ސްޓެލްކޯގެ އިންޖީނެއްގައި ރޯވެއްޖެ

ސްޓެލްކޯގެ އިންޖީނެއްގައި މިއަދު ރޯވެއްޖެ އެވެ.

އެމްއެންޑީއެފުން ބުނީ މިއަދު މެންދުރު ސްޓެލްކޯގެ އިންޖީނެއްގައި އަލިފާނުގެ ހާދިސާއެއް ހިނގިކަމުގެ ރިޕޯޓް ލިބުނީ 12:15 ގައި ކަމަށާއި އަދި 12:26 ހާއިރު، އަލިފާންގަނޑު ނިއްވާލާފައިވާ ކަމަށެވެ.

ސްޓެލްކޯގެ އޮޝިލަކު "މިހާރު" އަށް ވިދާޅުވީ، ރޯވީ އިންޖީނެއްގެ ޓާބޯގައި ކަމަށާއި ކުޑައިރުކޮޅެއްގެ ތެރޭގައި އަލިފާން ނިއްވާލާފައިވާ ކަމަށެވެ. މި ހާދިސާގައި އެއްވެސް މީހަކަށް އަނިޔާނުވާ ކަމަށް އެތަނުން ބުންޏެވެ.

"އެކަމުގެ ސަބަބުން ކަރަންޓް ދިނުމުގެ ހިދުމަތަށް އެއްވެސް އަސަރެއް ނުކުރާނެ،" އޭނާ ވިދާޅުވި އެވެ.

ސްޓެލްކޯގެ ފީޑަރުތަކަށް ދިމާވި މައްސަލައަކާ ގުޅިގެން އިއްޔެ މުޅި މާލެ އާއި ހުޅުމާލޭގެ ބައެއް ސަރަހައްދުތަކުން ކަރަންޓުގެ ހިދުމަތް ވެސް މެދުކެނޑުނެވެ. އޭގެ ފަހުން ކަރަންޓުގެ ހިދުމަތް އަލުން ލިބުނީ ދެ ގަޑިއިރަށް ވުރެ ގިނައިރު ވެސް ވީ ފަހުންނެވެ.

ފީޑަރުތަކަށް ދިމާވި މައްސަލަ އެއްކޮށް ހައްލުކޮށްފައިވާ ކަމަށް އެ ކުންފުނިން ބުންޏެވެ.