ޖަލުތަކުގެ ހާލަތު ބެލުމުން ފިޔަވަޅުތައް އެޅުން އަވަސްވެގެންދާނެ ކަމަށް ގަބޫލުކުރެވޭ: ޝަމީމް

ޖަލުތަކުގެ ހާލަތު ބެލުމަށް ހުރިހާ ޕްރޮސެކިއުޓަރުން ޖަލަށް ވަޑައިގަތުމުން، މަސައްކަތަށް އިތުރަށް ފަރުވާތެރިވެ ފިޔަވަޅުތައް އެޅުން އަވަސްވެގެންދާނެ ކަމަށް ގަބޫލުކުރައްވާ ކަމަށް ޕްރޮސެކިއުޓާ ޖެނެރަލް ހުސެއިން ޝަމީމް އިއްޔެ ވިދާޅުވެއްޖެ އެވެ.

ރައްޔިތުންގެ މަޖިލީހުގެ ޖުޑީޝަރީ ކޮމިޓީގައި، ފޮނަދޫ ދާއިރާގެ މެމްބަރު މޫސާ ސިރާޖު ކުރެއްވި ސުވާލަކާ ގުޅިގެން ޝަމީމް ވިދާޅުވީ ދައުލަތުގެ ވަރަށް ގިނަ ވަކީލުންނަށް ޖަލުގެ ހާލަތު އިހުސާސްނުވާ ކަމަށެވެ. އެހެންވެ، ޕީޖީ އޮފީހުގެ އިސް މުވައްޒަފުންނާއި ދައުލަތުގެ ވަކީލުންނާއެކު، ޖަލުތަކަށް ޒިޔާރަތްކުރަން އަންނަ މަހު ޕްރޮގްރާމެއް ފަށާނެ ކަމަށް އޭނާ ވިދާޅުވި އެވެ.

"އަޅުގަނޑު ގަބޫލުކުރަން ވަރަށް ގިނަ ޕްރޮސެކިއުޓަރުންނަށް ޖަލުގެ އިހުސާސެއް ނުވޭ. އަޅުގަނޑު ކަން ދިމާވި ގޮތުން ބައެއް މީހުންގެ ވަކީލެއް ގޮތަށް މަސައްކަތްކޮށްފައި ހުރީމަ ކޮންމެ ވެސް ވަރަކަށް ޝަރީއަތް ނިމެންދެން ބަންދުކޮށްފައި ހުރީމަ ވާ ގޮތާއި ހުކުމް ތަންފީޒުކުރަން ދިޔައީމަ ވާ ގޮތް އިނގޭ،" ޝަމީމް ވިދާޅުވި އެވެ.

"އަޅުގަނޑުމެން މި އަންނަ މަހު ތައާރަފްކުރަން ޕްރޮގްރާމެއް ހުރިހާ ޕްރޮސެކިއުޓަރުން ޖަލަށް ވަޑައިގަންނަން. ހުރިހާ ޕްރޮސެކިއުޓަރުންނާއި ޕީޖީ އޮފީހުގެ ސީނިއާ ހުރިހާ މުވައްޒަފުން، ޖަލުގައި ޝަރީއަތް ނިމެންދެން ބަންދުކޮށްފައި ތިބޭ މީހުން ތިބޭ ތަނަށް ވެސް ޒިޔާރަތްކޮށް އެތަން ހިނގާ ގޮތް ބަލައި އެކަން ދިރާސާކުރަން ފީލްޑް ޓްރިޕެއް ގޮތަށް ހުރިހާ ބޭފުޅުން ވަޑައިގަންނަވާނެ."

އޭނާ ވިދާޅުވީ އެ ޕްރޮގްރާމާ އެކު މަސައްކަތަށް ކުރިއަށް ވުރެ ބޮޑަށް ފަރުވާތެރިވެ، އެ ވާހަކަތައް ގަބޫލުކޮށް ފިޔަވަޅުތައް އެޅުން އަވަސްވެގެންދާނެ ކަމަށެވެ.

ޝަރީއަތް ނިމެންދެން ބަންދުގައި ތިބި ދެ މީހަކު މި ފަހުން މަރުވި ހާދިސާއާ ގުޅިގެން ޝަމީމް ވިދާޅުވީ އެ ދެ މީހުން މަރުވުމުގައި ޕީޖީން ކުރަންޖެހޭ ކަމެއް ކޮށްފައި ނެތް ކަމަށެވެ.

ނަމަވެސް، އެފަދަ ކަމެއް ތަކުރާރުނުވާނެ ގޮތް ހަދައި މައްސަލަ ހައްލުކުރަން ކުރާ ކަމަކީ ޖަލަށް ޒިޔާރަތްކުރުންކަން ޕީޖީ ފާހަގަކުރެއްވި އެވެ.