މިނިވަން ދުވަހަށް ގަތާ ޓޭލްސް

ކަސަބު ބޯވަޅުގެ ތާރިހު ހޯދުމަށް ކުރި ދަތުރުގައި، ފާތިމަތު ނަދުހާ އަބްދުލް މުހުސިން މި ކިޔައިދެނީ އޭގެ ނަލަކަމާއި ރީތިކަމުގެ ވާހަކަތަކެވެ.

ދިވެހި ހެދުންތަކުން މި ފެންނަ ކަސަބުގެ ފަށުވި ޑިޒައިންތަކަކީ އެހެން ގައުމުތަކުގެ ސަގާފަތްތަކުގެ ތެރެއިން އިންސްޕަޔާވެގެން އައިސްފައިވާ ފުރިހަމަ މަސައްކަތްތަކެއް ކަން ތާރިހުން އެނގެ އެވެ. މިއީ ވަރަށް ކަވި، ބުރަ މަސައްކަތެކެވެ. ދިވެހިންގެ ސަގާފަތެކެވެ.

އެކަމަކު، ހިތާމައަކީ މި ސަގާފަތާއި ހުނަރު މަޑުމަޑުން ފަނޑުވަމުން ދިއުމެވެ.

ނަދުހާގެ އުއްމީދަކީ، މި ހުނަރު އެއްކޮށް ފަނޑުވެ ނުދަނީސް، މިކަމަށް މީހުން ޝައުގުވެރިކޮށް، މި ހުނަރު ދިރުވުމެވެ.

ކަސަބު ބޯވަޅާ ގުޅޭ ގޮތުން ދިރާސާކުރަން ނަދުހާ ފެށީ މީގެ ތިން އަހަރު ކުރިން ފެބްރުއަރީ، 2020 ގަ އެވެ. އަދި ކަސަބު ގަތަން ފެށީ ފެބްރުއަރީ، 2021 ގަ އެވެ.

މާލެއަށް އުފަން ނަދުހާ ޕާޓް-ޓައިމްކޮށް މަސައްކަތް ކުރަމުން އަންނަނީ ސެންޓްރަލް ކްލިނިކުގައި ރޭޑިއޯގްރާފަރަކަށެވެ.