ދައުރު ހަމަވެގެން އަލީ ހާލިދު ޕީއެސްއެމުން ވަކިވެއްޖެ

ހަތަރު އަހަރުގެ ދައުރު ހަމަވުމުން ޕަބްލިކް ސާވިސް މީޑިއާ (ޕީއެސްއެމް)ގެ މެނޭޖިން ޑިރެކްޓަރު އަލީ ހާލިދު އިއްޔެ އެ މަގާމުން ވަކިވެވަޑައިގެންފި އެވެ.

ޕްރައިވަޓައިޒޭޝަން ބޯޑުގެ ރައީސް އާސިމް މުހައްމަދު "މިހާރު" އަށް ވިދާޅުވީ އަލީ ހާލިދުގެ އިތުރުން ޕީއެސްއެމްގެ ޑެޕިއުޓީ މެނޭޖިން ޑިރެކްޓަރު މުހައްމަދު ޝަމީމް ވެސް އޭނާގެ ދައުރު ހަމަވުމުން މިއަދު މަގާމުން ވަކިވެވަޑައިގެންފައިވާ ކަމަށެވެ.

ޕީއެސްއެމްގެ ގާނޫނުގައިވާ ގޮތުން އެ ކުންފުނީގެ ބޯޑަށް މެމްބަރުން އައްޔަންކުރެވޭނީ ހަތަރު އަހަރުގެ ދައުރަކަށެވެ. އެ ކުންފުނީގެ ބޯޑުގައި ފަސް މެމްބަރުން ތިއްބަވަ އެވެ.

އާސިމް ވިދާޅުވިގޮތުގައި، އަލީ ހާލިދާއި ޝަމީމްގެ ދައުރު ހަމަވިޔަސް، ހުސްވި މަގާމުތަކަށް މީހުން އައްޔަންކުރަން އެ ކުންފުނީގެ ހިއްސާދާރު، ސަރުކާރުން އަދި އެދިފައެއް ނުވެ އެވެ.

"މުއްދަތު ހަމަވާކަން ރައީސް އޮފީހަށް ވެސް އަންގާފައިވާނެ. އެކަމަކު އަދި އެ މަގާމަށް ބަޔަކު އައްޔަންކުރަން ނާންގާނާ،" އޭނާ ވިދާޅުވި އެވެ.

މެނޭޖިން ޑިރެކްޓަރު ކަމުން އަލީ ހާލިދު ވަކިވުމުން މިހާރު ޕީއެސްއެމްގެ އިސްވެރިއެއްގެ ގޮތުގައި ހުންނެވީ އެ ކުންފުނީގެ ޕްރޮކިއުމަންޓް މެނޭޖަރު މުހައްމަދު ސައީދެވެ.