އެެއްވެ އުޅުމުގެ ހައްގު ހަނިކުރި މައްސަލަ މަޖިލީހުގައި އޮތުމުން ކޯޓަކަށް އެ މައްސަލަ ނުބެލޭނެ: ދައުލަތް

އެއްވެ އުޅުމުގެ މިނިވަންކަން ހަނިކުރެވޭ ގޮތަށް ގާނޫނުގައި އޮތް އޮތުން އުވާލަން ރައްޔިތުންގެ މަޖިލީހަށް ބިލެއް ހުށަހަޅާފައިވާތީ، ގާނޫނުގެ އެ ބައި ބާތިލްކުރުމުގެ މައްސަލަ ހައި ކޯޓުން ނުބަލަން ދައުލަތުން ކޯޓުގައި މިއަދު އެދެފި އެވެ.

އެއްވެ އުޅުމުގެ ގާނޫނަށް 2016 ވަނަ އަހަރު ގެނައި އިސްލާހުގައިވާ ގޮތުން މާލޭގައި ހުއްދަ ހޯދުމެއް ނެތި އެއްވެވޭނީ ސަރުކާރުން ކަނޑައަޅާ ތަންތަނުގައި އެކަންޏެވެ. ސަރުކާރުން ކަނޑައަޅާފައިވަނީ ހުއްދަ ހޯދުމެއް ނެތި އެއްވެވޭނީ މާލޭގެ ކާނިވާ ސަރަހައްދުގައި ކަމަށެވެ.

ގާނޫނުގެ އެ މާއްދާ ބާތިލްކުރަން ހައި ކޯޓަށް ދުސްތޫރީ މައްސަލައެއް ހުށަހެޅީ އަހުމަދު އަޒާނާއި ޝިފްޒާން އަހުމަދުގެ އިތުރުން އަހުމަދު އިބްރާހިމްގެ ފަރާތުންނެވެ.

ހައި ކޯޓުގައި މިއަދު ބޭއްވި އަޑުއެހުމުގައި ދައުލަތުން ބުނީ އެއްވެ އުޅުން ހަނިކުރި އިސްލާހު އުވާލުމުގެ ބިލް މަޖިލީހުން ބަލައިގަނެ، މިހާރު ދިރާސާ ކުރަމުންދާތީ ގާނޫނުގެ އެ ބައި ބާތިލްކުރުމުގެ މައްސަލަ މިވަގުތު ކޯޓުން ބެލުމުގެ ބޭނުމެއް ނެތް ކަމަށެވެ.

މައްސަލަ ހުށަހެޅި ތިން ފަރާތުގެ ވަކީލް ވިދާޅުވީ މަޖިލީހަށް ބިލެއް ހުށަހަޅާފައި އޮތުމުން ކޯޓަށް މައްސަލަ ނުބެލޭނެ ކަމަށް ބަލާނަމަ، އަސާސީ ހައްގުތައް ނިގުޅައިގަތުމުގެ ފުރުސަތު ލިބޭނެ ކަމަށެވެ. އެގޮތުން ކޮންމެ ހައްގެއް ހަނިކުރުމަށްފަހު އަނެއްކާވެސް މަޖިލީހަށް ބިލެއް ހުށަހެޅުމަށްފަހު ކޯޓަށް މައްސަލަ ނުބެލޭނެ ކަމަށް ބުނުމުގެ ފުރުސަތު އޮންނާނެ ކަމަށް ވަކީލް ވިދާޅުވި އެވެ.

އޭނާ ވިދާޅުވި ގޮތުގައި މަޖިލީހުން އެގޮތަށް ބިލް ފާސްކުރަން ނުފެންނަ ކަމަށް ކުރިން ނިންމާފައިވުމުގެ އިތުރުން ސަރުކާރުގެ އިސް ބޭފުޅުން މަޖިލީހުގައި ދައްކާފައިވާ ވާހަކަތަކުން ވެސް އެ އިސްލާހު އުވާނުލުމުގެ ވިސްނުން އޮތްކަން އެނގޭ ކަމަށެވެ.

އޭނާ ވިދާޅުވީ މަޖިލީހުގައި ކޮންމެ ގޮތަކަށް މިހާރު ބިލް އޮތަސް، ގާނޫނު އޮތްގޮތުން އެއްވެ އުޅުމުގެ ހައްގު ހަނިވެފައިވާ ކަމަށާއި އަދި އެއްވާ މީހުން ހައްޔަރު ވެސް ކުރާ ކަމަށް އޭނާ ވިދާޅުވި އެވެ. އަދި މިހާތަނަށް ވެސް އެ ހައްގު ހަނިކޮށްފައި އޮތީ ރަނގަޅަށް ކަން ދައުލަތަށް ބުނެ ނުދެވޭ ކަމަށް އޭނާ ވިދާޅުވި އެވެ.

ފަނޑިޔާރުންގެ ގިނަ ސުވާލުތަކެއް ހުރުމުން އެ މައްސަލާގެ އިތުރު އަޑުއެހުމެއް ފަހުން ބާއްވާނެ ކަމަށް އެ މައްސަލަ ބައްލަވާ ބެންޗުން އިއުލާން ކުރެއްވި އެވެ.

ހައި ކޯޓުން އެ މައްސަލަ ބައްލަވަނީ ފަސް ފަނޑިޔާރުންގެ ބެންޗަކުންނެވެ. އެއީ ފަނޑިޔާރު ދީބާނާޒް ފަހުމީ އާއި ފަނޑިޔާރު މުހައްމަދު ނިޔާޒާއި ފަނޑިޔާރު މުހައްމަދު ފައިސަލާއި ފަނޑިޔާރު ހަސަން ޝަފީއު އާއި ފަނޑިޔާރު މުހައްމަދު ސަލީމެވެ.