ޒުވާނުންގެ ނަފުސާނީ ކަންކަން ހައްތާ ވަނީ ގޯސް: ދިރާސާ

ފުރާވަރު އަދި ޒުވާން ކުދިންގެ ނަފުސާނީ ދުޅަހެޔޮކަން ދުވަހުން ދުވަހަށް ގޯސްވަމުންދާ ކަމަށާއި ނަފުސާނީ އެކި ކަހަލަ މައްސަލަތަކުގައި އުޅޭ ޒުވާނުން އިތުރުވާ ކަމަށް ދިރާސާއަކުން ދައްކައިފި އެވެ.

އިނގިރޭސި ވިލާތުގެ ސައިންޓިސްޓުންތަކެއްގެ ދިރާސާއަކުން އެނގުނު ގޮތުގައި ޒުވާނުންގެ މެދުގައި ނަފުސާނީ ދުޅަހެޔޮކަން ދަނީ ހައްތާ ގޯސްވަމުންނެވެ.

އެ ދިރާސާ އަށް އިނގިރޭސި ވިލާތުގެ 100 ސްކޫލަކުން 29،000 އަށް ވުރެ ގިނަ ކުދިންގެ ހާލަތު ބަލައި، މައުލޫމާތު ނެގި އެވެ.

"ސްކޫލު ދުވަސްވަރަކީ ކުއްޖާގެ މުސްތަގުބަލަށް އެންމެ ބޮޑު އަސަރެއް ކުރާ އެއް ދުވަސްވަރު. މި ދުވަސްވަރު ވާ ކަންތައްތަކުގެ އަސަރު މުޅި އުމުރަށް ދެމިގެން ގޮސްދާނެ،" އެ ދިރާސާގައި ވެ އެވެ.

ދިރާސާ އިން އެނގުނު ގޮތުގައި ސްކޫލުގެ މާހައުލުގައި ހިނގާ ކަންކަމާ ގުޅިގެން ކުދިންގެ ނަފުސާނީ ދުޅަހެޔޮ ކަމަށް ގެއްލުން ވެ އެވެ. އަދި މުޅި ދުނިޔެ އަށް ކުރިމަތިވި ކޮވިޑްގެ ބަލިމަޑުކަމާއެކު، ދިރިއުޅުމަށް އައި ބަދަލުތަކުން ނަފުސާނީ ކަންކަން އިތުރުވި ކަމަށް ދިރާސާގައި ބުންޏެވެ.

އެ ކަންތައްތަކާ ގުޅިގެން ނަފުސާނީ ދުޅަހެޔޮ ކަމަށް ވަރަށް ބޮޑެތި އަސަރު ކުރަމުންދާ ކަމަށް ދިރާސާގައި ފާހަގަކުރެ އެވެ.

ޅަ އުމުރަކީ އިހުސާސްތަކާއި ވަށައިގެންވާ މާހައުލުން ދިމާވާ ކަންތައްތައް ރަނގަޅަށް ދެނެގަންނަން އުނދަގޫ ދުވަސްވަރެކެވެ. ނަތީޖާއަކަށް ވަނީ ނަފުސާނީ ގޮތުން ގެއްލުންތައް ކުރިމަތިވުމެވެ. ދިރާސާ އިން ފާހަގަކުރަނީ އިހުސާސްތައް ސިފަކޮށް، ބުނެދޭން ނޭނގުމަކީ ނަފުސާނީ ދުޅަހެޔޮކަން ދުވަހުން ދުވަހަށް ގޯސްވެ، އެ ފަަދަ މައްސަލަތައް އިތުރުވާން ދިމާވާ ސަބަބެއް ކަމަށެވެ.