ބާ އެގްޒާމަށް ފަހު ގާނޫނީ ދާއިރާގެ ޕްރޮގްރާމްތަކަށް ޑިމާންޑު ކުޑަވެއްޖެ

ބާ އެގްޒާމް ހަދައިގެން ނޫނީ ވަކީލުކަން ނުކުރެވޭ ގޮތަށް ގާނޫނު ހެދި ފަހުން ޝަރުއީ އަދި ގާނޫނީ ޕްރޮގްރާމްތަކަށް ޑިމާންޑް ދަށްވަމުން އަންނަ ކަމަށް ބައެއް ކޮލެޖް/ޔުނިވަސިޓީތަކުން ބުނެފި އެވެ.

މީގެ ހަތަރު އަހަރު ކުރިން ގާނޫނީ ފަންނުގެ ގާނޫނު ވުޖޫދުވުމުގެ ކުރިން ވަކީލުންގެ ޑިގްރީ ނިންމުމަށް ފަހު ލައިސެންސް ހޯދައި މަސައްކަތްކުރެވެ އެވެ. ނަމަވެސް، އެ ގާނޫނުގެ ދަށުން ވަކީލުކަމުގެ ލައިސެންސް ހޯދުމަށް އެއް އަހަރުގެ ތަޖުރިބާއާ އެކު، ބާ ކައުންސިލުން ދޭ އެގްޒާމްގައި ބައިވެރިވާން ޖެހެ އެވެ.

ވިލާ ކޮލެޖުގެ ވައިސް ރެކްޓާ ޑރ. އަލީ ނަޖީބު ވިދާޅުވީ އެ ކޮލެޖުގައި ހިންގާ ޔުނިވާސިޓީ އޮފް ދަ ވެސްޓް އޮފް އިންގްލެޑު (ޔޫވީ) ގެ ޑިގްރީ އާއި މާސްޓާސް އަދި ވިލާގެ އަމިއްލަ ޕްރޮގްރާމަށް ކުރިން ތަރުހީބު އޮންނަ ކަމަށެވެ. އެކަމަކު، ބާ އެގްޒާމް ހަދަންޖެހޭ ގޮތަށް ގާނޫނު ހެދުމުން އެންރޯލްމަންޓަށް ބަދަލުތައް އަންނަން ފެށި ކަމަށް އޭނާ ވިދާޅުވި އެވެ.

"އެއީ ވެސް އެއް ސަބަބު ކަމަށް ވެދާނެ ގާނޫނީ ދާއިރާގެ ކޯސްތަކަށް ޑިމާންޑު ކުޑަވާން ފެށި،" ނަޖީބު ވިދާޅުވި އެވެ.

އައިޔޫއެމްގެ ރަޖިސްޓްރާ އިބްރާހިމް ރައުފު ވިދާޅުވި ގޮތުގައި 2008 ވަނަ އަހަރު ފެށި ޝަރީއާ އެންޑް ލޯގެ ޑިގްރީ ކޯސްތަކަށް މި ފަހަކާ ޖެހެންދެން ބާރުބޮޑުވި އެވެ. ނަމަވެސް، ބާ ކައުންސިލަށް ފަހު ހިފެހެއްޓުންތަކެއް ހުރުމުން އެ ބަދަލުތައް އައުމުގެ ފުރުސަތު އެބައޮތް ކަމަށް އޭނާ ވިދާޅުވި އެވެ.

"ހީނަރުކަމެއް އެބަ އާދޭ ޝަރީއާގެ ކޯސްތަކަށް. މި ޔުނިވާސިޓީގައި ދޫނުކޮށްލާ ކަންތައްތަކެއް އެބަހުރި. މޮޑިއުލްތައް ވެސް ގިނަވާނެ. ކުރީގައި ޑިގްރީ ނިންމާފައި މަސައްކަތް އެބަ ކުރެވޭ. އެކަމަކު، މިހާރު އެއް އަހަރުގެ ތަޖުރިބާ އެބަ ބޭނުންވޭ. މި ހުރިހާ ކަމަކާއެކު ބަދަލުތައް އަންނަ ކަމަށް ގަބޫލުކުރެވެނީ." ރައުފް ވިދާޅުވި އެވެ.

އެމްއެންޔޫގެ ރަޖިސްޓްރާ މުހައްމަދު ލާމިރު ވިދާޅުވީ 2019 އާ ހިސާބަށް އެ ޔުނިވާސިޓީގައި އެންމެ ޑިމާންޑް ބޮޑު އެއް ކޯހަކީ ޝަރުއީ އަދި ގާނޫނީ ދާއިރާގެ ކޯސްތައް ކަމަށެވެ. އޭނާ ވިދާޅުވީ ބާ އެގްޒާމް ދޭން ފެށުމުގެ ކުރިން ވެސް އެ ކޯސްތަކަށް އޮތް ތަރުހީބު ކުޑަވާން ފެށިކަން ފާހަގަކުރެވޭ ކަމަށެވެ.

"ކުރީގައި ހެނދުނު ކްލާހަކާއި ރޭގަނޑު ދެ ކްލާސް ހިންގިން. އެކަމަކު، މި ފަހަރު ކިރިޔާ ކްލާހެއް ހިންގާ ވަރަށް ކުދިން ހަމަވީ." ލާމިރު ވިދާޅުވި އެވެ.

ގާނޫނަށް އަމަލުކުރާތާ ތިން އަހަރު ފަހުން ގާނޫނީ ފަންނުގެ ގާނޫނުގެ ދަށުން ފުރަތަމަ ބާ އެގްޒާމް ބޭއްވީ މިދިޔަ ނޮވެމްބަރު މަހުގެ ތެރޭގަ އެވެ. އެ އިމްތިހާނުގައި 176 މީހުން ބައިވެރިވިއިރު، އޭގެ ތެރެއިން 18 މީހަކު ވަނީ ޓޮޕް އެޗީވާސް ލިސްޓުގައި ހިމެނިފަ އެވެ. އެއީ، ގައުމީ ޔުނިވާސިޓީ އާއި މެލޭޝިއާގެ އިސްލާމިކް ޔުނިވާސިޓީ އާއި ވިލާ ކޮލެޖާއި އަދި ޔުނިވާސިޓީ އޮފް ލަންޑަންގެ ދަރިވަރުންނެވެ.