ޓެކްސް ބިލުގެ މައްސަލާގައި އިދިކޮޅުން މުޒާހަރާ އަށް

ދައުލަތުގެ އާމްދަނީ އިތުރު ކުރުމަށް ޖީއެސްޓީ އާއި ޓީޖީއެސްޓީ ބޮޑު ކުރަން ސަރުކާރުން ހުށަހެޅި ބިލާ ދެކޮޅަށް އިދިކޮޅު ޕީޕިއެމް/ޕީއެންސީ ކޯލިޝަނުން މުޒާހަރާ އަށް މިއަދު ނުކުމެއްޖެ އެވެ.

އެ ކޯލިޝަންގެ މަދު ބައިވެރިންތަކެއް މެންދުރު ފަހު ރައްޔިތުންގެ މަޖިލިސް ކައިރިއަށް އެއްވެ، ޓެކްސް ބިލު ފާސްނުކުރުމަށް ދަނީ ގޮވާލަމުންނެވެ. އެ ސަރަހައްދުގައި ހަރަކާތްތެރިވާ ފުލުހުން ވަނީ އެ މުޒާހަރާގެ ބައިވެރިން މަޖިލިސްކުރާ ގެއާ ދުރަށް ޖައްސައިފަ އެވެ. އަދި ތިން މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ.

މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް ސަރުކާރުން ފަރާތުން އިހަވަންދޫ ދާއިރާގެ މެމްބަރު މުހައްމަދު ޝިފާއު ހުށަހެޅީ ޖީއެސްޓީ އަށް ޕަސެންޓަށް އަދި ޓީޖީއެސްޓީ 16 ޕަސެންޓަށް ބޮޑުކުރުމަށެވެ.

މިދިޔަ ހަފުތާގައި މަޖިލީހުގެ ކޮމެޓީން ފާސްކުރި އެ ބިލުގެ މަޖިލީހުގެ ތަޅުމަށް މިއަދު ހުށަހަޅަން ވަނީ ނިންމައިފަ އެވެ.

ޓެކްސް ބޮޑުކުރާ ބިލާ ގުޅިގެން މަޖިލިސް މެމްބަރުންގެ މެދުގައި ވެސް ގިނަ ދެބަސްވުންތަކެއް ވެސް ހިނގި އެވެ.

މަޖިލީހުގެ ބައެއް މެމްބަރުން ބުނެފައި ވަނީ ޓެކްސް ބޮޑުކުރުމަކީ ރައްޔިތުންގެ ބަހެއް ނެތި ކުރެވޭނެ ކަމެއް ނޫން ކަމަށެވެ. އެކަމަކު ސަރުކާރުން ބުނަނީ ޓެކްސް ބޮޑުނުކޮށް ގައުމު ހިންގެން ނެތް ކަމަށެވެ. ސަބަބަކީ ދައުލަތުގެ ހަރަދުތައް އިންތިހާ އަށް ބޮޑުވުމެވެ. އޭގެ ޖަވާބުގައި މަޖިލީހުގެ މެމްބަރުން ބުނަމުން އަންނަނީ ދައުލަތުގެ ހަރަދު ކުޑަކޮށްގެން ހަރަދުތައް ހަމަޖެއްސުމަށެވެ.