ފިނި ގަދަވެގެން އަފްޣާނުން 157 މީހުން މަރުވެއްޖެ

މިއަހަރުގެ ފިނި މޫސުމުގެ ފިނިކަން އާދަޔާ ޚިލާފަށް މައްޗަށް ދިއުމުގެ ސަބަބުން، މިހާތަނަށް މަދުވެގެން 157 މީހުން އެ ގައުމުން މަރުވެފައިވާ ކަމަށް، ވެރިކަން ކުރާ ތާލިބާން ޖަމާއަތުން ބުނެފި އެވެ.

އެ ގައުމުގެ ސަރުކާރުގެ އިދާރާތަކުންނާއި އާންމުން ބުނާ ގޮތުގައި މިހާރު އެމީހުން ތަޖުރިބާ ކުރަމުން ދަނީ، އެމީހުންގެ މުޅި ހަޔާތުގައި ވެސް ކުރިމަތިނުވާ ފަދަ ފިނި ކަމެކެވެ. ފިނި މޫސުމުގެ އެންމެ ފިނި ދުވަސްތައް މި މަހުގެ ކުރީކޮޅު ފެށުނު ފަހުން، ފިނީގެ ސަބަބުން މިދިޔަ ހަފުތާގެ ނިޔަލަށް އެ ގައުމުން މަރުވެފައިވަނީ 70 ވަރަކަށް މީހުންނެވެ.

ނަމަވެސް އޭގެ އެއް ހަފުތާ ފަހުން އެ އަދަދު ދެ ގުނަ އަށް އިތުރުވެ، މަރުވި މީހުންގެ އަދަދު ވަނީ 157 އަށް އަރައިފަ އެވެ. އަހަރުގެ މި ދުވަސްވަރު އަފްޣާނިސްތާނުގެ އެވްރެޖް ފިނިމިން ހުންނަނީ ސުން ދަރަޖަ އާއި މައިނަސް ފަސް ދަރަޖައިގަ އެވެ. ނަމަވެސް މި ދުވަސްވަރު އެ ގައުމުގެ ހުރިހާ ސަރަހައްދެއްގެ އެވްރެޖް ފިނިމިނަކީ، މައިނަސް 28 ދަރަޖަ ކަމަށް ރަސްމީ އިދާރާތަކުން ބުނެ އެވެ.

ހުޅަނގުގެ ގައުމުތަކުން އަފްޣާނިސްތާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުންނާއި، އެމެރިކާ އާއި ހުޅަނގުގެ ބައެއް ގައުމުތަކުގައި ހުރި އަފްޣާނިސްތާނު ސަރުކާރުގެ ފައިސާތައް އެ ގައުމުތަކުން ހިފަހައްޓާފައިވާތީ، އަފްޣާނިސްތާނުގެ ރައްޔިތުން މިހާރު ތިބީ ހާލުގައި ޖެހިފަ އެވެ. އެހެންކަމުން، ގަދަ ފިނިން ސަލާމަތްވުމަށްޓަކައި ކޮންމެހެން ބޭނުންވާ ހީޓަރާއި ރަޖާ ފަދަ ތަކެތި ހޯދުން ވަނީ ވަރަށް ބޮޑަށް ދަތިވެފަ އެވެ.

އެ ދަތިކަމުގެ ތެރޭގައި ގައުމު އޮއްވައި، އިންސާނީ އެހީތެރިކަން ފޯރުކޮށްދިނުމުގެ މަސައްކަތުގައި އަންހެނުން ބައިވެރިވުން، އަފްޣާނު ސަރުކާރުން މަނާކުރުމާ ގުޅިގެން، އިންސާނީ އެހީތެރިކަން ފޯރުކޮށްދިނުމުގެ މަސައްކަތަށް ވެސް ވަނީ ވަރަށް ބޮޑަށް ހުރަސް އެޅިފަ އެވެ. ތާލިބާން ސަރުކާރުގެ އެ ނިންމުމާ ގުޅިގެން، އެހީގެ މަސައްކަތުގައި އުޅުނު ބޭރުގެ ޖަމާއަތްތަކުގެ ތެރެއިން ދެބައިކުޅަ އެއްބައި ޖަމާއަތްތަކުން ވަނީ މަސައްކަތް ހުއްޓާލައިފަ އެވެ.

ތާލިބާން ސަރުކާރުގެ ތަރުޖަމާނު ޝަފީއުﷲ ރަހީމީ ބުނި ގޮތުގައި އެ ގައުމުގެ އެކި ސަރަހައްދުގައި އާންމު ރައްޔިތުން ގެންގުޅޭ ގެރިބަކަރި އާއި ކުކުޅު ފަދަ ތަކެތީގެ ތެރެއިން 70000 ޖަނަވާރު، ގަދަ ފިނީގެ ސަބަބުން ގަނޑުވެގެން މަރުވެއްޖެ އެވެ.

އދ.ގެ އިންސާނީ އެހީތެރިކަމާ ބެހޭ އދ.ގެ އިދާރާތަކުން ބުނާ ގޮތުގައި، އަފްޣާނިސްތާނު ރައްޔިތުންގެ ތެރެއިން މަދުވެގެން 28.3 މިލިއަން މީހުން މިހާރުވެސް ތިބީ، އިންސާނީ އެހީތެރިކަމަށް ވަރަށް ބޮޑަށް ބޭނުންޖެހިފަ އެވެ. އަދި، އަވަސް ގޮތެއްގައި އެހީތެރިކަން ފޯރުކޮށްނުދެވިއްޖެ ނަމަ، މިހާރު ކުރިމަތިވެފައިވާ ފިނީގެ ސަބަބުން އެތައް ބައެއް ފުރާނަ ގެއްލިދާނެ ކަމުގެ ބިރު އެބަ އޮތެވެ.