އެމްއެންފީން ވެސް ގުރައިދޫ ދާއިރާއަށް ކެންޑިޑޭޓެއް ނެރެނީ

ރައްޔިތުންގެ މަޖިލީހުގެ ގުރައިދޫ ދާއިރާގެ ހުސްވެފައިވާ ގޮނޑިއަށް ކުރިމަތިލާން މޯލްޑިވްސް ނޭޝަނަލް ޕާޓީ (އެމްއެންޕީ) އިން ހުޅުވާލައިފި އެވެ.

ގުރައިދޫ ދާއިރާގެ ބައި-އިލެކްޝަން ބާއްވަނީ އެ ދާއިރާގެ މެމްބަރުކަން ފާއިތުވި 14 އަހަރު ފުރުއްވަމުން ގެންދެވި އިބްރާހިމް ރިޒާ އަވަހާރަވުމުންނެވެ. ކެންސަރުގެ އާލާސްކަންފުޅުގައި ގިނަ ދުވަސް ވަންދެން އުޅުއްވުމަށްފަހު އުމުރުން 55 އަހަރުގައި ރިޒާ އަވަހާރަވީ މިދިޔަ ބުދަ ދުވަހުގެ ރޭ މެލޭޝިއާގަ އެވެ.

އެ ދާއިރާގެ ބައި-އިލެކްޝަން ބާއްވަން ހަމަޖެހިފައި ވަނީ އަންނަ މަހުގެ 15 ގަ އެވެ. އެމްއެންޕީން ވާދަކުރާނެ ކެންޑިޑޭޓުންނަށް ކުރިމަތިލާން ހުޅުވާލައިފައި ވަނީ އަންނަ އަންގާރަ ދުވަހުގެ ނިޔަލަށެވެ. އެ ޕާޓީގެ ޕްރައިމަރީއެއް ބާއްވަން ޖެހިއްޖެ ނަމަ ވޯޓުލުން ބާއްވާނީ މި މަހުގެ 10 ވަނަ ދުވަހު ކަމަށް އެ ޕާޓީން ބުންޏެވެ.

އެމްއެންޕީގެ އިތުރުން މި ދާއިރާއަށް ވާދަކުރަން މިހާތަނަށް ޕްރައިމަރީއަށް ދެން އިއުލާންކުރީ އެމްޑީޕީންނެވެ. އެ ޕާޓީން ހަތަރު މީހަކު ކުރިމަތިލާފައިވާއިރު ޕާޓީގެ ޕްރައިމަރީ ބާއްވަން ނިންމާފައި ވަނީ މި މަހުގެ 11 ގަ އެވެ. ދާއިރާގެ ގޮނޑި މިހާތަނަށް ކާމިޔާބުކުރަމުން އައި ޕީޕީއެމުން ކެންޑިޑޭޓެއް ނެރުމާ ބެހޭ ގޮތުން އަދި ވަކި ގޮތަކަށް އިއުލާނެއް ނުކުރެ އެވެ.