ގައިދީއެއްގެ ހަށިގަނޑުގައި ފޮރުވައިގެން ޖަލަށް ވައްދަން އުޅުނު ޑްރަގްސް އަތުލައިގެންފި

ގައިދީއަކު ހަށިގަނޑު ތެރޭގައި ފޮރުވައިގެން ކ. މާފުށީ ޖަލަށް އެތެރެކުރަން އުޅުނު ޑްރަގް އަތުލައިގެންފި އެވެ.

ކޮމިޝަނާ އޮފް ޕްރިޒަންސް އަހުމަދު މުހައްމަދުފުޅު ކުރެއްވި ޓްވީޓެއްގައި ވިދާޅުވީ ޖަލަށް މަސްތުވާތަކެތި އެތެރެކުރަން އުޅޭ ކަމަށް ލިބުނު އިންޓެލިޖެންސް މައުލޫމާތަކާ ގުޅިގެން ފާސްކުރި ގައިދީގެ ހަށިގަނޑުގައި މަސްތުވާތަކެތި ފޮރުވާފައި ހުރީ ފުރަގަސްފަރާތުގައި ކަމަށެވެ.

ފުލުހުންނާ ގުޅިގެން ހިންގި އެ އޮޕަރޭޝަނުގައި އަތުލަގަތް ގައިދީގެ ހަށިގަނޑު ތެރޭގައި މަސްތުވާތަކެތި ފޮރުވާފައި ހުރި ގޮތް ފެންނަ އެކްސްރޭއަކާއި ނެގި މަސްތުވާތަކެތީގެ ފޮޓޯއެއް ކޮމިޝަނާ އޮފް ޕްރިޒަންސް ޓްވީޓްކުރައްވާފައިވެ އެވެ.

ނަގާފައި ހުރި މަސްތުވާތަކެތި ހުރީ ޖޫސްޕެޓީ ކޮތަޅެއްގަ އެވެ.

މަސްތުވާތަކެއްޗާއި ފޯނު ފަދަ އެއްޗެހި ޖަލަށް އެތެރެކުރުމުގެ މައްސަލަތައް ބޮޑުވެ މި ފަހުން ވަނީ ޖަލުގައި މިފަދަ ކަންކަމާ ދެކޮޅަށް ހިންގާ އޮޕަރޭޝަންތައް އިތުރު ވެސް ކޮށްފަ އެވެ.