ހަ ވަނަ އަށް އެންމެ މުއްސަނދި އެކްޓަރަކީ އަކްޝޭ

ބޮލީވުޑްގެ ކުޅަދާނަ ތަރި، އަކްޝޭ ކުމާރަކީ ދުނިޔޭގެ ހަ ވަނައަށް އެންމެ މުއްސަނދި ތަރިކަމަށް ޑައިރެކްޓަރު، އަނުރާގް ކަޝްޔަޕް ބުނެފި އެވެ.

އަނުރާގް އެކަން ހާމަކުރީ އަކްޝޭ އާއި ތާޕްސީ ޕަންނޫގެ ކުރިއަށް އޮތް ފިލްމު، "ދޮބާރާ" ގެ ޕްރޮމޯޝަން އިވެންޓެއްގެ ތެރެއިންނެވެ.

ސިދާތު ކަންނަން ހޮސްޓްކުރި އެ އިވެންޓުގައި އޭނާ ވަނީ އެކި މީހުންގެ ކޮމެންޓްތައް ވެސް ކިޔައިފަ އެވެ. ގިނަ އަދަދެއްގެ ފިލްމު ކުޅެފައިވާތީ އޭގައި ތާޕްސީ ސިފަކޮށްފައި ވަނީ "ލޭޑީ އަކްޝޭ ކުމާރް" ގެ ގޮތުގަ އެވެ.

އެއާ އެކު ތާޕްސީ ބުނީ އެ ކޮމްޕްލިމެންޓް ބަލައިގަންނަ ކަމަށާއި އެކަމަކު އަކްޝޭއަށް ލިބޭވަރުގެ އާމްދަނީއެއް އޭނާއަށް ނުލިބޭ ކަމަށެވެ.

އެހެންވެ، އަނުރާގް ވަނީ އަކްޝޭއަކީ ދުނިޔޭގެ އެންމެ މުއްސަނދި އެކްްޓަރުންގެ ހަ ވަނާގައި ހިމެނޭ ތަރިއެއް ކަމަށް ބުނެފަ އެވެ.

ފޯބްސް އިންޑިއާގެ މައުލޫމާތުން ދައްކާ ގޮތުގައި އަކްޝޭއަކީ ފޯބްސް ޔޫއެސް ލިސްޓުގެ ދުނިޔޭގެ އެންމެ ބޮޑު އާމްދަނީއެއް ލިބޭ ސެލެބްރިޓީ ލިސްޓަށް 2019 ގައި އެރި ހަމަ އެކަނި އިންޑިއާގެ ތަރިއެވެ. އެ އަހަަރު އޭނާއަށް 65 މިލިއަން ޑޮލަރު ލިބި، ހިމެނިފައި ވަނީ ލިސްޓުގެ 33 ވަނައިގަ އެވެ. އެކަމަކު 2020 ގައި އަކްޝޭ ހިމެނިފައި ވަނީ ހަ ވަނަ އަށް އެންމެ ބޮޑު އާމްދަނީ ލިބޭ ތަރީގެ ގޮތުގަ އެވެ.

ފޯބްސް މެގަޒިންގައި ބުނެފައިވާ ގޮތުގައި އަހަރަކު 48.5 މިލިއަން ޑޮލަރު ލިބެ އެވެ. އޭނާއަށް އެހާ ބޮޑު އާމްދަނީއެއް ލިބެނީ އިޝްތިހާރުތަކުންނެވެ.

އިންޑިއާގައި އެންމެ ގިނައިން ޓެކްސް ދައްކާ ތަރިއަކީ ވެސް އަކްޝޭ އެވެ.