ފިކުރެއްގެ ދިރުމުން ރިޔާސީ އިންތިހާބުގައި ވާދަކުރަނީ

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފިކުރެއްގެ ދިރުމުން އަންނަ ރިޔާސީ އިންތިހާބުގައި ވާދަކުރާނެ ކަން ދެންމެ އިއުލާންކޮށްފި އެވެ.

ނަޝީދަށް ތާއީދު ކުރައްވާ މަޖިލީހުގެ އެމްޑީޕީގެ މެމްބަރުންތަކެއް ޕާޓީން މިއަދު ވަކިވެ ވަޑައިގަތުމަށް ފަހު، ބޭއްވި ނޫސްވެރިންގެ ބައްދަލުވުމުގައި އެ ފެކްޝަނަށް ނިސްބަތްވާ ހުޅުދޫ ދާއިރާގެ މެމްބަރު އިލްޔާސް ލަބީބް ވިދާޅުވީ އާ ޕާޓީއެއް އުފައްދަން ނިންމައި، މި އަހަރުގެ ރިޔާސީ އިންތިހާބުގައި ވާދަކުރަން ކަމަށެވެ.

ނަމަވެސް އިންތިހާބުގައި ވާދަކުރައްވާނީ ކޮން ބޭފުޅެއް ކަން އެ ބޭފުޅުން އަދި ހާމައެއް ނުކުރައްވަ އެވެ. އިންތިހާބުގައި ނަޝީދު ވާދަ ކުރައްވާނެތޯ ނޫސްވެރިން ތަކުރާރުކޮށް ސުވާލު ކުރިޔަސް، އެ އަށް ވަކި ޖަވާބެއް އެ ބޭފުޅުން ނުދެއްވަ އެވެ. އަދި ނަޝީދު އަދިވެސް ހުންނެވީ އެމްޑީޕީގަ އެވެ.

ރައްޔިތުންގެ މަޖިލިހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވީ، ރިޔާސީ އިންތިހާބުގެ ބޭނުމަކަށް އިއްތިހާދު ވާން ޖެހޭ ބަޔަކާ އެކު ކުރިއަށް ދާން "ފިކުރެއްގެ ދިރުން" އޮތީ ތައްޔާރަށް ކަމަށެވެ.

ފިކުރެއްގެ ދިރުމުގައި ހަރަކާތްތެރިވާ އެންމެ އިސް ޓީމުގެ ހުރިހާ މެމްބަރުން އެކުގައި ބޭއްވެވި ނިއުސް ކޮންފަރެންސަކުން ނަޝީދެއް ނުފެނުނެވެ. އެ ހުރިހާ މެމްބަރުން މިއަދު އެމްޑީޕީ ދޫކުރެއްވިޔަސް ނަޝީދު އަދި ހުންނެވީ އެ ޕާޓީގެ މެމްބަރެއްގެ ގޮތުގަ އެވެ.