ދެ އަހަރުގެ މެދުކެނޑުމަކަށް ފަހު މި އަހަރުގެ މިނިވަން ދުވަހު ފުޅަނދުބުރު ބާއްވަނީ

ދެ އަހަރުގެ މެދުކެނޑުމަކަށް ފަހު، މި އަހަރުގެ މިނިވަން ދުވަހުގެ މުނާސަބަތުގައި ފުޅަނދުބުރު ބާއްވަން ސަރުކާރުން ނިންމައި، ތައްޔާރީތައް ފަށައިފި އެވެ.

އެ ފުޅަނދުބުރު މި އަހަރު އޮންނާނެ ކަން ފިޔަވައި، އިތުރު ތަފުސީލެއް ހޯމް މިނިސްޓްރީން އަދި ނުދެ އެވެ. އެކަމަކު ސަރުކާރުގެ ބައެއް ކުންފުނިތަކުން އެ ހަރަކާތަށް މިހާރު ތައްޔާރުވަމުން އަންނަ ކަން ވަނީ އެނގިފަ އެވެ.

ސްޓެލްކޯ އިން މިދިޔަ ބުރާސްފަތި ދުވަހު ވަނީ މިނިވަން ދުވަހަށް ތައްޔާރުކުރާ ފުޅަނދު ހެދުމަށް ބޭނުންވާ ދެ ސައުންޑް ޕްރޫފް ޖެނެރޭޓަރު ސަޕްލައިކޮށްދޭނެ ފަރާތެއް ހޯދުމަށް ދެވަނަ ފަހަރަށް އިއުލާންކޮށްފަ އެވެ.

މާލޭގައި އެންމެ ފަހުން ފުޅަނދުބުރެއް ބޭއްވީ ރާއްޖޭގެ 54 ވަނަ މިނިވަންދުވަހާ ދިމާކޮށް 2019 ގަ އެވެ. އެ އަހަރު ވެސް ފުޅަނދުބުރު ބޭއްވީ ތިން އަހަރުގެ މެދުކެނޑުމަކަށް ފަހުގަ އެވެ. އެ އަހަރުގެ ފުޅަނދުބުރުގައި ސަރުކާރުގެ ފަސް ކުންފުންޏަކުން ބައިވެރިވި އެވެ.

ތަފާތު ތީމުތަކަކަށް ފުޅަނދުތައް ހަދައި، މާލޭގެ ބޮޑެތި މަގުތަކުގައި ބާއްވާ އެ ހަރަކާތުގައި އެ އަހަރު ވަނީ ކުޑަކުދިންނާ ގުޅޭ ކާޓޫން ކެރެކްޓާތަކާއި ޖަޒީރާ އަދި ދިވެހިވަންތަކަށް ފެންނަ ފުޅަނދުތައް ދައްކާލައިފަ އެވެ. އެ ހަރަކާތް ބަލައިލުމަށް މާލޭގެ މަގުތަކަށް ގިނަ ބަޔަކު އެއްވި އެވެ.