މަގުމަތިވި މީހާ ދަރިފުޅާ އެކު ކުރީގެ ފިރިމީހާގެ ގޭގައި ބަހައްޓަން ހުކުމްކޮށްފި

މަގުމަތިވި އަންހެން މީހާއަށް، އޭނާގެ ފިރިހެން ދަރިފުޅާ އެކު އެ ކުއްޖާގެ ބައްޕަގެ ގޭގައި ދިރިއުޅެވޭނެ ގޮތް ހަމަޖައްސައިދިނުމަށް ފެމިލީ ކޯޓުން މިއަދު ހުކުމްކޮށްފި އެވެ.

ފެމެލީ ކޯޓުން މިގޮތަށް ހުކުމްކުރީ ދަރިފުޅަށް ކުއްޖާގެ ބައްޕަގެ ގެއިން ބޯހިޔާވަހިކަން ހޯދުމަށް އެދި ކުރީގެ ފިރިމީހާގެ މައްޗަށް އަމުރުކޮށްދިނުމަށް އަންހެން މީހާ ކޯޓަށް ހުށަހެޅި މައްސަލައިގަ އެވެ.

ފިރިހެން މީހާގެ މައްޗަށް ކުރި ހުކުމުގައި ބުނެފައިވާ ގޮތުގައި، އެ ދެމީހުން ކައިވެނިކޮށްގެން ލިބިފައިވާ ކުއްޖާއަށް ބައްޕަގެ ގެއިން ބޯހިޔާވަހިކަން ލިބިދިނުމުގެ ގޮތުން، ކުއްޖާ ބެލެހެއްޓުމަށް ގޭގައި ކުއްޖާ ގޮވައިގެން މަންމައަށް ދިރިއުޅެވޭނެ ގޮތް ހަމަޖައްސަން ޖެހޭނެ އެވެ. އަދި އެ ގޭގައި ދެމައިންގެ ޒަރޫރީ ބޭނުންތައް ފުރިހަމަ ކޮށްދިނުމަށް، ކޮންމެހެން ބޭނުންވާ ފެނާއި ކަރަންޓުގެ ބޭނުންކުރުން ފަދަ އެއްވެސް ކަމަކަށް ހުރަސްއަޅައިގެން ނުވާނެ ކަމަށް ވެސް ވަނީ އަމުރުކޮށްފަ އެވެ.

ފެމިލީ ކޯޓުގެ އިސް ގާޒީ އިބްރާހިމް މާހިރު ކުރެއްވި ހުކުމުގައި، ކުއްޖާ ބެލުމުގައި ދެފަރާތުން ހިއްސާވެ، ދަރިފުޅުގެ ފުރިހަމަ ސިއްހަތަށާއި ރަނގަޅު ތައުލީމާއި ތަރުބިއްޔަތަށް ނޭދެވޭ އަސަރެއްކޮށްފާނެ އެއްވެސް ކަމެއް ނުކުރުމަށް ވަނީ އަމުރުކުރައްވައިފަ އެވެ. އަދި ކުއްޖާގެ މަސްލަހަތު އިސްވާނެ ގޮތުގެ މަތިން ދެފަރާތުގެ އަމަލުތައް އަބަދުވެސް ބެހެއްޓުމަށް ވެސް އެ އަމުރުގައި ބުނެފައިވެ އެވެ.

އެ އަންހެން މީހާގެ ކުރީގެ ކައިވެންޏަކަށް ލިބުނު އަންހެން ކުއްޖަކާއި އެންމެ ފަހުގެ ކައިވެންޏަށް ލިބުނު ފިރިހެން ދަރިފުޅާ އެކު، އެ ފިރިހެން ކުއްޖާގެ ބައްޕަގެ ގޭގައި އުޅެމުން ދަނިކޮށް އެ ގެއިން ނެރެލި ކަމަށް ބުނާ މައްސަލަ ފެންމަތިވީ މިިދިޔަ މަހު އެވެ.

ކުދިންނާއި އަންހެން މީހާ ހާލުގައި ޖެހުމުން އަންހެން މީހާއަށް ފުރަތަމަ އެހީވީ މަމްސް ޖަމިއްޔާއިންނެވެ. ނަމަވެސް، ފަހުން އެ އާއިލާ ގެންދިޔައީ ޖެންޑާ މިނިސްޓްރީގެ ބެލުމުގެ ދަށަށެވެ.