15 އަހަރުގެ ކުއްޖަކާއެކު ބަދުއަހުލާގީ އަމަލު ހިންގި މައްސަލައެއްގައި ހުރި މީހަކު ދަންޖެހިގެން މަރުވެއްޖެ

އުމުރުން 15 އަހަރުގެ އަންހެންކުއްޖަކާ އެކު ގަދަކަމުން ބަދު އަހުލާގީ އަމަލު ހިންގި ކަމުގެ ތުހުމަތުގައި މާފުށީ ޖަލުގައި ބަންދުކޮށްފައިވާ މީހަކު ދަންޖެހިގެން މަރުވެފައި އޮއްވައި މިއަދު ފެނިއްޖެ އެވެ.

ޝަރީއަތް ނިމެންދެން މިދިޔަ މާޗު މަހު ކޯޓުން ބަންދުކޮށްފައިވާ ގ. އެއްތެޔޮމާގޭ، އަބްދުލްޣަނީ އިސްމާއިލް، 62 މަރުވެފައި އޮއްވައި ފެނުނީ މިއަދު ހެނދުނު ސައި ހިފައިގެން ކަރެކްޝަންސްގެ ޖަލު އޮފިސަރުން ދިޔައިރު އެވެ.

އޭނާ މަރުވީ ދަންޖެހިގެން ކަން ހޯމް މިނިސްޓްރީން ކަށަވަރު ކޮށްދިނެވެ. އިތުރު ތަފުސީލެއް އަދި ނުލިބެ އެވެ. އެ ގޮޅި ތެރޭގައި ކެމެރާ ހުންނަ ކަމެއް ނުވަތަ ނޫން ކަމެއް އަދި ސާފެއް ނުވެ އެވެ.

ފުލުހުން ބުނީ، މާފުށީ ޖަލަށް ލާފައި ހުރި މީހަކު، ރޭ ދަންވަރުގެ ވަގުތެއްގައި މަރުވި މައްސަލައެއް ތަހުގީގު ކުރަމުން އަންނަ ކަމަށެވެ.

މަގުމަތިން އަންހެނަކާ ދިމާކޮށް އޭނާއާ އެކު، ޖިންސީ ގުޅުން ހިންގުމަށް އެދުނު މައްސަލައެއްގައި ވެސް ކުށް ސާބިތުވެގެން ޣަނީގެ މައްޗަށް ކުރިން ޖަލު ހުކުމެއް އައިސްފައި ވެ އެވެ. އެ މައްސަލާގައި ތިން ދައުވާއެއް ސާބިތުވެ 2021 ވަނަ އަހަރު އޭނާގެ މައްޗަށް އިއްވީ އެއް މަހާއި 24 ދުވަހުގެ ޖަލު ހުކުމެކެވެ.

ލޯބިވެރިޔާ ރަހީނުކޮށް، ވަޅިން ބިރު ދެއްކި މައްސަލާގައި ވެސް ޝަރީއަތް ނިމެންދެން ދޫނިދޫ ޖަލުގައި ބަންދުކޮށްފައި ހުރި މީހަކު ވެސް މި މަހު ދަންޖެހިގެން މަރުވި އެވެ. އެއީ ށ. މިލަންދޫ، ހެޕީސައިޑް، އާދަމް އަތުހަރެވެ.