"ނޭވާ 2" ފްރީ ޑައިވް އިވެންޓުގެ ޕޯސްޓަރު ނެރެފި

ދުނިޔޭގައި ބާއްވާ އެންމެ ބޮޑު ފްރީ ޑައިވް ހަރަކާތް "ނޭވާ 2"ގެ ޕޯސްޓަރު ނެރެފި އެވެ.

ފްރީ ޑައިވް މޯލްޑިވްސްއިން އިންތިޒާމު ކޮށްގެން ބާއްވާ އެ ހަރަކާތުގެ ޕޯސްޓަރު ނެރެފައި ވަނީ ކްރޮސްރޯޑްސްގައި ބޭއްވި ހަފްލާއެއްގަ އެވެ. ޕޯސްޓަރު ނެރެދެއްވީ އެ ހަފްލާގެ ޝަރަފުވެރި މެހެމާނު، ޓޫރިޒަމް މިނިސްޓްރީގެ ސްޓޭޓް މިނިސްޓަރު އިބްރާހިމް ރަޝީދު އަބޫބަކުރެވެ.

"ނޭވާ 2"ގެ ނަމުގައި ބާއްވާ އެ ހަރަކާތަކީ "ބްރީތު ފޮ ދަ އޯޝަންސް"ގެ ޝިއާރުގައި، ތިމާވެއްޓަށް އަންނަ ބަދަލުތަކުގެ ސަބަބުން، ކަނޑާއި ކަނޑުގެ ދިރުންތަކަށް ކުރިމަތިވަމުންދާ ގެއްލުންތަކަށް އަހުލުވެރި ކުރުވުމުގެ މަގުސަދުގައި ކުރިއަށް ގެންދާ ހަރަކާތެކެވެ. ފްރީ ޑައިވް މޯލްޑިވްސްއިން ބުނީ އެ ހަރަކާތުގެ އަމާޒަކީ، ކަނޑުގެ ދިރުންތައް ހިމާޔަތް ކުރުމަށް ކުރަމުންދާ މަސައްކަތްތައް އިތުރަށް ފުޅާ ކުރުމަށް ހިތްވަރުދީ، ކަނޑުގެ ދިރުންތަކަށް ދިމާވަމުންދާ ގޮންޖެހުންތައް ދުނިޔޭގެ ސަމާލުކަމަށް ގެނައުން ކަމަށެވެ. އަދި އެ ހަރަކާތަކީ ރާއްޖޭގެ ޓޫރިޒަމަށް 50 އަހަރު ފުރުމާ ދިމާކޮށް ބާއްވާ ހަރަކާތެއް ކަމަށް ވެސް ފްރީ ޑައިވް މޯލްޑިވްސްއިން ބުނެއެވެ.

ފްރީ ޑައިވްގެ އެ ހަރަކާތަކީ ދުނިޔޭގައި މިހާތަނަށް ބާއްވާ އެފަދަ ފުރަތަމަ ހަރަކާތެވެ. އެ ހަރަކާތުގައި ގިނަ ބަޔަކު އެއްފަހަރާ މޫދު އަޑިއަށް ފީނައި، މޫދު އަޑީގައި ދެ މިނެޓު ވަންދެން ނޭވާ ހިފަހައްޓާލައިގެން ތިބޭނެ އެވެ. އެ ހަރަކާތަކީ ދުނިޔޭގެ ރެކޯޑު ފޮތަށް އަރާނެ ހަރަކާތެއް ކަމަށް ފްރީ ޑައިވް މޯލްޑިވްސްއިން ބުނެއެވެ.

"ނޭވާ 2" އަންނަ އޮކްޓޯބަރު އެކެއްގައި ބޭއްވުމަށް ހަމަޖެހިފައި ވާއިރު، މިހާރު ވަމުން ދަނީ އެންމެ ފަހުގެ ތައްޔާރީތައް ކަމަށް ފްރީ ޑައިވް މޯލްޑިވްސްއިން ބުނެއެވެ. އެގޮތުން، މިހަރު ކުރިއަށް ދަނީ ބައިވެރިވާން ހުށަހެޅި މީހުންގެ މެދުގައި ސިލެކްޝަންތައް ހެދުމާއި، ބައިވެރިންނާއި އިވެންޓުގެ ސަލާމަތީ ކަންތައްތައް ބެލެހެއްޓުމަށް ހަރަކާތްތެރިވާ "ސޭފްޓީ ބަޑީސް"ގެ ތަމްރީނުތައް ކަމަށް ވެސް ބުންޏެވެ.

ދުނިޔޭގަ ބާއްވާ އެންމެ ބޮޑު ފްރީ ޑައިވް "ނޭވާ 2"ގައި ބައިވެރިވުމަށް 500 އަށް ވުރެ ގިނަ މީހުން ރެޖިސްޓާ ކޮށްފައިވާ ކަމަށް ފްރީ ޑައިވް މޯލްޑިވްސްއިން ބުނެއެވެ. އޭގެ ތެރޭގައި އާއްމުންނާއި، ރިސޯޓުތަކާއި ސަރުކަރުގެ އެކި އިދާރާތަކުގެ މުވައްޒަފުންނާއި ފުލުހުންނާއި ސިފައިން ހިމެނޭކަން ފާހަގަ ކުރި އެވެ.

"ނޭވާ 2"ގައި ސްޓެލްކޯ، އެމްޑަބްލިއުއެސްސީ އަދި އެމްއޭސީއެލް ފަދަ ކުންފުނިތަކުން ބައިވެރިވާ ގޮތަށް ވަނީ ހަމަޖެހިފަ އެވެ. އަދި 12 ރިސޯޓަކުން ވެސް ބައިވެރިވުމަށް ވަނީ ހަމަޖެހިފަ އެވެ.

ފްރީ ޑައިވް މޯލްޑިވްސްއިން "ނޭވާ"ގެ ފުރަތަމަ އިވެންޓު ބޭއްވީ 2019 ވަނަ އަހަރު އެވެ. އެ ހަރަކާތަކީ ގިނިސް ބުކް އޮފް ވޯލްޑް ރެކޯޑުގައި ލިސްޓު ކުރެވުނު ތާރީހީ ހަރަކާތެކެވެ. އެ އަހަރު އެ ހަރަކާތުގައި 521 މީހުން ބައިވެރިވި އެވެ.