ގުޖުރާތުގެ ބްރިޖް ވެއްޓުނު ހާދިސާއާ ގުޅިގެން 9 މީހަކު ހައްޔަރުކޮށްފި

އިންޑިއާގެ ހުޅަނގު ސްޓޭޓެއް ކަމަށްވާ ގުޖުރާތުގެ މޯރްބީ އަވަށުގައި ކޯރެއްގެ މަތިން އަޅާފައި އޮތް އެލުވާ ބްރިޖެއް، މިދިޔަ ހޯމަ ވިލޭރޭ ކަނޑައިގެން ވެއްޓި 134 މީހަކު މަރުވި ހާދިސާއާ ގުޅިގެން، ނުވަ މީހަކު ހައްޔަރުކޮށް މައްސަލަ ތަހުގީގު ކުރަން ފަށައިފި އެވެ.

އިންޑިއާގެ ނޫސްތައް ބުނާ ގޮތުން، މި ހާދިސާގެ ތުހުމަތުގައި ހައްޔަރުކުރި އެންމެންނަކީ ވެސް، އެ ބްރިޖު މަރާމާތުކުރުމުގެ މަސައްކަތް ކުރި، އޮރޭވާ ގްރޫޕް (އަޖަންތާ މެނުފެކްޗަރިން)އާ ގުޅުން ހުރި މީހުންނެވެ. އިންޑިއާގެ ކަމާ ބެހޭ އިދާރާތަކުން ބުނި ގޮތުގައި ބްރިޖު މި ވެއްޓުނީ، މަރާމާތު ކުރުމަށް މީގެ ހަތް މަސް ކުރިން ބަންދުކުރުމަށް ފަހު، މަރާމާތުކޮށް ނިމިގެން އަލުން ބޭނުންކުރަން ފެށިތާ މާ ގިނަ ދުވަހެއް ނުވަނީހެވެ. މަރާމާތު ކުރުމަށް ފަހު އަލުން ބްރިޖު ހުޅުވީ މި މަހުގެ 26 ވަނަ ދުވަހު އެވެ.

ގުޖުރާތުގެ ފުލުހުން ބުނި ގޮތުގައި މި މައްސަލައާ ގުޅިގެން ހައްޔަރު ކުރި ނުވަ މީހުންގެ ތެރޭގައި ހިމެނެނީ އޮރޭވާ ގްރޫޕްގައި މަސައްކަތް ކުރާ މެނޭޖަރުންގެ ދެ މީހަކާއި ޓިކެޓް ވިއްކުމުގެ މަސައްކަތް ކުރާ ދެ ކާތިބަކާއި ދެ ކޮންޓްރެކްޓަރުންނާއި ސަލާމަތީ ފާރަވެރިންގެ ތިން މީހެކެވެ. އެމީހުންގެ މައްޗަށް ތަހުގީގު ހިންގަމުން ދަނީ ގަސްދުގައި މީހަކު މަރުވެދާ ފަދަ އަމަލެއް ކުރުމުގެ ތުހުމަތުގަ އެވެ.

ފުލުހުން މި މައްސަލަ ތަހުގީގު ކުރަމުން ދަނީ އެކަމަށް ޚާއްޞަ ޓީމެއް އެކުލަވާލައިގެންނެވެ. ބްރިޖު ވެއްޓުނު ހާދިސާގައި 134 މީހަކު މަރުވި އިރު އޭގެ ތެރޭގައި 30 ކުޑަކުދިން ވެސް ހިމެނެ އެވެ. ބްރިޖު ވެއްޓުނީ އާދީއްތަ ދުވަހުގެ ހަވީރުން ފެށިގެން، އެ ސަރަހައްދަށް އެތައް ހާސް ބަޔަކު އެއްވެ، ދިވާލީ ފާހަގަކުރުމުގެ ހަރަކާތްތައް ހިންގުމުގެ ތެރޭގަ އެވެ.

ސޯޝަލް މީޑިއާގައި އާންމުވެފައިވާ ވީޑިއޯތަކުން ފެންނަ ގޮތުގައި، ކޯރުގެ ދެ އައްސޭރީގައި ދެ ތަނބު ޖަހައި އެދެ ތަނބަށް ލަނބުރާނު ޖަހައިގެން އެލުވާފައި އޮތް ބްރިޖް ވެއްޓުނީ، އެއް ފަހަރާ ގިނަ އަދަދެއްގެ ބަޔަކު ބްރިޖަށް އަރައި ދެ ފަރާތަށް ބްރިޖް ހެއްލަން ފެށުމާ އެކުގަ އެވެ. ހިނގާ މީހުން ބޭނުންކުރުމަށް ހާއްސަ މި ބްރިޖަކީ 230 މީޓަރު ދިގު އަދި ފުޅާމިނުގައި އެންމެ ދޮޅު މީޓަރު ހުންނަ ބްރިޖެކެވެ.

ގުޖުރާތު ސަރުކާރުން ބުނި ގޮތުގައި، 15 އަހަރުގެ މުއްދަތަށް ބްރިޖު މަރާމާތުކޮށް ބެލެހެއްޓުމުގެ މަސައްކަތް އެ ސަރަހައްދުގެ މުނިސިޕަލްޓީގެ ފަރާތުން މިދިޔަ މާޗް މަހު ހަވާލުކުރީ އޮރޭވާ ގްރޫޕް (އަޖަންތާ މެނުފެކްޗަރިން)އާ އެވެ. ނަމަވެސް މަރާމާތުކޮށް ނިންމައި އާންމުންނަށް ހުޅުވައިލި އިރު، އެ ކުންފުނީގެ ފަރާތުން އެކަން ނާންގާ ކަމަށް މުނިސިޕަލްޓީގެ ޗީފް އޮފިސަރު ސަންދީޕްސިންހް ޒާލާ ވިދާޅުވި އެވެ. އެހެންކަމުން، ބްރިޖު ބޭނުންކުރަން ފެށުމުގެ ކުރިން، ބްރިޖުގެ ސަލާމަތީ ކަންތައް ހުރި މިންވަރު ނުބެލޭ ކަމަށް މުނިސިޕަލްޓީން ބުންޏެވެ.

މި އެލުވާ ބްރިޖަކީ އިނގިރޭސި އިސްތިއުމާރުގެ ދުވަސްވަރު، މީގެ ގާތްގަނޑަކަށް 150 އަހަރު ކުރިން ބިނާކޮށްފައިވާ ބްރިޖެކެވެ. އެ ދުވަސްވަރު މިފަދަ ބްރިޖެއް އިންޑިއާގައި ބިނާކުރުމުން، މި ބްރިޖް ވެފައިވަނީ ގުޖުރާތަށް ޒިޔާރަތްކުރާ ޓޫރިސްޓުންގެ މެދުގައި ވަރަށް މަގުބޫލު ސަރަހައްދަކަށެވެ.