ސްޓެލްކޯގެ ފްލެޓްތައް އަންނަ މަހުގެ ހައެއްގައި ހަވާލުކުރަނީ

ހުޅުމާލޭ ދެވަނަ ފިޔަވަހީގައި ސްޓެލްކޯ އިން އިމާރާތް ކޮށްފައިވާ ފްލެޓްތައް ގަތް މުވައްޒަފުންނާ އަންނަ މަހުގެ ހަ ވަނަ ދުވަހު އެ ތަންތަން ހަވާލުކުރާނެ ކަމަށް އެ ކުންފުނީގެ މެނޭޖިން ޑިރެކްޓަރު އަހުމަދު ޝަރީފް ރޭ ވިދާޅުވެއްޖެ އެވެ.

އޭނާ އެހެން ވިދާޅުވީ، ސްޓެލްކޯގެ ބޯޑުގެ އާ ޗެއާމަން ސިފައިންގޭގެ ކުރީގެ ބްރިގޭޑިއާ ޖެނަރަލް އިބްރާހިމް މުހައްމަދު ދީދީ (ޑީޑީ) އެ ކުންފުނީގެ މުވައްޒަފުންނަށް ތައާރަފު ކުރުމަށް ބޭއްވި ބައްދަލުވުމެއްގަ އެވެ.

ސްޓެލްކޯގެ ފްލެޓްތައް މުވައްޒަފުންނާ ހަވާލުކުރާ ގޮތަށް ކުރިން ހަމަޖައްސާފައި އޮތީ މިއަދެވެ. އެކަމަކު ޝަރީފް ރޭ ވިދާޅުވީ، ފްލެޓްތަކަށް ޔަގީންކަމާއެކު ވަދެވޭނެ އާ ތާރީހަކީ އަންނަ ހަފުތާގެ ހޮނިހިރު ދުވަސް ކަމަށެވެ.

އޭނާ ވިދާޅުވީ، ކުރިން ތާރީހެއް ކަނޑައަޅައި އަމާޒެއް ނެތް ނަމަ، ފްލެޓްތަކަށް ވަދެވޭނެ ތާރީހު އިތުރަށް ލަސްވާނެ ކަމަށް ގަބޫލުކުރައްވާ ކަމަށެވެ.

ސްޓެލްކޯ ފްލެޓްގެ އަގު:

- އެއް ކޮޓަރި - 5،622ރ.

- މެއިޑް ރޫމް ހިމެނޭ (1+2) އެޕާޓްމަންޓް - 10،356ރ. އާއި 10،652ރ. އާ ދެމެދުގެ އަގެއް.

ޝަރީފް ވިދާޅުވިގޮތުގައި، ފްލެޓްތައް ދިގު މުއްދަތަކަށް ބޭނުންކުރެވޭނީ އެ ތަން ރަނގަޅަށް މެއިންޓަނެންސް ކޮށްގެން ކަމަށް ވާތީ، އެއް ކޮޓަރީގެ އެޕާޓްމަންޓްތަކުން މަހަކު 1،000ރ. ގެ ފީއެއް ނަގާނެ އެވެ. އަދި މެއިޑް ރޫމު ހިމެނޭ ގޮތަށް ތިން ކޮޓަރީގެ އެޕާޓްމަންޓްތަކުން މެއިންޓަނެންސް ފީގެ ގޮތުގައި 1،300ރ. ނަގާނެ ކަމަށް އޭނާ ވިދާޅުވި އެވެ.

ސްޓެލްކޯގެ ފްލެޓްތަކުގެ ސެކިއުރިޓީ 24 ގަޑިއިރު ބަލަހައްޓާނެ ކަމަށާއި އެ އިންތިޒާމު ހަމަޖައްސަންދެން ކުންފުނީގެ ސެކިއުރިޓީ އޮފިސަރުން އެ ތަން ބަލަހައްޓާނެ ކަމަށް ވެސް ޝަރީފް ވިދާޅުވި އެވެ.

އޭނާ ވިދާޅުވީ، ފްލެޓްތަކުގެ އަގު 'ވެލިއު އެޑެޑް' ކުރެވޭނެ ގޮތްތައް ވެސް ސްޓެލްކޯ އިން އަންނަނީ ހޯދަމުން ކަމަށެވެ.

"މިހާ ކުޑަ އަގެއްގައި ފްލެޓް ލިބުނީމާ، ވިޔަފާރި އުސޫލުން އެ ފްލެޓް ވިއްކާލަން ބޭނުންވާ މީހުން ވެސް ތިބެދާނެ. އެހެންވެއްޖިއްޔާ އެ ފްލެޓް ވިއްކާލުމަށްޓަކާ ކޮން ކަހަލަ ވެލިއު އެޑެޑް ކަމެއްތޯ، ފެސިލިޓީއެއްތޯ އެ ތަނުގައި ގާއިމުކުރެވޭނީ އަޅުގަނޑުމެން މިހާރު ވިސްނަމުން މިދަނީ،" ޝަރީފް ވިިދާޅުވި އެވެ.

އޭނާ ވިދާޅުވީ 15 ފްލޯގެ ދެ ޓަވަރުގެ މެދުގައި ސްވިމިން ޕޫލެއް ހެދުމުގެ ވިސްނުން ސްޓެލްކޯ އިން ގެންގުޅޭ ކަމަށެވެ. އެއީ ފްލެޓްގެ އަގު މަތިކޮށް، ހިދުމަތް ދިނުމަށް ކަމަށް ކުރާ ކަމެއް ކަމަށް ވިދާޅުވި އެވެ.

ސްޓެލްކޯގެ ފްލެޓްތައް ކައިރީގައި ކުޑަކުދިން ކުޅޭނެ ސަރަހައްދެއް ހެދުމުގެ ވިސްނުން ވެސް އެ ކުންފުނިން ގެންގުޅެ އެވެ.

"އިތުރަށް މަސައްކަތްތަކެއް އެބަހުރި ކުރަން. މިހާރު ސުވާލަކީ މީތި އަޅުގަނޑުމެންގެ މުވައްޒަފުން ދައްކަން ޖެހޭ ފައިސާއަށްހޭ އެޑް ކުރާނީ ނޫނީ ކުންފުނީގެ ފައިދާ އިން ކަނޑާނީހޭ؟ މެނޭޖްމަންޓުން އެކަން ޑިސްކަސް ކުރާނަން. އަޅުގަނޑުމެން ބޭނުންވަނީ ސްޓާފުންނަށް ވީހާ ވެސް ލުއިވާނެ ގޮތަކަށް އެކަން ކުރަން،" ޝަރީފް ވިދާޅުވި އެވެ.

އޭނާ ވިދާޅުވިގޮތުގައި، ފްލެޓްތަކުގެ ހަރަދަށް މިހާތަނަށް 640 މިލިއަން ރުފިޔާ ވަނީ ހަރަދުކޮށްފަ އެވެ. އެކަމަކު ފްލެޓް އިމާރާތްކޮށް ނިމިފައި ހުއްޓަސް އިތުރު ވޭރިއޭޝަންތަކެއް ހުރުމުން އެ ހަރަދުތައް ހިމެނޭ ގޮތަށް ކޮށްފައިވާ ހަރަދުގެ ޖުމުލަ އަގު 700 މިލިއަން ރުފިޔާ އަށް އަރާނެ ކަމަށް އޭނާ ވިދާޅުވި އެވެ.

ރޭގެ ބައްދަލުވުމުގައި މުވައްޒަފުންނާ މުހާތަބުކުރައްވައި ޝަރީފް ވިދާޅުވީ، ސްޓެލްކޯ އިން ބޭނުންވަނީ މުވައްޒަފުން އެކަން ޝުކުރުވެރިކަމާ އެކު ބަލައިގަތުން ކަމަށެވެ. ކުންފުންޏަށް ރީތި ނަން ހޯދައިދީ، އިހުލާސްތެރިކަމާއި ފަރުވާތެރިކަމާއެކު އާންމުންނަށް ހިދުމަތްދިނުމުގައި ދެމިތިބުމަށް ޝަރީފް އިލްތިމާސް ކުރެއްވި އެވެ.

ސްޓެލްކޯގެ ފްލެޓް ލިބުނު އެ ކުންފުނީގެ މުވައްޒަފުން އެ ފްލެޓްތަކުގައި ދިރިއުޅެން ތައްޔާރުވުމަށްޓަކައި، އަންނަ ޑިސެމްބަރާ ހަމައަށް މަހު ކުއްޔެއް ނުނަގާނެ އެވެ. އެ މުއްދަތުގެ ތެރޭގައި ވެސް މުސާރައިންނާއި އެހެން ގޮތްގޮތުން ކުންފުންޏަށް 10 ޕަސެންޓް ދައްކަމުންދާތީ ކުލި ނަގައިފި ނަމަ، ދަތިވާނެ ކަމަށް ފެންނަ ކަމަށް އެމްޑީ ވިދާޅުވި އެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ސަރުކާރުގެ އެކި ކުންފުނިތަކުން ހުޅުމާލޭގެ ދެވަނަ ފިޔަވަހީގައި ފްލެޓް އެޅުމުގެ މަސައްކަތް ފެށި އެވެ. ސްޓެލްކޯގެ ދެ ޓަވަރުގައި ހިމެނެނީ 360 ފްލެޓެވެ. އެއީ އެއް ކޮޓަރީގެ 72 އެޕާޓްމަންޓާއި ދެ ކޮޓަރި އާއި މެއިޑް ރޫމް ހިމެނޭ 288 އެޕާޓްމަންޓްތަކެވެ.

ސްޓެލްކޯގެ ޓަވަރުތަކުގެ މަސައްކަތް އޮތީ ގާތްގަނޑަކަށް ނިމިފަ އެވެ. އެކަމަކު، ކަރަންޓް ނެޓްވޯކްގެ ކަންކަން އެޗްޑީސީން ހަވާލު ކޮށްފައިވާ ޗައިނާގެ ކުންފުނީގެ މަސައްކަތް ލަސްވާތީ، އެ ކަން މި ވަގުތު ކުރަނީ ސްޓެލްކޯގެ އަމިއްލަ ހަރަދުގަ އެވެ.