ތިންވަނަ ޑިވިޝަންގެ ތަށި ލެގޫންސް އަށް

ފައިނަލުގައި މަސްއޮޑި ސްޕޯޓްސް ކްލަބްގެ މައްޗަށް 2-1 ނަތީޖާ އަކުން ކާމިޔާބު ހޯދައި، އެފްއޭއެމް ތިންވަނަ ޑިވިޝަން ފުޓްބޯޅަ މުބާރާތުގެ ޗެމްޕިއަންކަން ލެގޫންސް ސްޕޯޓްސް ކްލަބުން ހޯދައިފި އެވެ.

ގައުމީ ފުޓްބޯޅަ ދަނޑުގައި ރޭ ކުޅުނު ފައިނަލު މެޗަށް ދެ ޓީމު ވެސް ދަތުރު ކުރީ ކުޅުނު ހުރިހާ މެޗެއް ވެސް ކާމިޔާބު ކޮށްގެންނެވެ. ފައިނަލުގެ ޖާގަ ކަށަވަރު ކުރުމުން ލެގޫން އާއި މަސްއޮޑި ވަނީ ދެވަނަ ޑިވިޝަނަށް ކޮލިފައި ވެފަ އެވެ.

ދެ ޓީމުގެ ކުރިމަތިލުމުގައި ފުރަތަމަ ލީޑް ނެގީ ވެސް ލެގޫންސްއިންނެވެ. އެ ލަނޑު މެޗުގެ 24 ވަނަ މިނެޓްގައި ޖެހީ މުހައްމަދު ޝިފާން މުހައްމަދު ނަޒީރު އެވެ.

މެޗުގެ އަނެއް ދެ ލެނޑު ވެސް ފެނުނީ ދެވަނަ ހާފުގެ ފަހުކޮޅުގަ އެވެ. ޝިފާން ވަނީ އަނެއކާ ވެސް ލަނޑެއް ޖަހައިދީ ލީޑް ފުޅާކޮށްފަ އެވެ. މަސްއޮޑި އަށް ވީ ވަރަކީ މެޗުގެ އިތުރު ވަގުތުގެ ދެވަނަ މިނެޓްގައި ސުން ކަނޑުވާލުމެވެ. އެ ޓީމުގެ ލަނޑު ޖެހީ ހުސައިން ޝަރީފް އެވެ.

މުބާރާތުގެ މޮޅު ކުޅުންތެރިޔަކަށް ހޮވުނީ ލެގޫންސް އަށް ކުޅުނު ސްރީ ލަންކާގެ މިޑްފީލްޑާ މުހައްމަދު އަމާން މުހައްމަދު ފައިޒާ އެވެ. އެންމެ މޮޅު ގޯލް ކީޕަރަކަށް ހޮވުނީ ލެގޫންސްގެ ޖިނާހް ހާރޫން އެވެ. މުބާރާތުގެ ފެއާޕްލޭ ޓީމަކީ، އަނަކީ ސްޕޯޓްސް ކްލަބެވެ.