ޕީޕީއެމާއި ޑިމޮކްރެޓްސް އެކުގައި މުޒާހަރާއަށް!

ކުރީގެ ރައީސް އަބްދުﷲ ޔާމީން މިނިވަންކުރަން ގޮވާލައި އިދިކޮޅު ޕީޕީއެމާއި ޕީއެންސީން ބާއްވާ މުޒާހަރާތަކުގައި އެމްޑީޕީން ވަކިވެ އަލަށް އުފައްދަން އުޅޭ ޕާޓީ، ޑިމޮކްރެޓްސް އިން ބައިވެރިވާން ފަށައިފި އެވެ.

އާޓިފިޝަލް ބީޗު ސަރަހައްދުގައި ހުންނަ ޕީޕީއެމްގެ އޮފީސް ދޮރުމަތީގައި ސިލްސިލާކޮށް އެ ޕާޓީން މުޒާހަރާތައް ބާއްވަ އެވެ. އެކަމަކު މިދިޔަ ދެ ރޭ ޕީޕީއެމުން ވަނީ ހަމަ އެ މަގުގައި ހުންނަ އެމްޑީޕީގެ ކުރީގެ ހަރުގެ އަދި މިހާރު ޑިމޮކްރެޓްސްގެ ހަރުގެ ދޮށަށް އެއްވެ، އެ ހަރަކާތުގެ މީހުންނާ އެކު މުޒާހަރާތަކުގައި ބައިވެރިވެފަ އެވެ.

ލަވަ ޖަހައި ސަރުކާރާ ދެކޮޅަށް އަޑުއުފުލައި ނެށުން ވެސް އެ ސަރަހައްދުގައި އޮވެ އެވެ.

ސިޔާސީ ޕާޓީއެއްގެ ގޮތުގައި ޑިމޮކްރެޓްސް އުފެއްދުމުގެ ހުއްދަ އިލެކްޝަންސް ކޮމިޝަނުން އަދި ނުދިން ނަމަވެސް، އެ ހަރަތާކުގެ ބައިވެރިން އަންނަނީ ސިޔާސީ ހަރަކާތްތައް ފުޅާކުރަމުންނެވެ. އެ ހަރަކާތުން ވެސް ސިލްސިލާކޮށް ކޮންމެ ރެއަކު މިހާރު ޖަގަހަ ޖަލްސާތަކާއި އެއްވުންތައް ބާއްވަ އެވެ.

ރޭގެ މުޒާހަރާގައި އާންމުންނާއި ފުލުހުންގެ މެދުގައި ހިނގި ކުރިމަތިލުންތަކުގައި ބައެއް މީހުންނަށް ވަނީ އަނިޔާ ވެފަ އެވެ.

ފުލުހުން ބުނި ގޮތުގައި އެ މުޒާހަރާ އިން ހަ މީހުން ހައްޔަރުކުރި އެވެ. އޭގެތެރެއިން އެކަކު ވަނީ ރޭ ދޫކޮށްލައިފަ އެވެ.

ޕީޕީއެމް އިން ބުނި ގޮތުގައި، ރޭގައި ސުލްހަވެރިކޮށް އިދިކޮޅުން ކުރަމުން ދިޔަ މުޒާހަރާ ފުލުހުން ރޫޅާލައި ބައެއް މީހުންނަށް އަނިޔާކުރި އެވެ. އެ ޕާޓީގެ މެމްބަރު އަދި ފަރެސްމާތޮޑާ ދާއިރާގެ މަޖިލިސް މެމްބަރު ހުސެއިން މުހައްމަދު ލަތީފުގެ މޫނާއި އަނގަޔަށް ޕެޕަ ސްޕްރޭ ޖެހުމުގެ ސަބަބުން ނޭވާލާން އުނދަގޫވެގެން އޭޑީކޭގައި ފަރުވާދޭން ޖެހުނު ކަމަށް އެ ޕާޓީން ބުންޏެވެ.

މުޒާހަރާގައި ބައިވެރިވި އާންމުންނަށް ވެސް ފުލުހުން ވަރަށް ބޮޑަށް އަނިޔާކުރި ކަމަށް އިދިކޮޅުން ބުންޏެވެ.