ޝިމާޒާ މެދު ގޮތެއް ނިންމަންވާނީ ފުރިހަމަ ތަހުގީގަކަށްފަހު: އެމްއާރުއެމް

ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު ޝިމާޒް އަލީއަށް ކުރެވޭ ތުހުމަތުތައް ކަމާބެހޭ އިދާރާތަކުން ބެލުމަށްފަހު ނޫނީ އެކަމުގައި ގޮތެއް ނިންމުމަކީ ރަނގަޅު ގޮތެއް ނޫން ކަމަށް އެމްއާރުއެމްއިން ބުނެފި އެވެ.

އެމްއާރުއެމްގެ ސްލޮޓެއްގައި ހުންނެވި ޝިމާޒްގެ މައްޗަށް ކޮރަޕްޝަންގެ ތުހުމަތުތަކެއްކޮށް، އޭނާ މަގާމުން ވަކިކުރަން ޓްރާންސްޕޯޓް މިނިސްޓަރު އައިޝަތު ނަހުލާ ރައީސް އޮފީހަށް ސިޓީ ފޮނުއްވާފައިވާ ކަމުގެ އަޑުތަކެއް ވަނީ ފެތުރިފަ އެވެ. އެކަމަކު ސަރުކާރުން އެކަން ކަށަވަރުކޮށެއް ނުދެ އެވެ.

އެކަމާ ގުޅިގެން އެމްއާރުއެމްއިން މިރޭ ނެރުނު ބަޔާނެއްގައިވަނީ އެ ޕާޓީއަކީ ކޮރަޕްޝަނާ ދެކޮޅަށް އަބަދުވެސް ވަކާލާތުކުރާ ޕާޓީއެއް ކަމަށާއި އެކަމަކު ޝިމާޒްގެ މައްސަލާގައި ގޮތެއް ނިންމަން ވާނީ ކަމާބެހޭ މުއައްސަސާތަކުން އެކަށީގެންވާ ތަހުގީގެއް ހިންގުމަށްފަހު ކަމަށް އެ ބަޔާނުގައިވެ އެވެ.

އެ މައްސަލާގައި ބޮޑެތި ތުހުމަތުތަކެއް ކުރެވޭއިރު، އެކަމުގައި ދެން ބައިވެރިވާ ފަރާތްތަކާއި އެކަމުގެ ބޮޑުކަން ވެސް ދެނެގަނެވޭނީ ފުރިހަމަ ތަހުގީގަކަށްފަހު ކަމަށް އެ ބަޔާނުގައިވެ އެވެ. އަދި ޝިމާޒާ މެދު ޕާޓީން ގޮތެއް ނިންމާނީ އޭނާއަށް ޖަވާބުދާރީވާން ފުރުސަތު ދިނުމަށްފަހު ކަމަށް ވެސް އެ ބަޔާނުގައިވެ އެވެ.

ޓްރާންސްޕޯޓް މިނިސްޓްރީ ތެރެއިން ގަވާއިދާ ޚިލާފަށް އުޅަނދުތައް ރަޖިސްޓްރީ ކުރުމުގެ މައްސަލަތަކެއް ދާދިފަހުން ފެންމަތިކޮށް، ބައެއް އުޅަނދުތަކުގެ ރަޖިސްޓްރީ ވެސް އެ މިނިސްޓްރީން ދާދިފަހުން ބާތިލްކުރި އެވެ. އެކަމަކު ކޯޓުން ވަނީ އޭގެ ތެެރެއިން ބައެއް އިއުލާންތަކަށް އަމަލުކުރުން ހުއްޓުވައިފަ އެވެ.