އެންމެފަހުގެ ރަނަރަފް ނޭޕާލް ބަލިކޮށް ރާއްޖެއަށް ފެށުން ކާމިޔާބު

ރާއްޖޭގައި މިރޭ ފެށި ދެކުނު އޭޝިއާގެ އަންހެން ބާސްކެޓް ބޯޅަ މުބާރާތުގައި، އެންމެ ފަހުގެ ރަނަރަފް ނޭޕާލް ބަލިކޮށް ރާއްޖެއިން އިތުބާރާއެކު މުބާރާތް ފަށައިފި އެވެ.

ރާއްޖެއިން މެޗު ކާމިޔާބު ކުރީ 51-47 ންނެވެ. މިއީ ރާއްޖޭގެ އަންހެން ބާސްކެޓްގައި ނޭޕާލްގެ މައްޗަށް ރާއްޖެއިން ހޯދި ފުރަތަމަ މޮޅެވެ.

ފުރަތަމަ ކުއާޓާ ފެށުނީން ސުރެ ރާއްޖެއިން ކުޅެމުން ދިޔައީ ހަލުވި ގޭމެކެވެ. އެހެން ކަމުން ކުއާޓާގެ ފަހުކޮޅަށް ދިޔައިރު ކުޅުންތެރިން ވަރުބަލި ވެފައިތަން ފެނުނެވެ. ވަރަށް ހަމަހަމަ ކޮށް ދިޔަ މެޗު ފުރަތަމަ ކުއާޓާގެ ފަހު ވަގުތު ރާއްޖެއަށް ފްރީ ތުރޯއެއް ލިބުނެވެ. އެކަމަކު އާމިނަތު ޝިއުރާ ފޮނުވާލި ފްރީ ތުރޯ ކާމިޔާބެއް ނުވި އެވެ.

ކުއާޓާގެ ފަހު ވަގުތުު ކޯޓުގެ މެދެއްހާ ހިސާބުގައި ހުރެ އާމިނަތު އިސްރާއު ވަނީ ދުރުން ބާރު ބޯޅައެއް އެއްލައި ރާއްޖެ އަށް ތިން ޕޮއިންޓް ސްކޯ ކޮށްދީ ދެ ޕޮއިންޓްގެ ލީޑެއް ނަގައިދީފަ އެވެ. ފުރަތަމަ ކުއާޓާގައި ނޭޕާލުގެ ކެޕްޓަން ޝުރެސްތާ ވަނީ އޭނާގެ ތަޖުރިބާ ބޭނުން ކޮށްގެން ކުޅެން މަސައްކަތް ކޮށްފަ އެވެ. ނޭޕާލަށް ގިނަ ޕޮއިންޓްތަކެއް ހޯދައި ދިނުމުގައި އޭނާގެ ދައުރު ބޮޑެވެ.

ދެވަނަ ކުއާޓާގެ ފުރަތަމަ ތިން މިނެޓް ނިމިގެން ދިޔަ އިރު ވެސް ދެ ޓީމުން ކުރެ ޓީމަކަށް ސްކޯއެއް ނުކުރެވުނެވެ. އެ ކުއާޓާގެ ފުރަތަމަ ޕޮއިންޓް ސްކޯ ރާއްޖެ އަށް ހޯދައި ދިނީ ޝިއުރާ އެވެ. ރާއްޖެ އަށް ލިބުނު ފްރީ ތުރޯ ރިޝްމާ ދެ ފަހަރު މަތިން ފޮނުވާލުމުން ވެސް ކާމިޔާބެއް ނުވި އެވެ. ދެވަނަ ފަހަރަށް ފޮނުވަލި ފްރީ ތުރޯ ހޫކްސްގައި ޖެހި ރީބައުންސް ވުމުން ބޯޅަ ހޯދައި ޝިއުރާ ވަނީ ދެވަނަ ކުއާތާގެ ފުރަތަމަ ޕޮއިންޓް ސްކޯ ކޮށްފަ އެވެ.

އެ ކުއާޓާގައި ރާއްޖެއިން ގިނަ ހަމަލާތަކެއް ބާސްކެޓަށް އަމާޒުކޮށް ފޮނުވާލި ނަމަވެސް ގިނަ ބޯޅަތައް ބާސްކެޓްގެ އެތެރެއަށް ވައްޓައެއް ނުލެވުނެވެ. އެ ކުއާޓާ ރާއްޖެއިން ނިންމާލީ އެއް ޕޮއިންޓްގެ ލީޑަކާ އެކު 25-24 ންނެވެ.

ތިންވަނަ ކުއާޓާގައި ނޭޕާލުން ތަފާތު ދެއްކި އެވެ. އެ ކުއާޓާ އަކީ މުޅި މެޗުގައި ވެސް ނޭޕާލުން ލީޑްގައި އޮވެ ނިންމާލި ހަމަ އެކަނި ކުއާޓާ އެވެ. އެ ކުއާޓާ ނޭޕާލުން ނިންމާލީ 36-34 ޕޮއިންޓުން ކުރީގައި އޮވެގެންނެވެ. ތިންވަނަ ކުއާޓާގައި ދިވެހި ޓީމުގެ އިސްރާއު ވަނީ މޮޅު ކުޅުމެއް ދައްކައިފަ އެވެ. ރާއްޖެ ފަރަގު ކުޑަ ކޮށްދިނުމުގައި އޭނާ މުހިންމު ޕޮއިންޓްތަކެއް ސްކޯ ކުރި އެވެ. އެ ކުއާޓާގައި ރާއްޖޭގެ ފްރީ ތުރޯތައް ފޮނުވާލީ އޭނާ އިތުރު ޕޮއިންޓްތަކެއް ވެސް ރާއްޖެ އަށް ހޯދައިދިނެވެ.\

ފަހު ކުއާޓާގައި ސޯޝަލް ސެންޓަރުގައި ހުރި އިލެކްޓޯރޯނިކް ސްކޯ ބޯޑުން ކަރަންޓް ކެނޑުމުން ކުއާޓާގެ ވަކި ހިސާބަކުން މެޗު މެދުކަނޑާލައި ފަސް މިނެޓަށް ހާއިރަށް ބްރޭކެއް ނެގި އެވެ. މެޗު ބްރޭކް ނެގުމުގެ ކުރިން ނޭޕާލުން ލީޑްގައި އޮތީ 40-36 ންނެވެ. ލިބުނު ބްރޭކުގައި ވަރު ބަލިވެފައި ތިބި ދެ ޓީމުގެ ކުޅުންތެރިންނަށް ވެސް ރެސްޓް ކޮށްލަން ފުރުސަތު ލިބުނެވެ.

އެ ކުއާޓާގައި ރާއްޖޭގެ އެންމެ ތަޖުރިބާކާރު ކުޅުންތެރިޔާ ޝީއުރާގެ ކަކުލަށް ލިބުނު އަނިޔާއާ ގުޅިގެން ޓީމާ ވަކިވާން ޖެހުނެވެ. އެކަމަކު އެ ވަގުތު ކޯޓގުގައި ތިބި ދިވެހި ކުޅުންތެރިން ވަނީ ހިތްވަރުކޮށް ނޭޕާލްގެ މައްޗަށް ލީޑް ނަގައިފަ އެވެ. ރާއްޖެ އަށް ލީޑް ނަގައިދިނުމުގައި އެންމެ މުހިންމު ދައުރެއް އަދާ ކުރީ ރިޝްމާ އެވެ. އޭނާ ވަނީ އޭނާގެ ތަޖުރިބާ ބޭނުން ކޮށްގެން ގިނަ ޕޮއިންޓްތަކެއް ހޯދަން މަގުފަހި ކޮށްދީފަ އެވެ.

މާދަމާ ރޭ ކުޅޭ މެޗުގައި ވާދަ ކުރާނީ އެންމެ ފަހުގެ ޗެމްޕިއަން ސްރީ ލަންކާ އާއި ބޫޓާން އެވެ. އެ މެޗު ވެސް ފަށާނީ 8:30 ގަ އެވެ.