ކާބޯތަކެތީގެ ދުވަސް ފާހަގަކުރަން "ވެލްނަސް މެޓާސް"އިން ހަދިޔާ ކުރީ 41،000 އޮށް

ވެލްނަސް މެޓާސް އިން މި އަހަރުގެ ކާބޯތަކީގެ ދުވަސް ފާހަގަކުރަން ހަދިޔާކުރި 41،000 އަށް ވުރެ ގިނަ އޮށް 42 ރަށެއްގައި އިންދައިފި އެވެ.

އެ ޖަމާއަތުން ހިންގާ "ޕްލާންޓް އަ ޓްރީ" ޕްރޮޖެކްޓްގެ ދަށުން ދުނިޔޭގެ ކާބޯތަކެތީގެ ދުވަސް ފާހަގަކުރުމަށް މިއަދު ވަނީ ގަސް އިންދުމުގެ ހާއްސަ ޕްރޮގްރާމެއް ހިންގައިފަ އެވެ.

ވެލްނަސް މެޓާސް އިން ބުނީ، އެ ހަރަކާތުގައި 20 އަތޮޅަކުން 42 ރަށެއްގައި ގަސް އިންދި ކަމަށެވެ. ވަރަށް ބޮޑު ތަރުހީބެއް ލިބުނު ހަރަކާތުގައި 345 އާންމުންނާއި 32 ސްކޫލަކާއި ހަތް އިންސްޓިޓިއުޝަނަކުން ބައިވެރިވި ކަމަށް ބުންޏެވެ. ސްކޫލުތަކުގެ ވަރަށް ގިނަ ކުދިންގެ ހިއްސާ ވެސް ލިބުނު ކަމަށް ވެލްނަސް މެޓާސް އިން ބުންޏެވެ.

އެ ޖަމާއަތުން ބުނިގޮތުގައި ގަސް އިންދުމަށް ހަދިޔާކުރި 41،000 އޮށް އެކި ފަރާތްތަކުން 415 ޕެޗުގައި އިންދި އެވެ. އެއީ މުޅިން ވެސް ތަރުކާރީއާއި މޭވާ އަޅާ ގަސްތަކުގެ އޮށެވެ.

ވެލްނަސް މެޓާސްއިން ފާހަގަ ކުރިގޮތުގައި ނ. މަނަދޫން އެ ހަރަކާތަށް ހާއްސަ އެއްބާރުލުމެއް ލިބުނެވެ. އެ ރަށުގެ 300 ގޭބީސީގައި ގަސް އިންދުމުގެ ހަރަކާތް ކުރިއަށް ގެންދެ އެވެ.

"އެޑިއުކޭޝަން މިނިސްޓްރީ އާއި ޖެންޑާ މިނިސްޓްރީ އާއި އެލްޖީއޭގެ ވަަރަށް ބޮޑު އެއްބާރުލުމަކާއެކު އަޅުގަނޑުމެންނަށް މިކަން ކުރެވުނީ،" ވެލްނަސް މެޓާސްގެ ފަރާތުން މިރުފަތު ފާއިޒު ވިދާޅުވި އެވެ.

އެ ހަރަކާތުގައި ސްކޫލުތައް ބައިވެރި ކުރުމަށް އެޑިއުކޭޝަން މިނިސްޓްރީން ދިން އެއްބާރުލުން މިރުފަތު ހާއްސަކޮށް ފާހަގަކުރެއްވި އެވެ. އަދި ހަރަކާތް ފެށުމުގެ ރަސްމިއްޔާތު ޝަރަފުވެރިކޮށްދެއްވި ޑެޕިއުޓީ މިނިސްޓަރު ޝާމާ ނަސީރަށް ޝުކުރުއަދާކުރެއްވި އެވެ.

ވެލްނަސް މެޓާސް އަކީ ދުޅަހެޔޮ ސިއްހަތެއްގައި ހުންނެވުމަށް ފައުންޑަރު ޒުލްފާ ނަސީރު މެލޭޝިއާގައި ބައިވެރިވެވަޑައިގެންނެވި ޕްރޮގްރާމެއްގައި އޭނާގެ ހަށިގަނޑަށް އައި ހެޔޮ ބަދަލާ ހެދި އާއިލާގެ މީހުންނަށާއި ރައްޓެހިންނަށް އެ ބަދަލު ގެނައުމަށް މީގެ ފަސް އަހަރު ކުރިން އުފެއްދި ޖަމާއަތަކެވެ.

ވެލްނަސް މެޓާސްގެ ހަރަކާތްތަކުގެ ތެރޭގައި 21 ޑޭ ފިޓްނަސް ޗެލެންޖު ފާހަގަކޮށްލެވެ އެވެ. އޭގެ އިތުރުން ވެސް އެކިއެކި އިޖުތިމާއީ ޒިންމާގެ ހަރަކާތްތައް އެ ޖަމާއަތުން ހިންގަ އެވެ.