އެންމެ ފިނި ސަހަރު، މައިނަސް 50 ދަރަޖައިގައި

ދުނިޔޭގެ ކޮންމެ ސަރަހައްދެއްގައި ވެސް ފިނި މޫސުމުގައި، އާދަޔާ ޚިލާފަށް ފިނިވުމަކީ، މިހާރަކަށް އައިސް އާންމު ކަމެކެވެ. ނަމަވެސް އެއްވެސް ސަރަހައްދެއްގައި ފިނިމިން މައިނަސް 50 ދަރަޖައިގައި މީހުން ދިރިއުޅެމުންދާ ކަމަށް މަދު ބަޔަކު ނޫނީ ގަބޫލެއް ނުކުރެ އެވެ.

ރަޝިޔާގެ ސަރަހައްދެއް ކަމަށްވާ އިރުމަތީ ސައިބީރިއާއަކީ، އާންމުން ދިރިއުޅޭ ތަންތަނުގެ ތެރެއިން، މުޅި ދުނިޔޭގެ ނިސްބަތުން ވެސް އެންމެ ފިނި ގަދަ އެއް ސަރަހައްދަށް ވާނެ އެވެ. ދުނިޔޭގެ އެންމެ ފިނި ސަހަރުގެ ގޮތުގައި ބެލެވޭ އިރުމަތީ ސައިބީރިއާގެ ޔަކުޓްސްކްގައި މި ދުވަސްވަރު ފިނިހޫނުމިން ހުރީ މައިނަސް 50 ދަރަޖައިގަ އެވެ.

އާންމު ގޮތެއްގައި ވެސް ކޮންމެ އަހަރެއްގެ ފިނި މޫސުން ގިނަ ދުވަސްތަކަކަށް ދެމިގެން ދާއިރު، ކޮންމެ އަހަރެއްގެ ވެސް ޖެނުއަރީ މަހަކީ އެންމެ ފިނި ދުވަސްވަރެވެ. އެ ސަހަރުގެ ވެސް ރަށްފުށު ސަރަހައްދުގައި މިދުވަސްވަރު އާންމުން ތަޖުރިބާކުރަމުން ދަނީ، އެހެން އަހަރުތަކާ ޚިލާފަށް މާ ގަދަ ފިންޏެއް ކަމަށް އެ ސަރަހައްދުގެ މީހުން ބުނެ އެވެ.

ޔަކުޓްސްކްގައި މިދުވަސްވަރު އާންމުން މަގުތަކަށް ނުކުމެ އުޅުމަކީ އެހާ އާންމު ކަމެއް ނޫނެވެ. ބޭރަށް ނުކުމެ އުޅޭއިރު ވެސް، އަތަށް ދެތިން އަންގި، ފަޔަށް ވެސް ބޯ ދެތިން އިސްޓާކީނު ލައްވައި، މަތިމައްޗަށް ދެ ޖެކެޓް ލައިގެން ނުކުތުމަކީ އާންމު ކަމެކެވެ.

"މި ފިންޏާ ދެކޮޅަށް އެކަކަށް ވެސް ހަނގުރާމައެއް ނުކުރެވޭނެ. އެއް ގޮތަކީ މި މޫސުމާ ގުޅޭ ގޮތުން ހެދުން އަޅައިގެން މި މޫސުމަށް ހޭނުން. އަނެއް ގޮތަކީ، މިގަދަ ފިނީގެ ތެރޭގައި ހަލާކުވެގެން ދިއުން. އަހަރެމެން މިއުޅެނީ ކެބެޖެއްގެ ގޮތަށް، ފަށަލަތަކަކަށް މަތިމައްޗަށް ހެދުންތައް ލައިގެން،" ޔަކުޓްސްކްގައި ދިރިއުޅޭ އެކަކު ބުންޏެވެ.

އޭނާ ބުނި ގޮތުގައި ބޭރަށް ނުކުމެ އުޅޭއިރު، އެންމެ އުނދަގޫވާ އެއް ކަމަކީ، ގަދަ ފިނީގެ ސަބަބުން ލޮލުގެ އެސްފިޔަތައް ގަނޑުވާން ފެށުމެވެ. އެ ސަރަހައްދުގައި މިލިއަނެއްހާ މީހުން ދިރިއުޅޭ އިރު، އެމީހުން ގަބޫލުކުރަނީ، އަލިފާން ރޯކޮށްގެން ފިނިން ސަލާމަތްވާ އުޅުމުގެ އިތުރުން، ފިނި ހެދުން ލައިގެން މޫސުމަށް ހޭނުން މާ މުހިންމެވެ.