އުތުރު ކޮރެއާ އަށް ކާނާގެ ދަތިކަން ބޮޑުވަނީ

މިދިޔަ އަހަރުތަކުގައި އުތުރު ކޮރެއާ އަށް ކުރިމަތިނުވާ މިންވަރަށް ކާނާގެ ދަތިކަން ކުރިމަތިވަމުން ދާ ކަމަށް ކަމާ ބެހޭ ތަޖުރިބާކާރުން އިންޒާރުކޮށްފި އެވެ.

ތަޖުރިބާކާރުން ބުނާ ގޮތުގައި އުތުރު ކޮރެއާގެ ދަނޑުވެރިކަމުގެ ސިނާއަތަށް ކުރިމަތިވެފައިވާ ހީނަރުކަމުގެ އިތުރުން، އެ ގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުންނާއި، ބޯޑަރުތައް ބަންދުކޮށްފައި އުތުމާއި މޫސުން ގޯސްވުމުގެ ސަބަބުން، މައްސަލަ ވަނީ އިތުރަށް ގޯސްވެފަ އެވެ. މި މައްސަލަ އަށް އަވަސް ހައްލެއް ހޯދުމުގެ ގޮތުން، އުތުރު ކޮރެއާގެ ކަމާ ބެހޭ އިސް ވެރިންގެ ބައްދަލުވުމެއް، މިމަސް ނިމޭހާ ތާނގައި ބާއްވައި، ދަނޑުވެރިކަމުގެ ސިޔާސަތަށް ގެންނަންޖެހޭ ބަދަލުތަކާ ބެހޭ ގޮތުން މަޝްވަރާ ކުރައްވާނެ އެވެ.

އުތުރު ކޮރެއާގެ ރަސްމީ ނޫސް އޭޖެންސީން ބުނި ގޮތުގައި މި ވަގުތު އެ ގައުމުން އެންމެ ބޮޑު އިސްކަމެއް ދެނީ، އެ ގައުމަށް ކުރިމަތިވެފައިވާ ކާނާގެ ދަތިކަމަށް ހައްލެއް ހޯދުމަށެވެ.

ކާނާގެ ދަތިކަން ކިތަންމެ ބޮޑުވެފައި ވިޔަސް، އުތުރު ކޮރެއާ ސަރުކާރުން މިހާރު ވެސް ގެންދަނީ، އެ ގައުމުގެ އަސްކަރީ ގާބިލުކަން އިތުރުކޮށް، ހުޅަނގުގެ ގައުމުތަކަށް އެކަން ސާބިތުކޮށްދޭން މަސައްކަތް ކުރަމުންނެވެ. އެ ގޮތުން މި މަހުގެ ކުރީކޮޅު ވެސް އުތުރު ކޮރެއާ އިން ވަނީ، އެ ގައުމުގައި އުފައްދާފައިވާ އިންޓަކޮންޓިނެންޓަލް ބެލިސްޓިކް މިސައިލްތަކެއް އާންމުކޮށް ދައްކައިލުމުގެ ހަރަކާތެއް ބާއްވައިފަ އެވެ.

އުތުރު ކޮރެއާ އަށް ކާނާގެ ދަތިކަން ކުރިމަތިވަމުން އަންނަ ކަމަށް، ދެކުނު ކޮރެއާގެ ޔުނިފިކޭޝަން މިނިސްޓްރީން ވެސް ދަނީ ދާދި ފަހުން ބުނެފަ އެވެ. އެހެންކަމުން، އެ މައްސަލަ ހައްލު ކުރުމުގައި އެހީތެރިވެދިނުމަށް ވޯލްޑް ފުޑް ޕްރޮގްރާމަށް އެ ގައުމުން ވަނީ ގޮވާލައިފަ އެވެ.

ދެކުނު ކޮރެއާގެ ސެޓެލައިޓްތަކުން ނަގާފައިވާ ފޮޓޯތަކާ ހަވާލާދީ އެ ގައުމުން ބުނި ގޮތުގައި އުތުރު ކޮރެއާގައި 2022 ވަނަ އަހަރު އުފެއްދި ގޮވާމުގެ މިންވަރު، 2021 ވަނަ އަހަރު އުފެއްދި ގޮވާމުގެ މިންވަރަށް ވުރެ ގާތްގަނޑަކަށް 180000 ޓަނު މަދެވެ.

ވޯލްޑް ފުޑް ޕްރޮގްރާމުން ބުނާ ގޮތުގައި އުތުރު ކޮރެއާ އަށް ކާނާގެ ދަތިކަން ކުރިމަތިވާ މައިގަނޑު ސަބަބަކީ، މޫސުމީ ގެއްލުންތަކުގެ ސަބަބުން އެކަށީގެންވާ ގޮތެއްގައި ދަނޑުވެރިކަން ނުކުރެވުމެވެ. ފިނި މޫސުމުގައި އާދަޔާ ޚިލާފަށް ބޯކޮށް ވާރޭ ވެހި ފެން ބޮޑުވުމުގެ ސަބަބުން، ދަނޑުތައް ހަލާކުވެ އެވެ. އަދި ހޫނު މޫސުމުގައި އާދަޔާ ޚިލާފަށް ހޫނު ގަދަވެ، ހަނަފަސްކަން ކުރިމަތިވުމުން ވެސް ދަނޑުވެރިކަމަށް ހުރަސްއެޅެ އެވެ.

އުތުރު ކޮރެއާގެ ރަސްމީ ނޫސް އޭޖެންސީން ބުނި ގޮތުގައި މިދިޔަ 2022 ވަނަ އަހަރަކީ އެ ގައުމުގެ ތާރީޚުގައި ވެސް އެންމެ ހޫނު ގަދަ އަދި ދެ ވަނަ އަށް އެންމެ ހަނަފަސް އަހަރެވެ.

ދަނޑުވެރިކަން ދަށް ވުމާ ގުޅިގެން، ކާބޯތަކެތީގެ އަގުތައް މިހާރު ދަނީ އުފުލެމުންނެވެ. މިދިޔަ އަހަރުގެ މެދުތެރޭގައި ހުރި އަގުތަކާ އަޅައި ބަލާއިރު، މިއަހަރު ފެށުނު އިރު ޒުވާރީގެ އަގު ވަނީ 20 ޕަސެންޓަށް އުފުލިފަ އެވެ. އުތުރު ކޮރެއާގެ ގިނަ މީހުންގެ މައިގަނޑު ކޮއްތަކީ ޒުވާރި ކަމަށް ވާތީ، ހަނޑުލުގެ އަގަށް ވުރެ ޒުވާރީގެ އަގު ވަނީ އުފުލިފަ އެވެ.

ކޮވިޑް-19 ބަލިމަޑުކަން ފެތުރެން ފެށުމާ ގުޅިގެން، އުތުރު ކޮރެއާ އިން ވަނީ 2020 ވަނަ އަހަރުގެ ޖެނުއަރީ މަހުން ފެށިގެން އެ ގައުމުގެ ބޯޑަރުތައް ބަންދުކޮށްފަ އެވެ. އެކަމާ ގުޅިގެން، އަވައްޓެރި އެއްވެސް ގައުމަކުން ވިޔަފާރި މުދާ އެތެރެކުރުން ވަނީ މުޅިން ހުއްޓިފަ އެވެ.