ގައިދީން ތިބީ މަސްތާއި ހަރުކަށި ފިކުރުގެ ވަރަށް ނުރައްކާތެރި އޮއިވަރެއްގެ ތެރޭގައި: ރައީސް

މާފުށީ ޖަލުގައި ގައިދީން މިހާރު ތިބީ ވަރަށް ނުރައްކާތެރި ދެ އޮއިވަރެއްގައި ޖެހިފައި ކަމަށާއި އެއީ މަސްތުވާތަކެތި ބޭނުންކުރާ އަދި އެ ތަކެތި ވިއްކާ ގައިދީންގެ ނުފޫޒާއި ދީނީ ހަރުކަށި ފިކުރުގައި ނުފޫޒުގެ ކަމަށް ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.

މޯލްޑިވްސް ކަރެކްޝަނަލް ސާވިސްގެ 51 ވަނަ އަހަރީ ދުވަސް ފާހަގަކުރުމަށް އިސްލާމީ މަރުކަޒުގައި ބޭއްވި ރަސްމިއްޔާތުގައި ވާހަކަދައްކަވަމުން ރައީސް ވަނީ ސަރުކާރާއި އަމިއްލަ ޖަމިއްޔާއެއް ކަމަށްވާ ޓްރާންސްޕޭރެންސީ މޯލްޑިވްސް ގުޅިގެން ކުރި ދިރާސާއިން ލިބުނު ނަތީޖާއާ މެދު ކަންބޮޑުވުން ފާޅުކުރައްވައިފަ އެވެ.

ރާއްޖޭގެ ޖަލުތަކުގައި ހައްދުފަހަނަ އަޅައި ދިޔުމުގެ ކަންކަން ހިނގައި ގޮތާއި އެކަމަށް މަގުފަހިވާ ސަބަބުތައް ދެނެގަތުމަށް ހެދި އެ ދިރާސާއަކީ ސަރުކާރުން ބޭނުންވެގެން ހޯމް މިނިސްޓްރީގެ އެދުމަކަށް ޓްރާންސްޕޭރެންސީން ކުރި ދިރާސާއެއް ކަމަށާއި ސަރުކާރުގެ ބޭނުމަކަށްވީ މުޅިން މިނިވަން ބަޔަކު ލައްވައި، ދިރާސާކޮށް ޖަލުގެ ހާލަތު ދެނެގަތުން ކަމަށް އެމަނިކުފާނު ވިދާޅުވި އެވެ.

ޓްރާންސްޕޭރަންސީގެ ދިރާސާގެ ރިޕޯޓުގައި ވަނީ ތަފާތު އެކި ކުށްތަކުގައި ޖަލަށް ލާ މީހުންނާ ހަރުކަށި ފިކުރުގެ ބަޔަކަށް ބައްދަލުކޮށް، އެ މީހުންގެ ސިކުނޑި ދޮވެ، މުޅިން ބަދަލުކޮށްލައި، ހަރުކަށި ފިކުރަށް އަނބުރާލާ ގޮތުގެ ގިނަ ވާހަކަތަކެއް ހާމަކޮށްފަ އެވެ.

"މިއީ [ޑްރަގާއި ހަރުކަށި ފިކުރަކީ] ހަމައެކަނި ޖަލުގައެއް ނޫން މުޅި މުޖުތަމައުގެ ތެރޭގައި މޫލައި ފެތުރެމުންދާ ނުރައްކާތެރި ދެ މައްސަލަ،" ރައީސް ވިދާޅުވި އެވެ.

"މި ދިރާސާއިން ފާހަގަވި އަނެއް ކަމަކީ ޖަލުތަކުގެ ހިންގުން ހަރުދަނާކުރުމަށާއި ޖަލުތަކުގައި ތިބޭ ގައިދީން ކަންތައްތައް ބެލެހެއްޓުން ހަރުދަނާކުރުމަށްޓަކައި ކުރަން ޖެހޭ ވަރަށް ގިނަ މަސައްކަތްތަކެއް އަދިވެސް ހުރިކަން. އެކަންކަން އިރާދަކުރެއްވިއްޔާ އަޅުގަނޑުމެން ކުރަމުން ގެންދާނަން."

އެ މައުލޫމާތުތައް ހޯދާފައި ވަނީ މާފުށީ ޖަލުގައި ބަންދުކޮށްފައި ތިބި 20 ގައިދީއަކާއި ސްޓާފުންނާއި އަދި ކުރިން އެ ޖަލުގައި ގައިދީއެއް ގޮތުގައި އުޅުނު ޑްރަގް ރީހެބިލިޓޭޝަން ޕޭޝަންޓަކާ އިންޓަވިއުކޮށްގެންނެވެ. އިންޓަވިއު ކުރި ގައިދީންގެ ތެރެއިން ތިން މީހެއް ފިޔަވައި އެހެން އެންމެންނަކީ ވެސް، އެ މީހުންގެ ފިކުރަށް ތަބާ ނުވާ އެހެން މުސްލިމުންގެ ލޭ ހުއްދަ ވާނެ ކަމަށާއި ރާއްޖޭގައި ގާއިމް ވެފައި ވަނީ ދީނާ ހިލާފު ދައުލަތެއް ކަމަށް ގަބޫލު ކުރާ މީހުންނެވެ.

މިރޭގެ ރަސްމިއްޔާތުގައި ވަނީ ކަރެކްޝަންސްގެ އަހަރީ ރިޕޯޓް ހުށަހަޅާއި، އެ ސާވިސް އަށް އެކި ގޮތްގޮތުން ހިދުމަތްކޮށްދިން ފަރާތްތަކުގެ އަގުވަޒަންކޮށްފަ އެވެ.

އެ ރަސްމިއްޔާތުގައި ޕްރިޒަން ކޮމިޝަނަރު އަހްމަދު މުހައްމަދުފުޅާއި ހޯމް މިނިސްޓަރު އިމްރާން އަބްދުﷲ އަދި ޕޮލިސް ކޮމިޝަނަރު މުހައްމަދު ހަމީދު ވެސް ބައިވެރިވެވަޑައިގެންނެވި އެވެ.