ގަމު ފަޅުފިލުވައިދޭ އަންހެނުންގެ "ފަރިގޮމަ"

ދިވެހިންގެ ޒަމާނީ ބޮޑުބެރު ޖެހުމާއި އެ ކުޅިވަރުގައި މިހާރު މުޅިންހެން ފެންނަނީ ޒުވާން މޫނުތަކެވެ. އެކަމަކު، ލ. ގަމުގެ ތުނޑީ އަވަށުގެ ތަފާތު އެއް ކަމަކީ އެއީ އެވެ؛ ވިއްސަކަށް މީހުން ތިބޭ "ފަރިގޮމަ" ގްރޫޕުގައި ގިނައީ 40 އަހަރުން މަތީގެ އަންހެނުންނެވެ.

އެ ގްރޫޕުގެ ކަންކަމުގައި އިސްކޮށް އުޅޭ ފައުޒިއްޔާ މުހައްމަދު ބުނިގޮތުގައި އެ ރަށުގައި މީގެ ކުރިން ބެރުޖެހުމާއި ލަވަކިޔުމުގައި މުޅިން ވެސް އުޅުނީ ފިރިހެނުންނެވެ. އެކަމަކު، އީދުގައި ބެރު ޖެހުމަށް އޮތް ޝައުގުވެރިކަމަކުން އަވަށުގެ އަންހެނުންތަކަކަށް، ފިރިހެން ގްރޫޕަކުން މީގެ 10 އަހަރު ކުރިން ބެރު ޖަހަން ދަސްކޮށްދިން ގޮތަށް އެ ކުޅިވަރުގައި ފަނޑުވުމެއް ނެތެވެ.

"އޭރު ފިރިހެނުން ބެރު ޖަހައިދޭނީ ވެސް. މިހާރު ފިރިހެނުން ބޭނުމެއް ނުވޭ ބެރުޖަހާކަށް ވެސް. އަންހެނުން ތިބޭނީ،" ފައުޒިއްޔާ ބުންޏެވެ.

ފަރިގޮމަ ގްރޫޕަށް މިހާރު ކައިވެނި މައްޗަށް ދާއިރު ބެރުޖެހުމާއި ލަވަ ކިޔަން ވެސް ދައުވަތު ދެ އެވެ. އަދި ހާއްސަ ދުވަސްތަކުގައި ކައިރި ރަށްތަކުން ވެސް ދައުވަތު ލިބޭ ކަމަށް އޭނާ ބުންޏެވެ.

"އަތޮޅުގެ ރަށްތަކުން ހަމަ ގުޅާލާފައި ދައުވަތު ދޭނެ އެކަހަލަ ހާއްސަ މުނާސަބަތުތަކަށް. އަތޮޅުން ބޭރަށް ވެސް ދަން. ވަކި މުނާސަބަތަކާ ގުޅުވައިގެން ލަވައެއް ހަދައިދޭން ބުނެފިއްޔާ ލަވަ ވެސް ހަދައިދެން،" ފައުޒިއްޔާ ކިޔައިދިނެވެ.

މި ގްރޫޕު މީހުންގެ އެވްރެޖު އުމުރަކީ 40-50 އެވެ. އެ ގްރޫޕުގެ އެންމެ ދުވަސްވީ 60 އަހަރުގެ އަންހެނެކެވެ.

އޭނާ ބުނީ އުމުރުން ދުވަސްވާއިރު ވެސް ބެރުޖެހުމާއި ލަވަކިޔުމުގައި އުޅެނީ ސަގާފީ ކުޅިވަރު ދަމަހައްޓައި މުނި ފޫހިފިލުވުމަށް ކަމަށެވެ.

"ގްރޫޕްގައި ތިބޭނީ ވެސް އެކި ވަޒީފާތަކަށް ދާ މީހުން. މި ކަމުގައި އެންމެންގެ ފިރިންގެ އަދި އާއްމުންގެ ފަރާތުން ވެސް ވަރަށް ސަޕޯޓު ލިބޭ،" ފައުޒިއްޔާ ބުންޏެވެ.

އެކި ޝޯތަކަށް ލަވަ ހަދަނީ ސަލްމާ ޔޫނުސެވެ. ފައުޒިއްޔާގެ ޒިންމާއަކީ ލަވަ ކިޔުމެވެ.

ފައުޒިއްޔާ ބުނިގޮތުގައި އުމުރުން ދުވަސްވީ ބަޔަކަށް ވި ނަމަވެސް އެ މީހުންގެ މަސައްކަތް އާއްމުން ބަލައިގަންނަ ކަމަށެވެ. އެގޮތުން، އެމްބީސީގެ ނަމުގައި ޓީވީއެމް ހިންގި ދުވަސްވަރު ބޭއްވި ވަރުގަދަ އީދު ޝޯގައި، އެ ގްރޫޕުން ހުށަހެޅުމަކީ ލިބުނު ކާމިޔާބީއެއްކަން ފާހަގަކުރެ އެވެ.

އެއާއެކު، އީދު ދުވަސްތަކުގައި ގަމުގައިި ބިލެތް ދަފި ނެގުމުގެ ހަރަކާތުން އެކަނި ވެސް 10،000ރ. އަށްވުރެ ގިނައިން ލިބުމަކީ އެ އަންހެނުން ކުރާ މަސައްކަތް ބަލައިގަންނަ ކަމުގެ ހެއްކެއްކަން ފައުޒިއްޔާ ފާހަގަކުރެ އެވެ.

އެ ގްރޫޕުން ވަނީ ލިބޭ ފަހި ފުރުސަތުތައް ބޭނުންކޮށްގެން، ފިރިހެނުން ނަގާ ކިޔާ ބޮޑުބެރުގައި ވެސް ކުރިއަށް ދެވޭނެކަން ސާބިތުކޮށްދީފަ އެވެ. ކުރިއަށް އޮތް ތަނުގައި ވެސް އެ ބަދަލުތައް ފެންނާނެ ކަމުގެ ޔަގީންކަން ދެ އެވެ.