އިދިކޮޅު ޕާޓީން ބައިޑެންގެ ސަރުކާރު ތަހުގީގުކުރަނީ

އެމެރިކާގެ މައި އިދިކޮޅު ޕާޓީއާ ދެކޮޅަށް، އެމެރިކާގެ މިހާރުގެ ރައީސް ޖޯ ބައިޑެން އޭނާގެ ސަރުކާރު ހަތިޔާރެއްގެ ގޮތުގައި ބޭނުންކުރާ ކަމަށް ތުހުމަތުކޮށް، އެ މައްސަލަ ތަހުގީގުކުރުމަށް އެ ގައުމުގެ ގާނޫނު ހަދާ މަޖިލީހުން އިއްޔެ ފާސްކޮށްފި އެވެ.

މި މަހުގެ ދެ ވަނަ ދުވަހު ފެށި، އެމެރިކާގެ ގާނޫނު ހަދާ މަޖިލީހުގެ ތިރިގޭގެ އާ ދައުރާއެކު އިދިކޮޅު ރިޕަބްލިކަން ޕާޓީ އަށް ތިރިގޭގެ އަޣުލަބިއްޔަތު ލިބުމުން، އެންމެ ފުރަތަމަ ވެސް ސަރުކާރާ ދެކޮޅަށް ތަހުގީގެއް ހިންގަން ފާސްކުރުމުން، ވެރިކަން ކުރާ ޑިމޮކްރެޓުން ވަނީ ނުރުހުން ފާޅުކޮށްފަ އެވެ. ނަމަވެސް އިދިކޮޅު ރިޕަބްލިކަން ޕާޓީން ބުނި ގޮތުގައި، ސަރުކާރުގެ ތަހުގީގީ އިދާރާތަކުން އެމެރިކާގެ ކުރީގެ ރައީސް، ރިޕަބްލިކަން ޕާޓީގެ ޑޮނަލްޑް ޓްރަމްޕާ ދެކޮޅަށް ކުރަމުންދާ ތަހުގީގުތަކުގެ މައްސަލައިގައި، އެ ޕާޓީގެ މެޖޯރިޓީ ބޭނުންކޮށްގެން އެ އިދާރާތައް ޒިންމާދާރު ކުރުވާނެ އެވެ.

އެ ގޮތުން އެމެރިކާގެ އަދުލު އިންސާފާ ބެހޭ ވުޒާރާ އާއި ތަހުގީގުތަކާ ބެހޭ މަރުކަޒީ އިދާރާ (އެފްބީއައި) އާއި މަރުކަޒީ ސަރުކާރުގެ އެހެން އިދާރާތަކާ ދެކޮޅަށް ވެސް، މަޖިލީހުގެ މެޖޯރިޓީ ބޭނުންކުރާނެ ކަމަށް ރިޕަބްލިކަން ޕާޓީން ބުންޏެވެ. އެ އިދާރާތަކުން މިހާރު ތަހުގީގު ކުރަމުން ދަނީ، ރައީސް ޓްރަމްޕުގެ ވެރިކަމުގެ އެންމެ ފަހު ދުވަސްކޮޅު، އޭނާގެ ސަޕޯޓަރުން ގާނޫނު ހަދާ މަޖިލީހުގެ އިމާރާތަށް ވަދެގަނެ ހިންގި ހަމަނުޖެހުންތަކުގެ މައްސަލަތަކެވެ.

އެކަމާ ދެކޮޅަށް އެ ޕާޓީން އިއްޔެ ނިންމީ، ހަތިޔާރެއްގެ ގޮތުގައި މަރުކަޒީ ސަރުކާރުގެ އިދާރާތައް ބޭނުންކުރާ މައްސަލަ ބެލުމަށް، މަޖިލީހުގެ ކުޑަ ކޮމިޓީއެއް ނަގައިގެން އެކަން ތަހުގީގު ކުރުމަށެވެ. އެ ކޮމިޓީ އުފެއްދުމަށް ފަހު، ރައީސް ބައިޑެންގެ ސަރުކާރުގައި ހިމެނޭ ގިނަ އިދާރާތަކެއްގެ މައްސަލަތައް ތަހުގީގު ކުރާނެ ކަމަށް ރިޕަބްލިކަން ޕާޓީން ބުންޏެވެ.

ރައީސް ބައިޑެންގެ ސަރުކާރާ ދެކޮޅަށް ތަހުގީގެއް ހިންގަން އިދިކޮޅު ޕާޓީން ނިންމި އިރު، ބައިޑެން އެ މަގާމަށް ވަޑައިގަތުމުގެ ކުރިން އަމިއްލަ އޮފީހެއްގެ ގޮތުގައި ބޭނުންކުރެއްވި އިމާރާތެއްގެ ތެރެއިން، އެމެރިކާ ސަރުކާރުގެ ރަސްމީ ސިއްރު ލިޔުންތަކެއް ފެނުނު މައްސަލައެއް މިހާރު ވަނީ ފެންމަތިވެފަ އެވެ. ތަހުގީގީ އިދާރާތަކުން އެ މައްސަލަ މިހާރު ތަހުގީގު ކުރަމުން އަންނަ އިރު، ކުރީގެ ރައީސް ޓްރަމްޕުގެ އަމިއްލަ ގެކޮޅުގައި ވެސް އެފަދަ ލިޔުންތަކެއް ރައްކާކޮށްފައި ހުރި މައްސަލައެއް، ކަމާ ބެހޭ އިދާރާތަކުން ގެންދަނީ ތަހުގީގު ކުރަމުންނެވެ.

ރައީސް ބައިޑެންގެ ގާނޫނީ ވަކީލަކު ވިދާޅުވި ގޮތުގައި، ބައިޑެންގެ އޮފީހުން ސިއްރު ލިޔުންތަކެއް ފެނުނީ، އަމިއްލަ އޮފީހެއްގެ ގޮތުގައި ބޭނުންކުރުމަށް ވޮޝިންޓަނުން ކުއްޔަށް ހިފާފައި ހުރި އިމާރާތެއްގެ އޮފީސް ޖާގައެއް އެތަނުގެ ވެރިފަރާތާ ހަވާލުކުރުމަށްޓަކައި، ގާނޫނީ ވަކީލުންގެ ޓީމުން އެތަން ހުސްކުރަން އުޅެނިކޮށެވެ. މިދިޔަ ނޮވެމްބަރު މަހުގެ ތެރޭގައި އެ ތަނުން ފެނުނު ސިއްރު ލިޔުންތަކަކީ، އެމެރިކާގެ ނައިބު ރައީސްކަމުގެ މަގާމުގައި ބައިޑެން ހުންނެވި ދުވަސްވަރުގެ ލިޔުންތަކެއް ކަމަށް ވެސް އޭނާގެ ވަކީލުން ވިދާޅުވެ އެވެ.

އެ ލިޔުންތައް ފެނުމާއެކު، އެކަން އެމެރިކާގެ ބަންޑާރަ ނައިބުގެ ސަމާލުކަމަށް ގެނައި ކަމަށް ގާނޫނީ ވަކީލުން ވިދާޅުވެ އެވެ. ކަމުގެ ހަގީގަތް އެނގޭ ބައެއް މަސްދަރުތަކާ ހަވާލާދީ އެމެރިކާގެ ނޫސްތަކުން ބުނެފައިވާ ގޮތުގައި، މި މައްސަލަ ތަހުގީގު ކުރުމަށް، އެމެރިކާގެ ބަންޑާރަ ނައިބު މެރިކް ގާލޭންޑް މިހާރު ވަނީ ޝިކާގޯގެ ބަންޑާރަ ނައިބަށް އަންގަވައިފަ އެވެ.