެވެ. އަދި އެ ސިޓީ މަޖިލީހާ ވެސް ހިއްސާނުކުރާ ކަމަށާއި، އެ ސިޓީ ހާމަކުރުމަށް ވެސް އިދިކޮޅުން ދަނީ ގޮވާލަމުންނެވެ.

ރައީސް ފޮނުއްވި ކަމަށް ބުނާ ސިޓީ ހޯދުމަށް މަޖިލީހުގައި ހިމެނޭ އިދިކޮޅު ބައެއް މެމްބަރުން ވަނީ މިއަދު ރައީސް އޮފީހަށް ވަޑައިގެންފަ އެވެ. އޭތެރޭގައި ޕީޕީއެމް ޕީއެންސީގެ މެމްބަރުންނާއި، ދަ ޑިމޮކްރަޓްސްގެ މެމްބަރުންގެ އިތުރުން އެމްއެންޕީގެ މެމްބަރުން ވެސް ހިމެނެ އެވެ.

ރައީސް އޮފީހުން ނިކުމެވަޑައިގަތުމަށް ފަހު ނޫސްވެރިންނާ ވާހަކަ ދައްކަވަމުން އާޒިމް ވިދާޅުވީ ސިޓީ ހިއްސާ ކުރެވޭނީ މަޖިލީހުގެ 241 ކޮމެޓީއާ ކަމަށް ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވި ކަމަށެވެ.

އެ މައްސަލާގައި އިދިކޮޅު ފަރާތްތަކުން ކަންބޮޑުވުން ފާޅު ކުރާތާ އަށް މަސް ވެފައިވާ ކަމަށާއި ނަމަވެސް އެއްވެސް ކުރިއެރުމެއް ލިބިފައި ނުވާ ކަމަށް އާޒިމް ވިދާޅުވި އެވެ.

"އަޅުގަނޑުމެންނަށް ހަމަ އެންމެ ފުރަތަމަ އެންގުން ދުވަހުން ފެށިގެން ވެސް މަސައްކަތް ކުރަމުން މި ދަނީ އެ މައްސަލާގައި. އަޅުގަނޑުމެން މަސައްކަތް ނުކުރީކީ ނޫން. އެހެން ނަމަވެސް ސަރުކާރު ތަންކޮޅެއް ހުދުމުހުތާރުކޮށް މި ދަނީ. ހުރިހާ ބާރުތަކެއް މުށުތެރެއަށް ލައިގެން ކަންކަން ކުރައްވަނީ."

ޕީޕީއެމްގެ ނައިބު ރައީސް ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވީ ސިޓީ ހޯދަން ދިޔައީ ބޮޑު ދައުލަތެއްގައި ސިޓީގެ ކޮޕީއެއް އޮންނާނެ ކަމަށް ބަލައިގެން ކަމަށެވެ.

"ރާއްޖޭގެ ރައްޔިތުން ބޭނުންވޭ އެ ސިޓީ ހޯދަން. ރާއްޖޭގެ ރައްޔިތުން ބޭނުންވޭ ރާއްޖޭގެ ރައީސް ކީއްތޯ މި ކުރެއްވީ، ސިޓީއެއް ނޭނގި ކީއްވެތޯ މި ފޮނުވީ،" ޝިޔާމް ވިދާޅުވި އެވެ.

ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައެއް ހުށަހަޅަން އެމްޑީޕީގެ ޕާލަމެންޓްރީ ގުރޫޕުން ފާސްކުރުމަށް ފަހު އިއްޔެ ބޭއްވި ނޫސްވެރިންގެ ބައްދަލުވުމުގައި ސަލާމަތީ ހިދުމަތްތަކާ ބެހޭ (241) ކޮމިޓީގެ މުގައްރިރު އަދި ހިތަދޫ ދާއިރާގެ މެމްބަރު މުހައްމަދު އަސްލަމް ވިދާޅުވެފައި ވަނީ ރައީސް މޮރިޝަސްގެ ބޮޑުވަޒީރަށް ފޮނުއްވި ސިޓީފުޅު ކޮމިޓީން ހޯދާނެ ކަމަށެވެ.