ނަބީހު އަށް ސައުދީ އިސްލާމިކް އެފެއާޒްގެ ތައުރީފް، މައިންބަފައިން ފަހުރުވެރިވެފައި

އަލްހާފިޒް އަހްމަދު ނަބީހުގެ ގުރުއާން ކިޔެވުމާއި ބަންގި ގޮވުން އަޑުއެެއްސެވުމަށް ފަހު ސައުދީ އަރަބިއްޔާގެ އިސްލާމިކް އެފެއާޒްގެ ބޭފުޅުން ތައުރީފް ކުރައްވައިފި އެވެ.

ސިވިއާ އޯޓިޒަމް ހުންނަ ނަބީހު ވަނީ ސައުދީ އަރަބިއްޔާގެ ރަސްގެފާނު ކިންގް އަބްދުލްއަޒީޒްގެ ހަނދާނުގައި ބާއްވާ ބައިނަލްއަގުވާމީ ގުރުއާން މުބާރާތުގެ ފައިނަލު ރައުންޑުގައި ކިޔަވައިފަ އެވެ. މިއީ ރާއްޖޭގެ ބައިވެރިއަކު މި މުބާރާތުގައި މިފަދަ ކާމިޔާބީއެއް ފަހުގެ ތާރީހެއްގައި ހޯދި ހަމައެކަނި ފަހަރެވެ.

ނަބީހުގެ މަންމަ، އައިމިނަތު މުހައްމަދު މިއަދު "މިހާރު" އަށް ބުނީ ސައުދީގެ އިސްލާމިކް އެފެއާޒްގެ ބޭފުޅުން ނަބީހު ވަކިން ހޯއްދަވައިގެން ގެންދަވައި ވަރަށް ގިނަ ވާހަކަ ދެއްކެވި ކަމަށެވެ. އެ ގޮތުން، ނަބީހު ގުރުއާން ދަސްކުރި ގޮތާއި އޭނާ ހާފިޒަކަށް ހެދުމަށް ކުރި މަސައްކަތް އެއްސެވި ކަމަށް އައިމިނަތު ބުންޏެވެ.

"އެ ބޭފުޅުން ވެސް ހަމަ ހައިރާން ވި އެނގޭތޯ. ނަބީހުއަކީ އަދި އެކި ރާގުރާގަށް ކިޔަވާ ކުއްޖެއްކަން އެނގުނީމަ ވިދާޅުވީ ހަމަ ބުނާނެ އެއްޗެއް ވެސް ނެތޭ. ދެން ވިދާޅުވީ ނަބީހު އެންމެ ގަޔާވާ ދެ ޝެއިހުންގެ ރާގަށް ކިޔަވާލާށޭ. ބުނީމަ ނަބީހު ކިޔެވީ ސުދައިސް އާއި މިޝާރީގެ ރާގަށް. ކިޔަވާލީމަ ބުނީ އެ ބޭފުޅުންނޯ ތީ ހަމަ،" ނަބީހުގެ މަންމަ ކިޔައިދިނެވެ.

ނަބީހުގެ ބަންގި ވެސް އެ ގައުމުގެ އިސްލާމިކް އެފެއާޒްގެ ބޭފުޅުން ރިކޯޑް ކުރެއްވި ކަމަށް އައިމިނަތު ކިޔައިދިނެވެ. އަދި ނަބީހުގެ ބަންގިއަށް ވެސް ވަރަށް ބޮޑަށް ތައުރީފް ކުރެއްވި ކަމަށް އޭނާ ބުންޏެވެ.

"އެ ބޭފުޅުން ވިދާޅުވީ ހަމަ ހަރަންފުޅު ތެރޭގައި ތިބެވުނުހެންނޭ ހީވަނީ،" އައިމިނަތު ބުންޏެވެ.

މި މުބާރާތަށް ނަބީހުއާއެކު ފުރަތަަމަ ދާން އޮތީ އޭނާގެ ބައްޕަ އަބްދުލްގާދިރު އެކަންޏެވެ. އެހެން ނަމަވެސް، އޭނާއަކީ ނުހިނގޭ މީހަކަށް ވާތީ ނަބީހުގެ މަންމައަށް ވެސް ދާން ފުރުސަތު ދިނީ އެވެ. ސައުދީގެ އިސްލާމިކް އެފެއާޒުން ނަބީހުގެ މަންމަ އާއި ބައްޕަގެ އިންޓަވިއު ވެސް ނެގި އެވެ.

"އަޅުގަނޑު ދެންނެވިން ނަބީހުގެ ޑްރީމްއެކޭ މައްކާއަށް އައުމަކީ އަބަދުވެސް. ބުނީމަ ވިދާޅުވި ހައްޖު ދަތުރެއް ވެސް އިރާދަކުރެއްވިއްޔާ ހަމަޖައްސައިދޭނަމޭ."

ނަބީހުގެ އާއިލާއިން މިހާރު އިންތިޒާރުކޮށްގެން އެ ތިބީ ފައިނަލް ރައުންޑުގެ ނަތީޖާ ފާޅުކުރާނެ ދުވަހަށެވެ. ފައިނަލް ރައުންޑުގައި ކިޔެވުމަކީ ވެސް ނަބީހުގެ މަންމަ ދެކޭ ގޮތުގައި ފަހުރުވެރި ވަނަ އެކެވެ. ނަމަވެސް، މުބާރާތުގެ ވަނައެއް ލިބޭތޯ ހުރިހާ ދިވެހީން ވެސް ދުއާ ކޮށްދިނުމަށް އޭނާ އެދެ އެވެ.

ސިވިއާ އޯޓިޒަމްގެ ސަބަބުން ވާހަކަ ދެއްކުމުގައި އުނދަގޫތަކެއް ހުންނަ ނަބީހު، ހާފިޒަކަށް ހަދަން އޭނާގެ މައިންބަފައިން ކުރީ ބުރަ މަސައްކަތެކެވެ. މިއަދު ދުނިޔޭގެ އެންމެ ބޮޑު ގުރުއާން މުބާރާތުގައި ނަބީހު ރާއްޖެ ތަމްސީލުކުރުމުން އެ ދެމަފިރިން ތިބީ އުފަލުން ފޮޅިފަ އެވެ.