އަނުޝްކާ އަދިވެސް އުޅެނީ ރާއްޖެ މިސް ވާތީ

މީގެ ހަފުތާއެއް ކުރިން ރާއްޖޭގައި ޗުއްޓީ ހޭދަކުރި ބޮލީވުޑްގެ ތަރި، އަނުޝްކާ ޝަރްމާ އަދިވެސް ވަރަށް ބޮޑަށް ރާއްޖެ "މިސްވާ" ކަމަށް ބުނެފި އެވެ.

އަނުޝްކާ އާއި އޭނާގެ ފިރިމީހާ، ކްރިކެޓް ތަރި ވިރާޓް ކޯލީ އެމީހުންގެ ދަރިފުޅު ވަމިކާއާ އެކު ރާއްޖޭގައި ހޭދަކުރީ އެންމެ ދެތިން ދުވަހެވެ. އެކަމަކު އެ ދަތުރަކީ އަނުޝްކާ އަށް އެންމެ "ބެސްޓް މެމޮރީސް" ކަމަށް އޭނާ ބުނެ އެވެ.

އަނުޝްކާ ކުރި އިންސްޓަގްރާމް ޕޯސްޓެއްގައި ވަނީ ރާއްޖޭގައި ހޭދަކުރި ޗުއްޓީގެ ބައެއް މަންޒަރުތައް ވެސް އާންމުކޮށްފަ އެވެ. ޗުއްޓީ ދަތުރު ނިންމާލި ގޮތަށް ފިލްމީ މަސައްކަތްތައް ވެސް ފަށާފައިވަނިކޮށް ކުރި އެ ޕޯސްޓުގައި ވަނީ ރާއްޖެ ވަރަށް ހަނދާންވާ ކަމަށް ވެސް ބުނެފަ އެވެ.

އަނަންދު އެލް ރާއީގެ "ޒީރޯ" އިން އެންމެ ފަހުން ފެނުނު އަނުޝްކާގެ ކުރިއަށް އޮތް ފިލްމަކީ "ޗަކްދާ އެކްސްޕްރެސް" އެވެ. އެއީ އިންޑިއާގެ އަންހެން ކްރިކެޓް ކުޅުންތެރިޔާ ޖުލަން ގޮސްވާމީގެ ހަޔާތަށް ނެރޭ ފިލްމެކެވެ. އެއީ ދަރިއަކު ލިބުނު ފަހުން އަނުޝްކާ ކުޅޭ ފުރަތަމަ ފިލްމެވެ.

އެ ފިލްމު ރިލީޒްކުރާނީ އަންނަ އަހަރު ނެޓްފްލިކްސް މެދުވެރިކޮށެވެ.