މޯދީ އަށް "ވަގަށް ގޮވުމުން" ރާހުލް ގާންދީއަށް ދެ އަހަރުގެ ޖަލު ހުކުމެއް

"މޯދީ" ކިޔާ މީހުންގެ ތެރޭ ވަގުން ގިނަ ކަމަށް ވިދާޅުވެ އިންޑިއާގެ އިދިކޮޅު ޕާޓީގެ ލީޑަރު ރާހުލް ގާންދީ ވާހަކަ ދެއްކެވި މައްސަލައެއްގައި ދެ އަހަރަށް ޖަލަށް ލުމަށް މިއަދު ހުކުމް ކޮށްފި އެވެ.

އިންޑިއާގެ ބޮޑުވަޒީރު ނަރެންދުރަ މޯދީގެ ނުފޫޒު ގަދަ ގުޖުރާތުގެ ކޯޓަކުން އަބުރުގެ ދައުވާގެ މި މައްސަލާގައި ހުކުމް ކުރީ 2019 ވަނަ އަހަރު އިންތިހާބުގެ ކެމްޕޭން އެއްވުމެއްގައި ހުރިހާ ވަގުންގެ ފަހަތު ނަމަކަށް "މޯދީ" އަންނަނީ ކީއްވެތޯ ވިދާޅުވެފައި ވާތީ އެވެ.

ކުރީގެ ބޮޑުވަޒީރު ރާޖީވް ގާންދީގެ ދަރިކަލުން ރާހުލްގެ މައްޗަށް މި ހުކުމް އައި ނަމަވެސް އަދި ޖަލަށް ދާކަށް ނުޖެހޭނެ އެވެ. އޭނާއަށް 30 ދުވަހުގެ ކަފާލާތެއް ވަނީ ދީފަ އެވެ. އަދި މި ހުކުމް އިސްތިއުނާފު ވެސް ކުރެވޭނެ އެވެ.

ރާހުލް އަށް މި ހުކުމް އިއްވާފައި މި ވަނީ އާންމު އިންތިހާބަށް އަހަރެއްހާ ދުވަހަށް ވެފައި ވަނިކޮށެވެ.

"ހުރިހާ ވަގުންގެ ފަހަތު ނަމަކަށް މޯދީ އޮންނަނީ ކީއްވެ؟ ނިރާވް މޯދީ، ލަލިތު މޯދީ، ނަރެންދުރާ މޯދީ،" ކަރްނާޓަކާގައި 2019 ވަނަ އަހަރުގެ އޭޕްރީލް މަހު، އެންމެ ފަހުގެ އާންމު އިންތިހާބުގެ ކެމްޕޭން ރެލީއެއްގައި ރާހުލް ވިދާޅުވި އެވެ.

ނިރާވް މޯދީ އަކީ މިހާރު ފިލައިގެން އުޅޭ، އިންޑިއާގައި ޖަވާހިރުގެ ވިޔަފާރިކުރާ މަހުޖަނެކެވެ. ލަލިތު މޯދީ އަކީ އިންޑިއާގެ ޕްރިމިއާ ލީގުގެ ކުރީގެ ޗެއާމަނެވެ. އޭނާ ވަނީ ކްރިކެޓް ބޯޑުން މުޅި އުމުރަށް ސަސްޕެންޑް ކޮށްފަ އެވެ.

ރާހުލްގެ މައްޗަށް ދައުވާކުރީ އިންޑިއާގެ ގާނޫނު ހަދާ މަޖިލީހުގައި މޯދީގެ ބީޖޭޕީ ތަމްސީލްކުރައްވާ މެންބަރެއް ކަމަށްވާ ޕުރްނޭޝް މޯދީ އެވެ. އޭނާ ވިދާޅުވެފައިވަނީ ރާހުލްގެ ވާހަކައިން "މޯދީ ކޮމިއުނިޓީ" އަށް ހުތުރުވެފައިވާ ކަމަށެވެ.

ރާހުލް އަށް ކުރި ހުކުމާ ގުޅިގެން، ގާނޫނީ ދާއިރާގެ ބައެއް ބޭފުުޅުން ވަނީ ހުކުމާ މެދު ސުވާލު އުފައްދަވައިފަ އެވެ. އެ ބޭފުޅުން ވިދާޅުވަނީ ރާހުލް ވާހަކަ ދެއްކެވީ ވަކި މީހަކަށް އަމާޒުކޮށްގެން ކަމަށް ގާނޫނީ ގޮތުން ނުބެލެވޭނެ ކަމަށެވެ. ޖުމްލަކޮށް ގިނަ ބަޔަކަށް ނިސްބަތްވާ ގޮތަށް "ވަގުން" ކަމަށް ބުނެފި ނަމަ ދައުވާއެއް ސާބިތު ކުރެވޭނީ އެ މީހަކު އެއީ ސީދާ އެ މީހަކަށް ބުނި ބަހެއްކަން ސާބިތުކޮށްދެވިގެން ކަމަށް އިންޑިއާގެ ގާނޫނީ ބައެއް ބޭފުޅުން ވިދާޅުވެ އެވެ.

ހިޔާލު ފާޅުކުުރުމުގެ މިނިވަންކަމަށް ވަކާލާތުކުރާ މީހުން ވެސް ގެންދަނީ މި ހުކުމަށް ފާޑު ކިޔަމުންނެވެ.