ނެސްލޭ ކިޑްސް ފުޓްބޯލް ފިއެސްޓާ ފަށައި ކުޑަކުދިންގެ މޫނު މައްޗަށް ހިނިތުންވުން

ސޮކަ ވެޓަރަންސް އެސޯސިއޭޝަން އޮފް މޯލްޑިވްސްއިން ބާއްވާ ނެސްލޭ ކިޑްސް ފުޓްބޯޅަ ފިއެސްޓާ މިއަދު ރަސްމީކޮށް ފަށައިފި އެވެ.

ސްކޫލްތަކަށް ހާއްސަކޮށް ކުރިއަށް ގެންދާ ކިޑްސް ފުޓްބޯޅައިގެ އެންމެ ބޮޑު ފިއެސްޓާ ރަސްމީކޮށް ފައްޓަވައި ދެއްވީ، އެޑިއުކޭޝަން މިނިސްޓަރު ޑރ. އައިޝަތު އަލީ އެވެ. މުބާރާތް ރަސްމީކޮށް ހުޅުއްވައި ދެއްވަމުން މިނިސްޓަރު ވިދާޅުވީ މުބާރާތް ކުރިއަށް ގެންދާ މި ހަތަރު ދުވަހަކީ ކުދިންނަށް އުފާވެރި ހަތަރު ދުވަހަށް ވާނެ ކަމަށް އުންމީދު ކުރައްވާ ކަމަށެވެ.

ކުޅިވަރުގެ ހަރަކާތްތަކުން އެންމެ ބޮޑަށް ދަސްވާ އެއްކަމަކީ މޮޅުވުމާއި ބަލިވުން ކަމަށެވެ. އަދި ވިދާޅުވީ މޮޅުވާ ޓީމު ވެސް އަނެއް ޓީމަށް އިހްތިރާމް ކުރުމާއި ބަލިވުމުން ބަލި ގަބޫލުކޮށް މޮޅުވާ ޓީމަށް މަރުހަބާ އަދ ކުދިންނަށް ކުޅިވަރުގެ ތެރެއިން ދަސްވެގެން ދާނެ ކަމަށެވެ.

ސޮކަ ވެޓަރަންސްގެ ރައީސް އަލީ ޝަމީމް ވިދާޅުވީ މިފަހަރުގެ މުބާރާތް ރާވަފާއިވާ ގޮތުން އެއް ވެސް ކުޅުންތެރިޔަކަށް ކުޅުމުގެ ފުރުސަތު ނުލިބި ނުދާނެ ކަމަށެވެ.

މުބާރާތް ހާއްސަކޮށްފައި ވަނީ ގްރޭޑް 1 އަދި 2 ގައި ކިޔަވާ ކުދިންނަށެވެ. ހޮނިހިރު ދުވަހުގެ ނިޔަލަށް ކުރިއަށް ގެންދާ މުބާރާތުގައި 20 ސްކޫލަކުން 40 ޓީމު ވާދަ ކުރެ އެވެ. އެއީ ޖުމުލަ 720 ކުދިންނެވެ. މުބާރާތުގައި 296 މެޗު ކުޅުމަށް ވަނީ ހަމަޖެހިފަ އެވެ. ކޮންމެ ގްރޭޑެއްގެ ދެމެދުގައި ޓީމުތައް ބަހާލާފައި ވަނީ ފަސް ގުރޫޕަކަށެވެ. ކޮންމެ ގުރޫޕެއްގައި ހިމެނޭނީ ހަތަރު ޓީމެވެ.

ހެންވޭރު ދަނޑުގައި މިއަދު ބޭއްވި ހަފުލާގައި މުބާރާތުގެ ދެ ކެޓަގަރީ ނުވަތަ ދެ ގްރޭޑްގެ ޗެމްޕިއަން ޓީމަށް ދޭ ތަށި ލޯންޗު ކުރަން ތަށި ގެނައި ބޮޑު ބެރުގެ ހަރަކާތަކާ އެކު އެވެ. މުބާރާތުގެ ރަސްމީ ލަވަ ލޯންޗު ކުރުމުގެ ގޮތުން އިމާދުއްދީން ސްކޫލްގެ ދަރިވަރުންތަކެއް ވަނީ ލަވަ އަށް ނަށައިފަ އެވެ.