ޑްރަގާއެކު އައި ބިދޭސީ ފޮނުވާލި މައްސަލަ: ވިޕް ނެރުނީ "ނޯ" ޖަހަން، އެކަމަކު ފާސްވި!

މަސްތުވާތަކެއްޗާއެކު ރާއްޖެ އައި ބިދޭސީއަކު ފުރުވާލި މައްސަލާގައި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް މިއަދު ހުށަހެޅުއްވި ކުއްލި މައްސަލަ ބޭރު ކޮށްލުމަށް އެ ޕާޓީން ވިޕެއް ނެރެފައި ވަނިކޮށް، އެ މައްސަލަ މަޖިލިހުގައި ކުރިއަށް ގެންދަން މިއަދު ފާސްކޮށްފި އެވެ.

އެމްޑީޕީގެ އެތެރޭގެ ކޯޅުމުގައި އެ ޕާޓީގެ ރައީސް އަދި ރައްޔިތުންގެ މަޖިލިހުގެ ރައީސް މުހައްމަދު ނަޝީދާއެކު ހުންނެވި ހަސަން ލަތީފް ހުށަހެޅުއްވި ކުއްލި މައްސަލާގައި ގޮވާލާފައި ވަނީ ވައިގެ މަގުން ރާއްޖެ އަންނަ ބިދޭސީއަކު މަސްތުވާތަކެތި އެތެރެކުރަން އުޅޭ ކަމަށް ޝައްކު ކުރެވޭ ހާލަތުތަކުގައި އެ މީހަކާ މެދު އަމަލު ކުރާނެ ގޮތުގެ ގަވައިދުގައި ހުރި، މަސްތުވާތަކެއްޗާ ބެހޭ ގާނޫނުގައި ތައާރުޒުވާ ބައިތައް އުނި ކުރުމަށެވެ.

އެކަމާ ގުޅޭ ގޮތުން އެމްޑީޕީގެ ޕީޖީ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވަނީ ރަތަށް ފިތަން ވިޕެއް ނެރުއްވައިފަ އެވެ.

ސަބަބެއް ކަމުގައި އޭނާ ޕީޖީ ގްރޫޕްގެ ވަޓްސްއެޕް ގްރޫޕުގައި ވިދާޅުވީ، އެމްޑީޕީގެ މެމްބަރުން މަޖިލީހަށް މައްސަލަތައް ހުށަހަޅަން އަމަލު ކުރުމަށް އޮންނަ އާންމު އުސޫލާ ހިލާފަށް ހުށަހަޅާފައިވާ ކުއްލި މައްސަލައަކަށް ވާތީ ކަމަށެވެ.

މަޖިލީހުގެ މިއަދުގެ ޖަލްސާގައި ހަސަން އެ މައްސަލަ ހުށަހެޅުއްވުމުން، މައްސަލަ އަށް ބަހުސް ކުރަން ފެންނަ ކަމަށް 24 މެންބަރަކު ވޯޓު ދެއްވި އެވެ. ބަހުސް ކުރަން ނުފެންނަ ކަމަށް ވޯޓު ދެއްވީ 16 މެމްބަރެކެވެ. ވަކި ގޮތަކަށް ވޯޓު ދެއްވަން ނުފެންނަ ކަމަށް ވެސް އެއް މެމްބަރަކު ވޯޓު ދެއްވި އެވެ.

އެމްޑީޕީގެ ޕީޖީ ގުރޫޕްގެ ވިޕާ ދެކޮޅަށް ވޯޓު ދެއްވީ އެ ޕާޓީގެ އިސް ލީޑަރު އަދި ރައީސް އިބްރާހިމް މުހައްމަދު ސޯލިހަށް ތާއީދު ކުރާ ފެކްޝަންގެ މެމްބަރުންނެވެ. ހަސަންގެ ކުއްލި މައްސަލަ އަށް ބަހުސް ކުރަން ފާސްވީ، ނަޝީދުގެ ފެކްޝަންގެ މެމްބަރުންނާއި އިދިކޮޅު ޕީޕީއެމް/ޕީއެންސީގެ މެންބަރުންގެ ވޯޓާއެކު އެވެ.

މައްސަލަ ފާސްވުމާއެކު، ވާހަކަ ދައްކަވަމުން ހަސަން ވިދާޅުވީ އެމްޑީޕީގެ ޕީޖީން އެ މައްސަލަ ބޭރު ކޮށްލުމަށް ވިޕެއް ނެރެފައިވީ ނަމަވެސް ހަގީގަތުގައި ރާއްޖެ އަށް ދިމާވެފައިވާ މަސްތުވާތަކެތި ވިޔަފާރި ކުރުމުގެ މައްސަލަ ހައްލު ކުރުމަށް ބޭނުންވާ ގިނަ މެންބަރުންތަކެއް ތިއްބެވީތީ ޝުކުރު ދަންނަވާ ކަމަށެވެ.

ރާއްޖެ އަށް ޑްރަގް ވިޔަފާރި ޓްރެފިކް ކުރާ މީހުންނަށް ފިޔަވަޅު އެޅޭ ގޮތަށް ގަވައިދުތައް ބަދަލު ކުރުމަކީ ސަރުކާރުން ވެސް ކުރަން ޖެހޭ ކަމެއް ކަމަށާއި ނަމަވެސް ޕީޖީން ދެކޮޅަށް ވިޕެއް ނެރެފައި ވަނީ އޭނާގެ ފިކުރު ވަކި ގޮތަކަށް ހުރުމުން ކަމަށް ވެސް ހަސަން ވިދާޅުވި އެވެ.

އެމްޑީޕީ ނެރުނު ވިޕާ ދެކޮޅަށް ނަޝީދުގެ ފެކްޝަންގެ މެމްބަރުން ވޯޓު ދީފައިވާ އިރު އެންމެ ފަހުން ވިޕެއް ނެރުނު ޖީއެސްޓީ ބިލާ ދެކޮޅަށް ވޯޓު ދީގެން އެ ފެކްޝަންގެ މެންބަރުންނަށް އޮތީ ޕާޓީން ދޭ އިނާޔަތްތައް ކަނޑާލައި ފިޔަވަޅު އަޅައިފަ އެވެ.