ތިން ވަނަ ކުއާޓާގައި ބީއެމްއެލް އަށް 367 މިލިއަން ރުފިޔާގެ ސާފު ފައިދާ

މި އަހަރުގެ ތިން ވަނަ ކުއާޓާގައި ބޭންކް އޮފް މޯލްޑިވްސް (ބީއެމްއެލް) އަށް ސާފު ފައިދާގެ ގޮތުގައި 367 މިލިއަން ރުފިޔާ ލިބިއްޖެ އެވެ.

ބީއެމްއެލް އިން އިއްޔެ އާންމުކުރި ރިޕޯޓުގައި ވާގޮތުން، ހިންގުމުގެ ފައިދާގެ ގޮތުގައި އެ ބޭންކަށް ލިބިފައިވަނީ 694 މިލިއަން ރުފިޔާ އެވެ. އެއީ ދެވަނަ ކުއާޓާއާ އަޅާބަލާއިރު 17 ޕަސެންޓުގެ އިތުރުވުމެކެވެ.

މިއީ ވިޔަފާރީގެ މައިގަނޑު ހުރިހާ ދާއިރާއަކުން ވެސް ކުރިއެރުން ލިބުމާ އެކު ރަނގަޅު ލޯން ޕޯޓްފޯލިއޯއެއް ދެމެހެއްޓުމުން ކަމަށް ބީއެމްއެލް އިން ބުންޏެވެ. ބޭންކުގެ ރައުސްމާލާއި ލިކުއިޑިޓީ ރޭޝިއޯ ގާނޫނުން ލާޒިމްކުރާ މިންވަރަށް މަތީގައި ހިފެހެއްޓިފައިވާ ކަމަށާއި މި އަހަރު ނިންމާލާނީ ރަނގަޅު ނަތީޖާއަކުން ކަމަށް ލަފާކުރެވޭ ކަމަށް ވެސް އެ ބޭންކުން ބުންޏެވެ.

ބީއެމްއެލްގެ ސީއީއޯ ކާލް ސްޓުމްކައާ ހަވާލާދީ ބޭންކުން ބުނީ ތިން ވަނަ ކުއާޓަރުގައި ގައުމީ ބޭންކުން ހަރުދަނާ މާލީ ނަތީޖާއެއް ހާސިލްކޮށްފައިވާ ކަމަށެވެ.

"ކަސްޓަމަރުންނަށް ދޭ ހިދުމަތުގެ ފެންވަރު ރަނގަޅުކުރުމާއި ދިވެހި ރައްޔިތުންނަށް އެހީވުމާއި ދިވެހިން ހިޔާރުކުރާ ބޭންކުގެ ގޮތުގައި ދެމިއޮތުމަށް އަލުގަނޑުމެން ނުހަނު ބުރަކޮށް މަސައްކަތްކުރަމުންދާނަން،" ކާލް ވިދާޅުވި އެވެ.

ބީއެމްއެލް އަށް ވަނީ މިދިޔަ އަހަރު ސާފު ފައިދާގެ ގޮތުގައި 1.7 ބިލިއަން ރުފިޔާ ލިބިފަ އެވެ. އެ އަހަރުގެ ޖުމްލަ އާމްދަނީގެ ގޮތުގައި 3.8 ބިލިއަން ރުފިޔާ ލިބުނެވެ. މިދިޔަ އަހަރު އެ ބޭންކުން ކޮށްފައިވާ، 3.8 ބިލިއަން ރުފިޔާގެ ވިޔަފާރި އަކީ، އޭގެ ކުރީ އަހަރަށް ވުރެ ގާތްގަނޑަކަށް 60 ޕަސެންޓް އިތުރު އަދަދެކެވެ.

ބީއެމްއެލްގެ ޒަމާނީ ބޭންކިން ވިއުގަތަކާ އެކު ރާއްޖޭގެ 20 އަތޮޅުގައި 35 ބްރާންޗާއި، 82 ސެލްފްސާވިސް ބޭންކިން ސެންޓަރާއި، 140 އޭޓީއެމް އާއި 7،900 ޕޮއިންޓް އޮފް ސޭލް މާޗަންޓުންގެ އިތުރުން 200 އަށް ވުރެ ގިނަ ކޭޝް އޭޖެންޓުން ތިބެ އެވެ.