ސޫދާން: ހަމަލާތައް 72 ގަޑިއިރަށް މެދުކަނޑާލައިފި

ސޫދާންގައި މިހާރު ކުރަމުންދާ ދާޚިލީ ހަނގުރާމައިން ސަލާމަތްވެ އެ ގައުމުން ބޭރަށް ދާން ބޭނުންވާ ބިދޭސީންނަށް އިތުރު ފުރުސަތު ދިނުމުގެ ގޮތުން، ހަމަލާ ބަދަލުކުރުން 72 ގަޑިއިރުގެ މުއްދަތަކަށް މެދުކަނޑައިލުމަށް ދެ ފަރާތުގެ ސިފައިން އެއްބަސްވެ، އެ ގޮތަށް އަމަލުކުރަން ފަށައިފި އެވެ.

ސޫދާންގައި ދާ ހަނގުރާމަ ފެށުނީ، ޖެނެރަލް މުހައްމަދު ހަމްދާން ދަގްލޫ (ހަމިއްތީ)ގެ ކޮމާންޑަރުކަމުގެ ދަށުގައި އޮންނަ، ރެޕިޑް ސަޕޯޓް ފޯސަސް (އާރްއެސްއެފް) ކިޔާ ލަޝްކަރުގެ ސިފައިން، މި މަހުގެ 15 ވަނަ ދުވަހު ވެރިރަށް ޚުރުޠޫމަށް އަރައި، އަސްކަރިއްޔާގެ މައި މަރުކަޒަށް ހަމަލާ ދޭން ފެށުމުންނެވެ. އެ ލަޝްކަރުގެ ބޭނުމަކީ، ސިފައިންގެ މައި މަރުކަޒާއި، ރިޔާސީ ގަނޑުވަރާއި ސަރުކާރުގެ ޓީވީ ސްޓޭޝަނާއި، ވެރިރަށުގައި އޮންނަ ބައިނަލްއަގުވާމީ ވައިގެ ބަނދަރު ހިފައި، ގައުމު އެމީހުންގެ ބާރުގެ ދަށަށް ގެންދިއުމެވެ.

މި ހަނގުރާމައިގައި އެންމެ ވަރުގަދަ އަށް ހަމަލާ ބަދަލުކުރަމުން ދަނީ ވެރިރަށް ޚަރްތޫމްގަ އެވެ. އެ ސަހަރުގެ މަގުތަކުގައި ދެ ފަރާތުގެ ސިފައިން ހަމަލާތައް ބަދަލުކުރަމުން ދާއިރު، ދެ ފަރާތުން ދޭ ބަޑީގެ ހަމަލާތައް މައިގަނޑު ގޮތެއްގައި އަމާޒުވަމުން ދަނީ އާންމުން ދިރިއުޅޭ އިމާރާތްތަކަށެވެ. ކައިރި ކުރިމަގެއްގައި މި ހަނގުރާމަ ހުއްޓިދާނެ ކަމުގެ އެއްވެސް އުންމީދެއް ނެތުމާއެކު، ސޫދާންގައި ތިބި ބޭރު ގައުމުތަކުގެ ޑިޕްލޮމޭޓުން އެ ގައުމުން ބޭރު ކުރުމުގެ މަސައްކަތް އެ ގައުމުތަކުން މިހާރު ވަނީ ފަށައިފަ އެވެ.

ޑިޕްލޮމޭޓުން ބޭރު ކުރެވުނަސް، ސޫދާންގައި ތިބި އެހެން ގައުމުތަކުގެ އާންމު ރައްޔިތުން އެ ގައުމުން ބޭރަށް ގެންދެވޭނެ ގޮތެއް އަދި ހަމަނުޖެހެ އެވެ. ވެރިރަށް ޚަރްތޫމުގައި ބޭރު ގައުމުތަކުގެ އެތައް ހާސް ދަރިވަރުންނެއް ކިޔަވަމުންދާ އިރު، ސޫދާނުން ބޭރަށް ދެވޭނެ ގޮތެއް ހަމަޖައްސައިދިނުމަށް އެދި، އެ ދަރިވަރުން ދަނީ ބައިނަލްއަގުވާމީ މުޖްތަމައަށް ގޮވައިލަމުންނެވެ.

ސޫދާން ސިފައިން ބުނި ގޮތުގައި ހަމަލާ ބަދަލުކުރުން މެދުކަނޑައިލުމަށް ދެ ފަރާތުން އެއްބަސްވީ، ސައޫދީ ސަރުކާރާއި އެމެރިކާ ސަރުކާރު މެދުވެރިވެގެން، ދެ ފަރާތުގެ ސިފައިންގެ މެދުގައި ކުރި މަޝްވަރާތަކުންނެވެ. އެ މަޝްވަރާތަކަށް ފަހު ދެ ފަރާތުން އެއްބަސްވެފައިވަނީ، ސޫދާން ގަޑިން ރޭގެ ދަންވަރު 12:00 ން ފެށިގެން ކުރިއަށް އޮތް 72 ގަޑިއިރަށް މެދުކަނޑައިލުމަށެވެ.

ހަމަލާ ބަދަލުކުރުން ހުއްޓައިލުމަށް ރެޕިޑް ސަޕޯޓް ފޯސަސް (އާރްއެސްއެފް)ގެ ސިފައިންނާއި ސޫދާންގެ އަސްކަރިއްޔާ އިން، މިދިޔަ ހަފުތާގައި ވެސް ތިން ފަހަރެއްގެ މަތިން އެއްބަސްވި އެވެ. އެއިން ކޮންމެ ފަހަރަކު ވެސް ދެ ފަރާތުން އެއްބަސްވަނީ، އަނެއް ލަޝްކަރުން ހަމަލާއެއް ނުދޭ ނަމަ، މި ލަޝްކަރުން ވެސް ހަމަލާއެއް ނުދީ ތިބުމަށެވެ. އެހެންކަމުން، އެއިން ކޮންމެ ފަހަރަކު ވެސް، އެއްބަސްވުން ތަންފީޒު ކުރެވޭ ގޮތް ނުވެ، ދެ ފަރާތުގެ މެދުގައި ހަމަލާތައް ބަދަލުކުރަން ފަށަނީ އެވެ.

މި ހަނގުރާމަ އަށް 11 ދުވަސް ވެގެން ދިޔައިރު، މިހާތަނަށް އާންމުންގެ 427 އަށް ވުރެ ގިނަ މީހުން ވަނީ މަރުވެފަ އެވެ. ޒަޚަމްވި މީހުންގެ އަދަދު އެތައް ހާހަކަށް އަރާއިރު، ދެ ފަރާތުގެ ދެމެދުގައި ބަދަލުކުރެވޭ ހަމަލާތަކުގައި ހޮސްޕިޓަލުތަކަށް ބޮޑެތި ގެއްލުންތަކެއް ލިބިފައިވާތީ، ސިއްހީ ފަރުވާ ދެވޭނެ ރަނގަޅު ނިޒާމެއް ނެތެވެ.

އޭގެ އިތުރުން ހަނގުރާމައިގެ ސަބަބުން ޚަރްތޫމްގެ ބޮޑު ސަރަހައްދަކުން ކަރަންޓު ކެނޑި ބޯފެނުގެ ޚިދުމަތަށް ވެސް ވަނީ ބުރޫ އަރައިފަ އެވެ. އަދި މަގުތަކުގައި ހިނގަމުންދާ ހަނގުރާމައިގެ ސަބަބުން، ބޭރަށް ނުކުމެ އުޅެވޭނެ ގޮތެއް ނެތުމުން، ފިހާރަތަކާއި ސައިހޮޓާތައް ވެސް ބަންދުކޮށްފައި ހުރުމާ ގުޅިގެން، ކާބޯތަކެތީގެ ޚިދުމަތް ވެސް ވަނީ ހުއްޓިފަ އެވެ.

ވެރިރަށް ޚަރްތޫމްގަޔާއި އެހެން ބައެއް ސަރަހައްދުތަކުގައި ހަނގުރާމަ ފުޅާވަމުން ދާތީ، ސޫދާންގެ އާންމު ރައްޔިތުންނާއި ސޫދާންގައި ދިރިއުޅޭ ބޭރު ގައުމުތަކުގެ ރައްޔިތުން ވެސް ހިމެނޭ ގޮތުން، އެތައް ހާސް ބަޔަކު މިހާރު ވަނީ، ރެފިއުޖީންގެ ގޮތުގައި ނުކުމެ އަވައްޓެރި ގައުމުތަކަށް ވަދެފަ އެވެ. އޭގެ ތެރެއިން އެންމެ ގިނަ ބަޔަކު ރެފިއުޖީންގެ ގޮތުގައި ދިޔައީ ސޫދާންގެ ހުޅަނގުން އޮންނަ ޗާޑް އަށެވެ.

ދެން އެންމެ ގިނަ ބަޔަކު ރެފިއުޖީންގެ ގޮތުގައި ދިޔައީ، ސޫދާންގެ ދެކުނުން އިންވެގެން އޮންނަ ދެކުނު ސޫދާނަށެވެ. ދެކުނު ސޫދާނަކީ، ސޫދާނަށް ވުރެ ވެސް ފަގީރު ގައުމަކަށް ވިޔަސް، ހަނގުރާމައިގެ ނުރައްކަލުން ސަލާމަތްވުމަށްޓަކައި އެންމެ ފަސޭހައިން ދެވެން އޮތް އެއް ގައުމަކީ އެއީ އެވެ. ދެން އެންމެ ގިނަ ބަޔަކު ދިޔައީ ސޫދާންގެ އުތުރުން އިންވެގެން އޮތް މިސްރަށެވެ.

ސޫދާނުން ނުކުތުމަށް މިދިޔަ ހަފުތާ ބަންދުގައި، ބަސްތަކާއި ކާރުތަކާއި ޕިކަޕްތަކުގައި ދަތުރުކުރި ރެފިއުޖީ ގާފިލާތަކަށް ދެ ފަހަރެއްގެ މަތިން، ހަނގުރާމަވެރިންގެ ހަމަލާތައް އަމާޒުވި އެވެ. އަދި ސޫދާނުން ބޭރަށް ދަތުރުކުރި ޑިޕްލޮމެޓުންނަށް ވެސް ބައެއް ހަމަލާތައް އަމާޒުވި އެވެ. މި ހަމަލާތަކުގައި، ސޫދާންގައި އިންސާނީ އެހީތެރިކަން ފޯރުކޮށްދިނުމަށް މަސައްކަތް ކުރާ ފަސް މީހަކު ވަނީ މަރުވެފަ އެވެ.