މީހުން މާލެ އަންނަނީ ރަށްފުށު ދިރިއުޅުމަށް ޝައުގުވެރިކަން ނެތުމުން: ނަޝީދު

ރާއްޖޭގެ އެހެން ރަށްރަށުގައި ދިރިއުޅެމުން އަންނަ މީހުން ވެރިރަށް މާލެ އަށް ބަދަލު ވަނީ ރަށްފުށު ދިރިއުޅުމަށް ޝައުގުވެރިކަން ނުހުންނާތީ ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

ނަޝީދު މިހެން ވިދާޅުވީ ކަރަންޓާއި ފެނުގެ ހިދުމަތް ދޭ ކުންފުނިތަކުން މާލެ އާއި ރަށްރަށުން ނަގާ އަގުތަކުގެ ތަފާތުވުންތައް ނައްތާލުމާ ގުޅޭ ގޮތުން ތޮއްޑޫ ދާއިރާގެ މެމްބަރު ހަސަން ޝިޔާން ހުށަހަޅާފައިވާ ގަރާރަކާ ބެހޭ ގޮތުން ރައްޔިތުންގެ މަޖިލީހުގައި މިއަދު ވާހަކަފުޅު ދައްކަވަމުންނެވެ.

ރިޔާސަތުގައި އިންނަވައި ބަހުސްގެ ތެރެއިން ނަޝީދު ވިދާޅުވީ މާލެ އަށް މީހުން ހިޖުރަ ކުރާ ސަބަބުތަކުގެ ތެރޭގައި މުނިފޫހިފިލުވުމާއި ރަށްރަށުގައި ކުރާނެ ކަމެއް ނެތުން ހިމެނޭ ކަމަށެވެ.

"އާބަން ދިރިއުޅުމަށް މިހާރުގެ ޖީލު މާ ބޮޑަށް ޝައުގުވެރިވޭ، ރަށްފުށު ދިރިއުޅުމަކަށް މިހާރުގެ ޖީލު ނޭނބުރޭ،" ނަޝީދު ވިދާޅުވި އެވެ.

ރަށެއްގެ ކުޑަ ބޮޑުމިނަށް ބެލުމެއް ނެތި ސަރުކާރުން އާންމު ހިދުމަތްތައް ހުރިހާ ރަށަކަށް ފޯރު ކޮށްދިނުމުގެ މަސައްކަތް ކުރަމުން އަންނަ ކަމަށާއި ނަމަވެސް ހިޖުރަ ކުރާ މިންވަރަށް ބަދަލު ނާންނަ ކަމަށް ނަޝީދު ވިދާޅުވި އެވެ. އެހެންވެ އެ މައްސަލާގައި ވިސްނުން އިތުރަށް ފުޅާ ކުރަން ޖެހޭ ކަމަށް ވެސް އެމަނިކުފާނު ވިދާޅުވި އެވެ.

މާލެ އާއި އެހެން ރަށްރަށުގައި ދިރިއުޅޭ މީހުންނާ މެދު ސަރުކާރުތަކުން ތަފާތު ކުރުން ގެންގުޅޭ މައްސަލާގައި މިދުވަސްވަރު ސޯޝަލް މީޑިއާގައި އަންނަނީ ވަރަށް ހޫނު ކޮށް ބަހުސް ކުރަމުންނެވެ.

އެ މައްސަލަ އެންމެ ބޮޑަށް ގޯސްވީ، މާލެ މީހުންނަށް ހިލޭ ގޯތި ދޭ މައްސަލައިގަ އެވެ. އެ މައްސަލާގައި ވެސް ސަރުކާރުން ގެންގުޅޭ ސިޔާސަތު ބަދަލު ކުރުމުގެ ވިސްނުމެއް ނެތް ކަމަށް ނޭޝަނަލް ޕްލޭނިން އެންޑް ހައުސިން މިނިސްޓަރު މުހައްމަދު އަސްލަމް ވަނީ ވިދާޅުވެފަ އެވެ.