ފުރަތަމަ ތިން މަހު ސިފައިންގެ ފްލެޓްތައް ނުނިމުނު، އާ ތާރީހަކީ ޖުލައި!

ސިފައިންގެ ފްލެޓްތައް މި އަހަރުގެ ފުރަތަމަ ތިން މަސް ތެރޭގައި ނުނިމުމުން އެ ތަންތަން ނިންމަން އާ ތާރީހެއް ސިފްކޯ އިން އިއްޔެ ދީފި އެވެ.

އެ ފްލެޓްތައް ނިމޭނެ ކަމަށް އެންމެ ފަހުން ބުނެފައި އޮތީ މި އަހަރުގެ ފުރަތަމަ ތިން މަސް ތެރޭގަ އެވެ.

އެކަމަކު، "މިހާރު" އިން ލިޔުމުން ފޮނުވި ސުވާލުތަކަކަށް ސިފައިންގެ ކޯޕަރޭޓިވް ނުވަތަ ސިފްކޯ އިން ދިން ޖަވާބުގައިވާ ގޮތުން ނަމަ ހުޅުމާލެ 1 ގައި އިމާރާތްކުރާ އެ ފްލެޓްތައް ނިމޭނެ އާ ތާރީހަކީ މި އަހަރުގެ ޖުލައިމަހެވެ.

މަސައްކަތް ނުނިމި ލަސްވި ސަބަބެއް ކަމަށް ސިފްކޯ އިން ބުނީ، ކޮވިޑްގެ ބަލިމަޑުކަމާ ގުޅިގެން ސަޕްލައި ޗެއިނަށް ދިމާވެފައިވާ މައްސަލަތަކާ ގުޅިގެން، ބޭނުންވާ ތަކެތި ލިބުން ދަތިވުމުން ކަމަށެވެ.

"އިރާދަކުރެއްވިއްޔާ ޖުލައި މަހުގެ ތެރޭ މަސައްކަތް ނިންމައިލެވޭނެ،" ސިފްކޯ އިން ބުންޏެވެ.

ސިފައިންގެ ފްލެޓްތައް އަހަރެއްހާ ދުވަހުގެ ތެރޭގައި ނިންމަން މި ސަރުކާރުން ހަވާލުކުރީ ޗައިނާގެ "ދަ ޓްވެންޓީ ތާޑް މެޓަލުޖިކަލް ކޮންސްޓްރަކްޝަން ގްރޫޕް" އާ އެވެ.

އެ އެޕާޓްމަންޓުތަކުގައި މިހާރު ކުރަމުން އަންނަނީ ފެން މީޓަރުތަކާއި ފަޔާ ހޮޅިތައް ހަރުކުރުމާއި އިތުރަށް ދެން ކުރަންޖެހޭ މަސައްކަތްތައް ކަމަށް ސިފްކޯ އިން ބުންޏެވެ.

ފްލެޓްތައް ނިންމުމާ ގުޅޭ ބައެއް ޕޮއިންޓްތައް

- މަސައްކަތް އެއްކޮށް ނިންމޭނެ އާ ތާރީހަކީ މި އަހަރުގެ ޖުލައި މަސް.

- މަސައްކަތް ލަސްވީ ކޮވިޑާ ގުޅިގެން ތަކެތި ލިބުން ލަސްވުމުން.

- މިހާރު ކުރަނީ ފެން މީޓަރުތަކާއި ފަޔާ ހޮޅިތައް ހަރުކުރުން. އިތުރު ކަންކަން ވެސް އެބަކުރޭ.

- މަސައްކަތް ނިންމަން ބޭނުންވާ ސާމާނު ސައިޓްގައި އެބަހުރި. ފައިސާގެ ދަތިކަމެއް ވެސް ނެތް.

- ޕެންޓް ހައުސް ދޫކުރުމުގައި އިސްކަން ދެނީ އިސް އޮފިސަރުންނަށް.

- ފްލެޓްތަކުގެ އެއްބަސްވުންތައް ފައިނަލް ކުރުން ވަނީ ފަށާފައި.

"ކޮންމެ ދުވަހަކު ވެސް ވޯކިން ޝެޑިއުލާ އެއްގޮތަށް މަސައްކަތްތައް ކުރެވެމުންދެ އެވެ. ލިފްޓުތައް ހަރުކުރުން، ކޮމަން އޭރިޔާގެ ފިނިޝިން މަސައްކަތް ކުރުން. ނުނިމި ހުރި ފާހަނާތަކުގެ ފިކްސްޗާސް ހަރުކުރުން. ބަދިގެ ކަބަޑްސެޓް ރާވައި ހަރުކުރުމުގެ މަސައްކަތް. މި ނޫން ވެސް ބާކީ ހުރި މަސައްކަތްތައް ޝެޑިއުލް ކުރެވި ނިންމުމަށް މަސައްކަތް ކުރެވެމުންދެ އެވެ،" ސިފްކޯގެ ޖަވާބުގައި ވެ އެވެ.

ސިފައިންގެ ވެލްފެއާ ކުންފުނިން ބުނިގޮތުގައި ފްލެޓްތަކުގެ ފިނިޝިން އަށް ބޭނުންވާ ސާމާނުތައް ސައިޓުގައި އެބަހުއްޓެވެ. އަދި ޝިޕިންގައި ހުރި ތަކެތި ވެސް މި މަހުގެ ފަހުކޮޅު ސައިޓަށް ލިބޭ ވަރު ވާނެ ކަމަށް ބުންޏެވެ.

"ނިމޭ މަސައްކަތްތަކަށް ބިލް ކުރީމާ ފައިސާ ލިބޭ. ފައިސާގެ ދަތިކަމެއް ނެތެވެ،" ފްލެޓްތައް ނިންމަން ބޭނުންވާ ސާމާނާއި ފައިސާ ހުރީ ހަމަޖެހިފައިތޯ އެހުމުން ސިފްކޯ އިން ބުންޏެވެ.

ސިފައިންގެ ތިން ޓަވަރުގައި ތިން ކޮޓަރީގެ 330 ފްލެޓު އަދި 20 ޕެންޓް ހައުސް ހުންނާނެ ކަމަށް ކުރިން ބުނެފައި ވެ އެވެ. ނަމަވެސް، އެ ސްޓްރަކްޗާއަށް ފަހުން ވަނީ ބައެއް ބަދަލުތައް ގެނެސްފަ އެވެ.

ސިފައިންގެ ފްލެޓްތަކުގެ ޕެންޓް ހައުސް ދޫކުރުމުގައި އަމަލުކުރާނެ އުސޫލަކީ ކޮބައިތޯ އެހުމުން ސިފްކޯ އިން ބުނީ، ސިފައިންގެއަކީ "ހައިރާކީ އޮގަނައިޒޭޝަން" އަކަށް ވާތީ އަސްކަރިއްޔާގެ އިސް އޮފިސަރުންނަށް އިސްކަން ދޭނެ ކަަމަށާއި މިހާރު އެ ޕެންޓް ހައުސްތައް ދޫކުރުމުގެ ކަންކަން ކުރިއަށް ގެންދާ ކަމަށެވެ.

ސިފްކޯ އިން ބުނިގޮތުގައި އިތުރުކުރި ފްލޯތަކުގައި ޖާގަ ތަނަވަސް ފަސް އެޕާޓްމަންޓް ހުންނާނެ އެވެ. އެހެން އެޕާޓްމަންޓުތަކަށް ވުރެ އެ ތަންތަން އަގުބޮޑު ވާނެ ކަމަށް ބުންޏެވެ.

ފްލެޓްތައް ސިފައިންނާ ހަވާލުކުރުމަށް ކުރާ ކަމަކީ ކޮބައިތޯ އެހުމުން ސިފްކޯ އިން ބުނީ، މިހާރު ކުރިއަށް ގެންދަނީ ގާނޫނީ ވަކީލުންނާއެކު ފްލެޓްތަކުގެ އެއްބަސްވުންތައް ފައިނަލް ކުރުން ކަމަށެވެ.

ނޮވެމްބަރު 26، 2014 ގައި ސިފައިންގެ ފްލެޓުތަކުގެ ބިންގާ އެޅީ 18 މަސް ދުވަހުގެ ތެރޭގައި ނިންމާ ގޮތަށެވެ. ނަމަވެސް، ތަފާތު އެކި ސަބަބުތަކާ ހެދި ނުވަ އަހަރު ވެގެން ދިޔައިރު ވެސް އެ ތަނުގައި ދިރިއުޅޭކަށް ނުފެށުނެވެ.