ދެ މެޗަށް ފަހު މެސީ އާއި ރާމޯސް ޕީއެސްޖީ މޮޅުކޮށްދީފި

ޕެރިސް (އޭޕްރީލް 9) - ޕީއެސްޖީން ފްރާންސް ލީގުގައި އެންމެ ފަހުން ކުޅުނު ދެ މެޗުން ވެސް ބަލިވެފައި އޮއްވައި ނީސް އާ ދެކޮޅަށް ރޭ އަމިއްލަ ދަނޑުގައި ކުޅުނު މެޗުން 2-0 އިން މޮޅުވެއްޖެ އެވެ.

ފުރަތަމަ ހާފުގައި ޕީއެސްޖީ އަށް ލީޑު ނަގައިދިނީ، މިދިޔަ ހަފްތާ އެޓީމުގެ ސަޕޯޓަރުންގެ ފުރައްސާރައާ ކުރިމަތިލާން ޖެހުނު އާޖެންޓީނާގެ ފޯވާޑް ލިއޮނެލް މެސީ އެވެ. އަދި ފަހު ހާފުގައި މެސީ ނަގައިދިން ކޯނަރަކުން އެޓީމުގެ ދެ ވަނަ ލަނޑު ޖަހައިދިނީ ސާޖިއޯ ރާމޯސް އެވެ.

ޕީއެސްޖީގެ ގޯލްކީޕަރު ޖިއާންލުއިޖީ ޑޮންނަރޫމާ ވަނީ ފުރަތަމަ ހާފުގައި ނީސްގެ ހަޝީމް ބޫޑޯއީ އާއި ނިކޮލަސް ޕެޕޭ ފޮނުވާލި ނުރައްކާތެރި ހަމަލާތަކެއް ދިފާއު ކޮށްފަ އެވެ. އެ ޓީމުގެ ކެޕްޓަން ޑަންޓޭ ފޮނުވާލި ހަމަލާއެއް ގޯލުގެ ހުރަސް ދަނޑިއަށް އަމާޒު ވިއިރު ޔޫސުފް އެންޑާޔިޝިމިޔޭ ފޮނުވާޅި ހަމަލާއެއް ވެސް ޑޮންނަރޫމާ ވަނީ މަތަކޮށްފަ އެވެ.

މި ނަތީޖާއާ އެކު ޕީއެސްޖީ ވަނީ 30 މެޗުން 69 ޕޮއިންޓް ހޯދައި، އެއް ވަނައިގައި ހަ ޕޮއިންޓަށް ލީޑު ފުޅާ ކޮށްފަ އެވެ. ދެވަނައިގައި އޮތް ލެންސް އަށް 30 މެޗުން ވަނީ 63 ޕޮއިންޓް ލިބިފަ އެވެ.

ޕީއެސްޖީގެ ކޯޗު ކްރިސްޓޯފް ގަލްޓިއޭ އަކީ މިދިޔަ ސީޒަން ގައި ނީސްގެ ހެޑް ކޯޗެވެ. ނީސްގެ ސަޕޯޓަރުންގެ ވަނީ މެޗުގައި، ގަލްޓިއޭގެ މަންމަ އަށް ފުރައްސާރަކޮށް ބެނާއެއް ނަގައިފަ އެވެ. މިކަމާ ގުޅޭގޮތުން ގަލްޓިއޭ ވަނީ މެޗަށް ފަހު ވާހަކަ ދައްކައިފަ އެވެ.

"އަހަރެންގެ މަންމަގެ އުމުރުން 83 އަހަރު، އަދި ދާދި ފަހުން މަންމައަށް ވަނީ ކެންސަރު ޖެހިފައި،" މެޗަށް ފަހު ވާހަކަ ދައްކަމުން ގަލްޓިއޭ ބުންޏެވެ.

"އެ ސަޕޯޓަރުން މި ސީޒަން ގައި [ނީސް] ޔޫރަޕުގައި ކުޅޭތަން ބަލާފައި ވާނަމަ، އެއީ މިދިޔަ ސީޒަނުގައި އަހަރެން ކުރި މަސައްކަތުން."

ގަލްޓިއޭ ވަނީ މިދިޔަ ސީޒަން ގައި ނީސްގެ ކޯޗުކަމުގައި އެޓީމަށް ލީގުގެ ފަސް ވަނަ ހޯދައިދީ، ޔޫއެފާ ޔޫރޮޕާ ކޮންފަރެންސް ލީގުން ޖާގަ ހޯދައިދީފަ އެވެ. މިވަގުތު ލީގުގެ އަށް ވަނައިގައި އޮތް ނީސް އަންނަނީ ކޮންފަރެންސް ލީގުގެ ކުއާޓާ ފައިނަލް ގައި ސްވިޒަލެންޑްގެ ބަސެލްއާ ދެކޮޅަށް ކުޅެން ތައްޔާރު ވަމުންނެވެ.