ގޮވާމުގެ އެއްބަސްވުން ތަންފީޒު ކުރުވާނަން: އެމެރިކާ

ޔޫކްރޭންގައި އުފައްދާ ގޮވާމުގެ ބާވަތްތައް އެކްސްޕޯޓްކުރުމުގެ ފުރުސަތު ދިނުމަށް ރަޝިޔާ އާއި ޔޫކްރޭނާ ދެމެދު މިދިޔަ ހުކުރު ދުވަހު ސޮއިކުރި އެއްބަސްވުން ތަންފީޒުކުރުމަށް ރަޝިޔާ އަށް ފިއްތުންތައް ކުރިމަތިކުރުވާނެ ކަމަށް އެމެރިކާ އިން އިއްޔެ ބުނެފި އެވެ.

އެމެރިކާ އިން މި މޭރުމުން ރަޝިޔާ އަށް އިންޒާރުކުރީ، ޔޫކްރޭންގެ ކަނޑުގެ ބަނދަރުތަކުން ގޮވާމުގެ ބާވަތްތައް އެކްސްޕޯޓް ކުރުމުގެ ފުރުސަތު ދިނުމަށް މިދިޔަ ހުކުރު ދުވަހު ރަޝިޔާ އާއި ޔޫކްރޭނާ ދެމެދު އެއްބަސްވުމެއްގައި ސޮއިކުރިތާ 24 ގަޑިއިރު ފަހުން، އޭގެ ތެރެއިން އެންމެ މުހިންމު ބަނދަރަށް ރަޝިޔާ އިން މިސައިލް ހަމަލާތަކެއް ދީފައިވަނިކޮށެވެ.

ޔޫކްރޭނުން ބުނާ ގޮތުގައި ރަޝިޔާގެ މަނަވަރަކުން ފޮނުވައިލި ހަތަރު މިސައިލްގެ ތެރެއިން ދެ މިސައިލް، އޮޑެސާ ބަނދަރުގައި ހުރި ގޮވާން ރައްކާކުރާ ކޮށާރަކަށް އަމާޒުވި އެވެ. ނަމަވެސް އިތުރު މާބޮޑު ގެއްލުންތަކެއް ނުލިބޭތީ، އެ ބަނދަރުގައި އޮތް އާގުބޯޓަށް ގޮވާން ބަރުކުރުމުގެ ތައްޔާރީތައް ކުރިއަށް ދާ ކަމަށް ޔޫކްރޭނުން ބުނެ އެވެ.

މިހާރު ހަނގުރާމަ ކުރަމުންދާ ރަޝިޔާ އާއި ޔޫކްރޭނަކީ ބައިނަލްއަގުވާމީ ބާޒާރަށް ގޮވާމުގެ ބާވަތްތައް އެންމެ ގިނައިން ނެރޭ ދެ ގައުމެވެ. މިދިޔަ ފެބްރުއަރީ މަހުގެ 24 ވަނަ ދުވަހު ރަޝިޔާ އިން ޔޫކްރޭނާ ދެކޮޅަށް ހަނގުރާމަ ފަށައި، އެ ގައުމުގެ ކަނޑުގެ ބަނދަރުތައް ހިފުމާ ގުޅިގެން، ބައިނަލްއަގުވާމީ ގޮވާމުގެ އެކްސްޕޯޓަށް ހުއްޓުން އަރައި، ގޮވާމުގެ ބާވަތްތަކުގެ އަގުތައް ވަނީ އުފުލެން ފަށައިފަ އެވެ.

ކާބޯތަކެއްޗާ ބެހޭ އދ.ގެ އިދާރާ އިން ބުނާ ގޮތުގައި، ޔޫކްރޭނުން ގޮވާމުގެ ބާވަތްތައް އެކްސްޕޯޓްކުރުމަށް ރަޝިޔާ އިން ހުރަސްއެޅުމާ ގުޅިގެން، ދުނިޔޭގެ އެކި ގައުމުތަކުގެ 47 މިލިއަނެއްހާ މީހުން ވަނީ ހައިހޫނުކަމާ ކުރިމަތިލާން ޖެހިފަ އެވެ.

ގޮވާން އެކްސްޕޯޓް ކުރުމުގެ އެއްބަސްވުން ތަންފީޒު ކުރުމަށް ރަޝިޔާ އަށް ބާރު އެޅުމުގެ އިތުރުން، ގޮވާމުގެ ދަތިކަން ފިލުވުމުގައި ޗައިނާގެ އެހީތެރިކަމަށް ވެސް އެމެރިކާ އިން އިއްޔެ ވަނީ ގޮވާލައިފަ އެވެ. އެމެރިކާގެ ޚާރިޖިއްޔާގައި އުފައްދާފައި އޮންނަ، އޮފީސް އޮފް ސެންކްޝަންސް ކޯޑިނޭޝަންގެ ވެރިޔާ ޖޭމްސް އޯބްރެއިން ވިދާޅުވީ ބައިނަލްއަގުވާމީ ކާބޯތަކެތީގެ ދަތިކަން ހައްލުކުރުމުގައި ޗައިނާގެ އެހީތެރިކަން ވަރަށް ބޮޑަށް މިވަގުތު ބޭނުންވެ އެވެ.

"އަހަރެމެން ދެކެން ބޭނުންވަނީ ދުނިޔޭގެ ބޮޑު ބާރެއްގެ ގޮތުގައި ޗައިނާ ހަރަކާތްތެރިވާ މަންޒަރު. އަދި ދުނިޔޭގެ އެކި ކަންކޮޅުތަކުގައި ތިބި ފަގީރުންނަށް ގޮވާމުގެ ބާވަތްތައް ޗައިނާ އިން ފޯރުކޮށްދިނުމަށް އަހަރެމެން ވަރަށް ބޮޑަށް އެދެން. ކާބޯތަކެތީގެ ޔަގީންކަމެއް ނެތް މަރުހަލާއަކަށް އެތައް މިލިއަން ބަޔަކު ވަންނަމުން ދާއިރު، ޗައިނާ އިން މިހާރު އެ ދަނީ، ދުނިޔޭގެ ބާޒާރަށް ނެރޭ ގޮވާމުގެ ވަރަށް ގިނަ މިންވަރެއް ގަނެ ގުދަންކުރަމުން،" ޖޭމްސް އޯބްރެއިން ވިދާޅުވި އެވެ.

އިންޓަނޭޝަނަލް ގްރެއިން ކައުންސިލުން ލަފާކުރާ ގޮތުގައި 2020/2021 ވަނަ އަހަރުގެ ދަނޑުވެރިކަމުގެ މޫސުން ނިމުނު އިރު، ޗައިނާގެ ގޮވާން ކޮށާރުތަކުގައި ގާތްގަނޑަކަށް 323.4 މިލިއަން ޓަނުގެ ގޮވާން ގުދަން ކޮށްފައި ހުއްޓެވެ. މިއީ މުޅި ދުނިޔޭގައި ގުދަންކުރާ ޖުމްލަ އަދަދު ކަމަށްވާ 607.4 މިލިއަން ޓަނުގެ ގޮވާމުގެ ދެބައިކުޅަ އެއް ބަޔަށް ވުރެ ވެސް ގިނަ މިންވަރެކެވެ.

އޭނާ ވިދާޅުވީ މިފަދަ ހާލަތެއްގައި އަމިއްލަ ގައުމުގައި ގޮވާންތައް ގުދަންކުރުމަށް ވުރެ ބޮޑަށް ޗައިނާ އިން އިސްކަން ދޭންވީ ދުނިޔޭގައި ކާޑަށް ޖެހެމުންދާ މީހުންނަށް ގޮވާމުގެ ބާވްތައް ފޯރުކޮށްދިނުމަށެވެ. ޔޫކްރޭން ހަނގުރާމަ ފެށި ފަހުން، މިދިޔަ އެޕްރީލް މަހުގެ ތެރޭގައި ޔޫކްރޭނުން އެކްސްޕޯޓްކުރި ފުރަތަމަ ގޮވާން ޝިޕްމަންޓުގެ ގާތްގަނޑަކަށް 40 ޕަސެންޓް ގަތީ ޗައިނާއިންނެވެ.

"އޭގެ ބަދަލުގައި މި ގޮވާންތައް މިސްރާއި އެފްރިކާގެ ދެކުނު ސަރަހައްދުގައި ހުރި ގައުމުތަކުގައި ދިރިއުޅޭ އާންމު ރައްޔިތުންނަށް ލިބޭނެ އިންތިޒާމެއް ހަމަޖެހުނު ނަމަ މާ ރަނގަޅުވީސް،" ޖޭމްސް އޯބްރެއިން ވިދާޅުވި އެވެ.

އެމެރިކާގައި ހުންނަ ޗައިނާގެ އެމްބަސީން އިއްޔެ ބުނީ މުޅި ދުނިޔޭގައި އޮތް ދަނޑުބިންތަކުގެ ނިސްބަތުން ބަލާއިރު، ޗައިނާގައި އޮތީ އެންމެ ނުވަ ޕަސެންޓްގެ ބިންކޮޅެއް ކަމަށާއި، ނަމަވެސް ދުނިޔޭގެ އާބާދީގެ ފަސް ބައިކުޅަ އެއްބައި ދިރިއުޅެނީ ޗައިނާގައި ކަމަށެވެ. އެހެންކަމުން، ޗައިނާގެ ރައްޔިތުންނަށް ކާންބޯން ދިނުމަށްޓަކައި އެކަށީގެންވާ މިންވަރަކަށް ގޮވާން ރައްކާކޮށްފައި ބަހައްޓަންޖެހޭ ކަމަށް ޗައިނާ އެމްބަސީން ބުންޏެވެ.