ގްލޯނެޓުން ޔުނިވާސިޓީ ރަޖިސްޓްރޭޝަން ޑޭއެއް ބާއްވަނީ

މި އަހަރުގެ ސެޕްޓެމްބަރު މަހު އިންޓޭކަށް ރާއްޖެއިން ބޭރަށް ކިޔަވަންދާ ދަރިވަރުންނަށް އަމާޒުކޮށްގެން ރަޖިސްޓްރޭޝަނުގެ ކަންތައްތަކުގައި އެހީތެރިކަން ފޯރުކޮށްދޭން ގްލޯނެޓުން "ޔުނިވާސިޓީ ރަޖިސްޓްރޭޝަން ޑޭ" އިންވެންޓެއް ބުރާސްފަތިދުވަހު ބާއްވާނެ އެވެ.

މި އިވެންޓް އޮންނާނީ ބުރާސްފަތިދުވަހާއި ހުކުރުދުވަހުގެ ހަވީރު 5 އިން ރޭގަނޑު 9 އަށް މީރުމާ ހޯލުގަ އެވެ.

މިއީ ބޭރުގެ ޔުނިވަސިޓީތަކަށް ވަންނަން ބޭނުންވާ ދަރިވަރުންނަށް ކޯސްތަކާއި ޔުނިވާސިޓީގެ މައުލޫމާތައް ދީ ދަރިވަރުންނަށް ރަޖިސްޓްރޭޝަނުގެ މަސައްކަތްތަކުގައި އެހީތެރިކަން ފޯރުކޮށްދޭން ކުރިއަށް ގެންދާ އިވެންޓެކެވެ. ކެރިއާ ގައިޑެންސާއި ކިޔަވަންދާ ދަރިވަރުންނަށް އެކޮމަޑޭޝަނާއި ވިސާގެ ކަންތައްތައް ހަމަޖެއްސުމަށް ބޭނުންވާ މައުލޫމާތާއި ޕްލޭސްމަންޓް ލެޓާ ހަމަޖެއްސުން ފަދަ ހިދުމަތްތަކުގެ މައުލޫމާތު މި އިވެންޓުގައި ލިބޭނެ އެވެ.

ޖޫން ޖުލައި އިންޓޭކުގައި ރަޖިސްޓްރީ ކޮށްފައިވާ ދަރިވަރުންގެ ވިސާ އާއި ޑިޕާޗާ އަޕްޑޭޓުތައް ވެސް މި އިވެންޓުން ހޯދޭނެ އެވެ.

ވޭތުވެދިޔަ ފަސް އަހަރުގައި އެންމެ ގިނަ ދިވެހި ދަރިވަރުން ކިޔަވަން ދިޔަ މެލޭޝިއާގެ ޔުނިވާސިޓީތަކުން ވެސް މި އިވެންޓުގައި ބައިވެރިވާނެ އެވެ. މިދިޔަ ފަސް އަހަރުގެ ތެރޭގައި ރާއްޖެއިން ކިޔަވަން ދިޔަ ކުދިންގެ ޔުނިވާސިޓީ ތަޖުރިބާ އާއި ޔުނިވާސިޓީ ފެސިލިޓީއަށާއި ރޭންކިންއަށް ބެލުމަށް ފަހު ގްލޯނެޓަށް އެންމެ ރަނގަޅު ޔުނިވާސިޓީތައް ގޮތުގައި ފާހަގަކުރެވޭ ޔުނިވާސިޓީތަކުން މި އިވެންޓުގައި ވަނީ ބައިވެރިކޮށްފަ އެވެ.

އޭގެ އިތުރުން ގިނަ އަދަދެއްގެ ދިވެހި ދަރިވަރުން ފާއިތުވި ފަސް އަހަރު ދިޔަ ފިލިޕީންސް ފްލައިން ސްކޫލް ވެސް އެ އިވެންޓުގައި ބައިވެރިވާނެ އެވެ.

އިވެންޓުގައި ބައިވެރިވާ ޔުނިވާސިޓީތައް

1. މޮނާޝް ޔުނިވާސިޓީ

2. ޓޭލާސް ޔުނިވާސިޓީ

3. ސަންވޭ ޔުނިވާސިޓީ

4. ހެރިއޮޓް ވަޓް ޔުނިވާސިޓީ

5. އޭޝިއާ ޕެސިފިކް ޔުނިވާސިޓީ

6. މަނިޕާލް ޔުނިވާސިޓީ ކޮލެޖު

7. އިންޓަނޭޝަނަލް މެޑިކަލް ޔުނިވާސިޓީ

8. އެއާ ވޯކްސް އޭވިއޭޝަން އެކެޑެމީ

މި އިވެންޓުގައި ދަރިވަރުންނަށް އެކި ދާއިރާތަކުން ޔުނިވާސިޓީތަކުގައި ހުރި ފުރުސަތުތަކުގެ މައުލޫމާތުތައް ލިބޭނެ އެވެ. އަދި ފައުންޑޭޝަން، ޑިގްރީ، ޑިޕްލޮމާ އަދި މާސްޓާސް ފެންވަރުގެ ޖުމްލަ 287 ކޯހެއްގެ މައުލޫމާތު ލިބެން ހުންނާނެ އެވެ.

އެކި ދާއިރާތަކަށް ހާއްސަ ގިނަ ޔުނިވާސިޓީތަކަކުން ބައިވެރިވާއިރު، މެޑިސިނަށް ހާއްސަ އިންޓަނޭޝަނަލް މެޑިކަލް ޔުނިވާސިޓީން އެ ތަނުގައި ހުރި ޕްރޮގުރާމްގެ މައުލޫމާތުތައް ދޭނެ އެވެ. އެ ޔުނިވާސިޓީ އަކީ އެމްބީބީއެސްގެ ޓްރާންސްފާ އޮޕްޝަނުގައި ކިޔެވޭނެ ފުރުސަތު ދޭ ޔުނިވާސިޓީއެކެވެ. އެ ފުރުސަތުގައި މެލޭޝިއާގައި ތިން އަހަރު ފުރިހަމަ ކުރުމަށް ފަހު ބާކީ ދެ އަހަރު ޔޫރަޕް، އޮސްޓްރޭލިއާ ނުވަތަ ކެނެޑާގެ ޔުނިވަސިޓީއަކުން ކޯސް ފުރިހަމަކުރުމުގެ ފުރުސަތު ދެ އެވެ.

އެ އިވެންޓުގައި ބައިވެރިވާ މޮނާޝް ޔުނިވާސިޓީއަކީ އިންޖިނިއަރިން، ހެލްތު ސައިންސް އަދި ސޯޝަލް ސައިންސަށް ހާއްސަ ޔުނިވާސިޓީއަކަށް ވާއިރު، އޭޝިއާ ޕެސިފިކް ޔުނިވާސިޓީ އަކީ ކޮމްޕިއުޓިންގެ ދާއިރާތަކަށް ހާއްސަ ޔުނިވާސިޓީއެކެވެ.

ޔުނިވާސިޓީ ރަޖިސްޓްރޭޝަން ޑޭ އިވެންޓުގައި އެމްބީބީއެސް، އެމްބީބީއެސް ޓްރާންސްފާ ޕްރޮގުރާމް، ޑެންޓިސްޓްރީ، ނާސިން، މެޑިކަލް ބަޔޯ ސައިންސް، ބަޔޯ މެޑިކަލް ސައިންސް ފަދަ ޕްރޮގުރާމުތަކުގެ މައުލޫމާތާއި ކިޔެވުމަށް ހުރި އެކި ފުރުސަތުތަކުގެ މައުލޫމާތު ލިބޭނެ އެވެ.

އެ އިވެންޓުގައި ސޯޝަލް ސައިންސް، ކޮމިއުނިކޭޝަން އެންޑް މީޑިއާ ސްޓަޑީޒް، އިންޓަނޭޝަނަލް ބިޒްނަސް ފަދަ ދާއިރާތަކުގެ ކޯސްތަކާއި ސިވިލް އިންޖިނިއަރިން، މެކޭނިކަލް އިންޖިނިއަރިން އަދި ޕްރޮޖެކްޓު މެނޭޖްމަންޓް ކޯސްތަކުގެ މައުލޫމާތު ލިބޭނެ އެވެ. އޭގެ އިތުރުން ސައިކޮލޮޖީ އާއި ކައުންސެލިން އާއި އެއާ ގުޅުން ހުރި އެކި ދާއިރާތަކުގެ ކޯސްތަކާއި ބިޒްނަސްގެ ދާއިރާއިން ޑިމާންޑު އޮންނަ މާކެޓިން، ހިއުމަން ރިސޯސަސް އަދި ފައިނޭންސިންއާ ގުޅުން ހުރި އެކި ކޯސްތަކުގެ މައުލޫމާތުތައް ވެސް ލިބެން ހުންނާނެ އެވެ.

އިންޓަނޭޝަނަލް ރިލޭޝަންސް އާއި ޕޮލިޓިކަލް ސައިންސްގެ އިތުރުން ލޯ އާއި ޝަރުއީ ދާއިރާގެ އެކި ކޯސްތަކުގެ މައުލޫމާތުތައް އެ އިވެންޓުން ލިބޭނެ އެވެ. އަދި ޑިޖިޓަލް މީޑިއާ ގުޅުން ހުރި ކޯސްތަކާއި ކްރިއޭޓިވް ދާއިރާގެ ކޯސްތަކާއި ޓްރެވަލް އެންޑް ޓޫރިޒަމް އާއި އާކިޓެކްޗަރަލް ދާއިރާގެ އެކި ކޯސްތަކުގެ މައުލޫމާތުތައް ލިބޭނެ އެވެ.

ގްލޯނެޓުން މި އިވެންޓް ބޭއްވުމުގެ ބޭނުމަކީ ބޭރުގެ ޔުނިވާސިޓީތަކުން ދަރިވަރުންނާ ބެލެނިވެރިންނަށް ބޭނުންވާނެ ހުރިހާ މައުލޫމާތެއް އެއް ތަނަކުން ފުރިހަމައަށް ހޯދޭނެ މަގު ތަނަވަސްކޮށްދިނުމެވެ. މި އިވެންޓުގައި ރަނގަޅު ނަތީޖާ ހޯދާފައިވާ ދަރިވަރުންގެ ތެރެއިން 10 ޕަސެންޓާއި 50 ޕަސެންޓާ ދެމެދުގެ ދަރިވަރުންނަށް ސްކޮލާޝިޕް ލިބޭނެ އެވެ.

މިއީ ގްލޯނެޓުން މި އަހަރު ބާއްވާ ހަތަރު ވަނަ އިވެންޓެވެ.

ނޯޓު: މިއީ ގްލޯނެޓުގެ އެޑްވަޓޯރިއަލްއެކެވެ.