ފައިނަލް ޔަގީނެއް ނޫން: ޒިދާން

މެޑްރިޑް (މެއި 10) - ފުރަތަމަ ލެގުގައި އެތުލެޓިކޯ މެޑްރިޑް އަތުން 3-0 އިން މޮޅުވެފައި އޮތް ނަމަވެސް އަދި ފައިނަލް ޔަގީންނުވާ ކަމަށާއި 90 މިނިޓަކީ މެޗެއްގެ ނަތީޖާ ބަދަލުކުރަން ގިނަ ވަގުތު ކަމަށް ރެއާލް މެޑްރިޑްގެ ކޯޗު ޒިނެދިން ޒިދާން ބުނެފި އެވެ.

މުބާރާތުގެ ފައިނަލުން 2014 ވަނަ އަހަރާއި މިދިޔަ އަހަރު އެތުލެޓިކޯ ބަލިކޮށް ޗެމްޕިއަންކަން ހޯދި ރެއާލް މެޑްރިޑުން މިރޭގެ މެޗަށް ނުކުންނައިރު ސަމާލުވާން ޖެހޭ ކަމަށް ޒިދާން ވަނީ ބުނެފަ އެވެ.

"މިއީ އެއް ސަރަހައްދެއް. ދެ ޓީމުގެ ސަޕޯޓަރުން ވެސް ތިބޭނެ. ވިސްނަން ޖެހޭ އަނެއް ކަމަކީ އަދި ރެއާލަށް ފައިނަލުގެ ޖާގައެއް ޔަގީންނުވޭ. އެތުލެޓިކޯ ދަނޑުގައި 90 މިނިޓް ކުޅެން ޖެހޭއިރު މިއީ ދިގު ވަގުތެއް،" ޒިދާން ބުންޏެވެ.

އެތުލެޓިކޯ ކޮޅަށް ފުރަތަމަ ލެގުގައި ރެއާލްގެ ތިން ލަނޑު ޖަހައި ކްރިސްޓިއާނޯ ރޮނާލްޑޯ ވަނީ ހެޓްރިކެއް ހަދައިފަ އެވެ. މިރޭގެ މެޗަށް ތައްޔާރުވުމަށް ރެއާލުން ވަނީ އެންމެ ފަހުން ލީގުގައި ކުޅުނު މެޗުގައި ރޮނާލްޑޯ އަށް އަރާމްކުރަން ފުރުސަތު ދީފަ އެވެ.

ރެއާލްގެ ކެޕްޓަން ސާޖިއޯ ރާމޮސް ބުނީ އެ ޓީމުގައި ތިބި ކުޅުންތެރިންނަކީ ޕްރެޝަރުގައި ކުޅެން ދަންނަ ކުޅުންތެރިން ކަމަށާއި އެތުލެޓިކޯ ދަނޑުގައި ކުޅެން ޖެހުނު ނަމަވެސް މާ ބޮޑު ހާސްކަމެއް ކުރިމަތިވާނެ ކަމަށް ނުދެކޭ ކަމަށެވެ.

އެތުލެޓިކޯގެ ކޯޗު ޑިއޭގޯ ސިމިއޯނީ ބުނީ މި ހާލަތަށް ބަލާއިރު ރެއާލަކީ ދުނިޔޭގެ އެއް ވަނަ ޓީމު ކަމަށެވެ.

"އަހަރެން ކުޅުންތެރިންނަށް ވިސްނައިދީފިން މި ވަގުތަށް ބަލާއިރު ދުނިޔޭގެ އެންމެ ވަރުގަދަ ޓީމަކީ ރެއާލް ކަމަށް. އެ ޓީމަކީ ކޮންމެ މެޗެއްގައި ވެސް ލަނޑު ޖަހާ ޓީމެއްކަން. އެކަމަކު އަހަރެމެންގެ އަޒުމަކީ އަމިއްލަ ދަނޑުގައި ނަތީޖާ ނެރެން ކުރަން ޖެހޭ އެއްވެސް ކަމެއްގައި ފަސް ނުޖެހުން،" ސިމިއޯނީ ބުންޏެވެ.

އަނިޔާގެ ސަބަބުން ރެއާލްގެ ގަރެތު ބޭލް އަށް މިރޭގެ މެޗުގައި ނުކުޅެވޭނެ އެވެ. އެހެން ނަމަވެސް އަނިޔާ އަށް ފަހު އެތުލެޓިކޯގެ ޑިފެންޑަރު ހުއާންފްރަން ވަނީ ޓީމާ ގުޅިފަ އެވެ.

ރެއާލާއި އެތުލެޓިކޯ ކުޅޭ މެޗު ފަށާނީ މިރޭ ރާއްޖެ ގަޑިން 23:45 ގަ އެވެ.