ރަށްރަށަށް ހާއްސަކޮށް އެސްޓީއޯ އިން "ނިޕޯން މެޓެކްސް" ކުލަ ބާޒާރަށް ނެރެފި

އެސްޓީއޯ އިން އެކި ރަށްރަށަށް ހާއްސަ ކޮށްގެން"ނިޕޯން މޭޓެކް" ކުލަ މިއަދު ތައާރަފުކޮށްފި އެވެ.

އެ ކުންފުނިން ބުނީ، ރަށްރަށަށް އެ ކުލަ ހާއްސަ ކޮށްފައި ވަނީ އެއީ ކުރިން ހުރި ނިޕޯން ޕެއިންޓާ ހިލާފަށް ވަގުތުން ބޭނުން ކުރެވޭ ކުލައަކަށް ވާތީ ކަމަށެވެ. އާއްމުކޮށް މާކެޓުގައި ހުންނަ ކުލައަކީ "ބޭސް"އަކާ އެއްކޮށް ތައްޔާރު ކުރަންޖެހޭ ދަވާދަށް ވުމުން، ރަށްރަށުން އެ ހުސްވެ، ދަވާދު ތައްޔާރު ނުކުރެވި ކަސްޓަމަރުންނަށް ދަތިތަކެއް ކުރިމަތިވެފައިވާ ކަމަށް އެސްޓީއޯ އިން ބުނެ އެވެ.

އެ ކުންފުނިން ބުނީ އަލަށް ތައާރަފު ކުރި "ނިޕޯން މޭޓެކް" އަކީ ހަތް ލިޓަރާއި 20 ލީޓަރު ޕެކިންގައި ލިބެން ހުރި ކުލަތަކެކެވެ. އަދި އެއީ މިކްސް ކުރަން ނުޖެހޭ، ވަގުތު ސަލާމަތް ކޮށްދޭ ކުލައެއް ކަމަށް ވެސް އެސްޓީއޯ އިން ބުންޏެވެ. އެއީ ސިމެންތި، ކޮންކްރީޓް، ސީލިންގް، ޕްލަސްޓާ ވޯލް ފަދަ ތަންތަނުގައި ފަސޭހައިން ލެވޭ ކުލައެކެވެ.

"ނިޕޮން މެޓެކްސް" ޕެއިންޓު މާކެޓަށް ތައާރަފު ކުރުމަށް އެސްޓީއޯއިން ބޭއްވި ރަސްމިއްޔާތުގައި އެ ޕެއިންޓު ކޮށްދެއްވީ އެ ކުުންފުނީގެ އެމްޑީ އަދި ސީއީއޯ ހުސެއިން އަމްރު އާއި ނިޕޮން ޕެއިންޓު ބިޒްނަސް ޑިވެލޮޕްމެންޓު އެންޑް އެކްސްޕޯޓްސްގެ ސީނިއާ މެނޭޖަރު ހެންރީ އެންގްއެވެ.

އެ ރަސްމިއްޔާތުުގައި އަމްރު ވިދާޅުވީ، އެއީ ބޭނުން ކުރަން ފަސޭހަ، މޮޅު އަދި މި ވަގުތު އެ ކުންފުނިން ވިއްކާ އެހެން ކުލަތަކަށް ވުރެ ހެޔޮ އަގުގައި ލިބޭނެ އުފެއްދުމެއް ކަމަށެވެ. އަދި ރަށްރަށުގައި، ހާއްސަކޮށް ކޮންސްޓްރަކްޝަންގެ މަސައްކަތް ކުރާ ފަރާތްތަކަށް ހާއްސަ ކުލައެއް ކަމަށް އަމްރު ވިދާޅުވި އެވެ.

އޭނާ ވިދާޅުވީ ރީތި، ގިނަ ކުލަތަކެއް ގަތުމުގެ ފުރުސަތު ކަސްޓަމަރުންނަށް ލިބޭނެ ކަމަށެވެ.

އެ ޕެއިންޓުގައި ހުންނާނީ މެޓް ފިނިޝްއެކެވެ. އެ ޕެއިންޓަކީ ވޯޓާ-ބޭސްޑް، އެއްވެސް ލެޑް އަދި މާކިއުރީ އެއް ނުލާ އުފައްދަފައިވާ ޕެއިންޓްއެކެވެ.