ޗުއްޓީ ނިމެނީ، ޝަކުވާ ބޮޑު، މިނިސްޓްރީ ހިމޭނުން!

ސްކޫލުގެ އަހަރީ ޗުއްޓީ ނިމި ޓީޗަރުންނާއި ސްކޫލުތަކުގެ އިދާރީ މުވައްޒަފުން މިއަދުން ފެށިގެން ވަނީ ސްކޫލަށް ނުކުންނަން ފަށައިފަ އެވެ. އަންނަ އާދިއްތަ ދުވަހު ރާއްޖޭގެ ހުރިހާ ސްކޫލެއްގައި ދިރާސީ އާ އަހަރު ފަށާނެ އެވެ.

"މުދައްރިސުންގެ އަހަރީ ޗުއްޓީވެސް ނިމުނީ! ޗުއްޓީ އަހަރު މެދުތެރެއަށް ހެއްދެވުމަށް ސާވޭގައި ޚިޔާލު ދެއްވި އެންމެ ބޭފުޅުންނަށް ވަރަށް ބޮޑަށް ޝުކުރިއްޔާ! ވިއްސާރައިގެ ސަބަބުން ރަށުބަންދުގައި ތިބެން ޖެހުނު އާއިލާތަކަށް ތަޢުޒިޔާ ދަންނަވަން،" ޓީޗަރަކު ސޯޝަލް މީޑިއާގައި ލިޔެފައި ވެ އެވެ.

މިދިޔަ ޖޫން 30 ގައި ސްކޫލްތައް ބަންދުވެ، ބޮޑު ޗުއްޓީ ފަށައި ގާތްގަނޑަކަށް އެއް މަސް ދުވަސް ފާއިތުވެގެން މި ދިޔައީ ވިއްސާރައިގަ އެވެ.

ހދ. އަތޮޅުގެ ސްކޫލެއްގެ ޓީޗަރަކު، އޭނާގެ ފޭސްބުކްގައި ކުރި ޕޯސްޓެއްގައި ބުނީ ޓީޗަރުންގެ އަހަރީ ޗުއްޓީގެ އެންމެ ފަހު ދުވަސް ވެސް މި ދިޔައީ ވިއްސާރަ އާއި ވައިގަދަވެ، ކަނޑު ގަދަވުމުގެ އެލާޓްގައި ކަމަށެވެ.

"ޗުއްޓީއަށް ބަދަލެއް ބޭނުންވޭ،" މުހައްމަދު ލަތީފް ނަމަކަށް ކިޔާ މީހަކު އޭނާގެ ފޭސްބުކް ސްޓޭޓަސްގައި ބުންޏެވެ.

އެ ޕޯސްޓަށް ކޮމެންޓްކުރި މާލެ ކައިރި ރަށެއްގެ އެހެން ޓީޗަރަކު ބުނީ، ޗުއްޓީ މި ނިމުނީ ރަށުން 20 މިނެޓުން ދަތުރުކުރެވޭ މާލެއަށް ވެސް ޑޮކްޓަރަށް ދައްކާލަން ނުދެވި ކަމަށެވެ.

މި ވޭތުވެދިޔަ މަހެއްހާ ދުވަސް ހޭދަވެގެން މި ދިޔައީ ރާއްޖޭގެ ކަނޑުތައް ވަރަށް ގަދަކޮށް އޮވެ ދަތުރު ނުކުރެވި އެވެ. ވައިގެ މަގުން ރަށަކަށް ދާން ބަލާއިރު، ޓިކެޓްގެ އަގުތައް ހުންނަނީ އަތްފޯރާ ހިސާބެއްގައެއް ނޫނެވެ. އަނެއްކޮޅުން ވިއްސާރަ މޫސުމަށް ވާތީ، ޕިކްނިކް ދިއުމާއި މަސްދަތުރު ދިއުމާއި މޫދަށް ދިއުން ވެސް އެއްކޮށްހެން އޮތީ ހުއްޓިފަ އެވެ.

"މުޅި ޗުއްޓީ ދިޔައީ ފެނަށް. ހަމަ ބޭކާރު ޗުއްޓީއެއް،" މިއަހަރު ގްރޭޑް 10 ގައި ކިޔަވާ ދަރިވަރަކު ބުންޏެވެ.

ބޮޑު ޗުއްޓީއާ ގުޅޭގޮތުން ސޯޝަލް މީޑިއާގައި އެތައް ކަންބޮޑުވުންތަކެއް ފާޅުކޮށްފައި އެބަހުއްޓެވެ. ނަމަވެސް އެޑިއުކޭޝަން މިނިސްޓްރީން ބުނީ އެ މައްސަލައިގައި މި ވަގުތަށް އެއްވެސް ކޮމެންޓެއް ނެތް ކަމަށެވެ.

ކޮވިޑު-19 ގެ ސަބަބުން ސްކޫލުތައް ބަންދުކޮށް ދިގުލައިގެން ދިއުމާއި ރިސޯޓުގައި މަސައްކަތްކުރާ މުވައްޒަފުންނަށް އާއިލާއާ އެކު ޗުއްޓީ ހޭދަކުރުމުގެ ފުރުސަތު ދިނުމަށް ސްކޫލް ބޮޑު ޗުއްޓީ ފެށޭ ދުވަސްވަރު ބަދަލުކުރަން މީގެ ކުރިން ވެސް މަޝްވަރާ ކުރި އެވެ. އެކަމަކު، ތައުލީމް ދާއިރާ އަށް އެ ބޮޑު ބަދަލު ގެންނަން އެޑިއުކޭޝަން މިނިސްޓްރީ އަށް އެންމެ ރަނގަޅު ފުރުސަތަކަށް ބަލިމަޑުކަމާ ގުޅިގެން ސްކޫލްތައް ބަންދުކުރި 2020 ވަނަ އެވެ.

ސްކޫލު ޗުއްޓީ ޖޫން/ ޖުލައި އަށް ބަދަލު ކުރުމަށް މި ސަރުކާރުން އެންމެ ފުރަތަމަ ދެއްކި އެއް ހުއްޖަތަކީ ޑިސެމްބަރު މަހަކީ ޓޫރިޒަމް ސީޒަނަށް ވާތީ، ރިސޯޓްތަކުގައި މަސައްކަތް ކުރާ މީހުންނަށް ދަރިން ކައިރި އަށް ނުދެވުމެވެ. އެކަމަކު ރާއްޖޭގެ ޓޫރިޒަމް މިހާރު އޮތް ގޮތުން ސީޒަނެއް، އޮފް ސީޒަނެއް މިހާރަކު ނޯވެ އެވެ. އަދި، ކަނޑުގަދަ ދުވަސްވަރެއްގައި، ރިސޯޓްތަކުގައި އުޅޭ މީހުން ރަށަށް ގޮސް ދަރިންނާ އެކު ވަގުތު ހޭދަކުރާނީ ވަކި ކިހިނެއްތޯ އާންމުން ސުވާލުކުރެ އެވެ.

އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު އަހުމަދު މުޖާހިދު ކުރިން ވިދާޅުވެފައި ވަނީ އެކަޑެމިކް ކަލަންޑަރު ބަދަލުކުރުމުގެ ކުރިން މެޓް އޮފީހާ އެކު ފާއިތުވި ފަސް އަހަރުގެ މޫސުން ދިރާސާކުރި ކަމަށެވެ. މާޒީއަށް ބެލުމުން، ޖޫން/ޖުލައި މަހަކީ ރާއްޖެ އަށް ވިއްސާރަ ދުވަސްވަރެއް ކަމަށް ބުނެވެން ނެތް ކަމަށް އޭރު އޭނާ ވިދާޅުވި އެވެ.

ނަމަވެސް، ޖޫން/ޖުލައި ވިއްސާރަ އަކީ އަބަދު ވެސް މި ދުވަސްވަރު ލައިގަންނަ މޫސުމެކެވެ. މީގެ ކުރީ އަހަރުތަކުގައި ވެސް އެ މޫސުމުގެ ގަދަ ވަޔާ އެކު ކަނޑުތައް ގަދަވެ. އެލާޓްތައް ވެސް ނެރެފައި އެބަހުއްޓެވެ.

މިއީ ކުރިއަށް އޮތްތާނގައި އެޑިއުކޭޝަން މިނިސްޓްރީން ވިސްނަން ޖެހޭ މައްސަލައަކަށް ވާނެ އެވެ. ވަރަށް ގިނަ ޓީޗަރުންނާއި ދަރިވަރުންގެ ހިޔާލު ވެސް ހުރީ ބޮޑު ޗުއްޓީ މިގޮތަށް މި މޫސުމުގައި ދިނުން އެއީ އެންމެ ރަނގަޅު ގޮތް ނޫން ކަމަށެވެ. ކުރިން އޮތް ގޮތަށް، ޑިސެމްބަރުގައި ދިގު ޗުއްޓީއެއް އެކަނި އޮތުން ރަނގަޅު ކަމަށް އެންމެންހެން ވެސް ބުނަނީ އެހެންވެ އެވެ.