އެފްކޮންސް ވިއްކާލިޔަސް މަޝްރޫއުތަކަށް ބަދަލެއް ނާންނާނެ: ސަރުކާރު

އެފްކޮންސް ވިއްކާލިޔަސް ރާއްޖޭގައި އެ ކުންފުނިން ހިންގާ މަޝްރޫއުތަކަށް އަސަރެއް ނުކުރާނެ ކަމަށް ސަރުކާރުން މިއަދު ބުނެފި އެވެ.

ތިލަމާލެ ބްރިޖާއި އައްޑޫގެ މަގު ހެދުމުގެ މަސައްކަތްކުރާ އެފްކޮންސްގެ މައި ކުންފުނި ކަމަށްވާ އިންޑިއާގެ ބިލިއަނަރު، ޝާޕޫރު މިސްޓްރީގެ ޝާޕޫރުޖީ ޕަލޯންޖީ (އެސްޕީ) ގްރޫޕަށް މާލީ ތާށިކަން ކުރިމަތިވެ އެފްކޮންސް ވިއްކާލަން ނިންމާފައިވާ ކަމަށް އެ ގައުމުގެ މީޑިއާގައި ވަނީ ރިޕޯޓުކޮށްފަ އެވެ.

އެއާއެކު، ރާއްޖޭގައި ހިންގާ މަޝްރޫއަށް ވާނެ ގޮތަކާ މެދު އެތައް ބަޔަކު ދަނީ ސުވާލު އުފައްދަމުންނެވެ.

ރައީސް އޮފީހުގައި ބޭއްވި ނިއުސް ކޮންފަރެންސްގައި ނޫސްވެރިއެއްގެ ސުވާލާ ގުޅިގެން ތަރުޖަމާނު މިއުވާން މުހައްމަދު ވިދާޅުވީ ކުންފުނިތަކުގެ މުދާ ގަތުމާއި ވިއްކުމަކީ އާއްމުކޮށް ހިނގާ ކަންތައްތައް ކަމަށެވެ.

އޭގެ މިސާލެއްގެ ގޮތުން ނެންގެވީ ދުނިޔޭގެ އެންމެ ބޮޑު ސީޕްލޭން ފްލީޓް، ޓީއެމްއޭ ވިއްކާލުމުގެ މުއާމަލާތްތަކެވެ. އެ ކުންފުނީގެ ހިއްސާތައް ވެސް އެތައް ފަހަރަކު ވިއްކާލިޔަސް އޮޕަރޭޝަން ހުއްޓުމަކަށް ނާންނަ ކަމަށް ވިދާޅުވި އެވެ.

އެގޮތަށް، ބްރިޖު ހަދާ ކުންފުނި ވިއްކާލިޔަސް މަސައްކަތަށް ބަދަލެއް ނާންނާނެ ކަމަށާއި ޝެޑިއުލާ އެއްގޮތަށް މިހާރު ވެސް މަސައްކަތް ކުރިއަށްދާ ކަމަށް އޭނާ ވިދާޅުވި އެވެ.

"އެފްކޮންސް ކުންފުނީގެ ޕޭރެންޓު ކުންފުނިން ވިއްކާލަން އުޅޭ ވާހަކަ މީޑިއާތަކުން އަޅުގަނޑުމެންނަށް ވެސް ފެނުނު. ނަމަވެސް އެއީކީ ރާއްޖޭގައި ހިނގަމުންދާ މަޝްރޫއުތަކަށް އެއްވެސް އަސަރެއް ކުރާނެ ކަމެއް ނޫން." މިއުވާން ވިދާޅުވި އެވެ.

ނަމަވެސް، މިއުވާން ވިދާޅުވީ އެފްކޮންސް ވިއްކާލުމާ ގުޅޭގޮތުން ރާއްޖެއާ އެކު މުއާމަލާތެއް ކޮށްފައިނުވާ ކަމަށެވެ.

އިންޑިއާގެ މީޑިއާ ރިޕޯޓުތަކުގައިވާ ގޮތުން އެސްޕީ ގްރޫޕުން އަންނަނީ އެ ކުންފުނީގެ ދެ ބިލިއަން ޑޮލަރުގެ އެސެޓް ވިއްކާލަން މަސައްކަތް ކުރަމުންނެވެ. އޭގެ ތެރޭގައި އެފްކޯންސް އިންފްރާސްޓްރަކްޗާ ލިމިޓެޑާއި އެ ކުންފުނީގެ ދަށުން އިންޑިއާގެ އިރުމަތީ ސަރަހައްދުގައި ހިންގާ އެންމެ ބޮޑު އެއް ޕޯޓު ކަމަށްވާ ގޯޕާލްޕޫރު ޕޯޓު ހިމެނެ އެވެ.