ފަރުވާ ހޯދަމުން ހީނާ އަރާމުކޮށްލަން ސިޔާމް ވޯލްޑަށް

އުރަމަތީގެ ކެންސަރަށް ފަރުވާ ހޯދަމުން އަންނަ، އިންޑިއާގެ މަޝްހޫރު އެކްޓްރެސް ހީނާ ހާން އަރާމުކޮށްލަން އިއްޔެ ރާއްޖެ އަތުވެއްޖެ އެވެ.

ހީނާ ޗުއްޓީ ހޭދަކުރަމުން އަންނަނީ ނ. އަތޮޅުގައި އޮންނަ ސިޔާމް ވޯލްޑް ރިސޯޓުގަ އެވެ.

މި ދަތުރުގެ ބައެއް ފޮޓޯތަކާއި ވީޑިއޯތައް ހީނާ އަންނަނީ އޭނާގެ އިންސްޓަގްރާމްގައި ހިއްސާކުރަމުންނެވެ. އެންމެ ފުރަތަމަ ހިއްސާކުރީ، އިއްޔެ ރާއްޖެ އައިސް ވެލާނާ އިންޓަނޭޝަނަލް އެއާޕޯޓުގައި ކާރެއްގައި އޭނާ މަޑުކޮށްގެން އިން ވަގުތުކޮޅުގައި ނެގި ފޮޓޯއެކެވެ.

ސީޕްލޭންގައި ސިޔާމް ވޯލްޑަށް ދަތުރުކުރުމުގެ ކުރިން އެއާޕޯޓް ލައުންޖުގައި ނަގާފައިވާ ސެލްފީއެއް ވެސް އޭނާ ހިއްސާކުރި އެވެ.

"ކައިސީ ލަގް ރަހީ ހޫން،" އެ ފޮޓޯގައި އޭނާ ލިޔެފައިވެ އެވެ.

ސިޔާމް ވޯލްޑަށް ދިއުމުން އޭނާއަށް ވެލްކަމް ޑްރިންކެއްގެ ގޮތުގައި ދިން ކުރުނބާ އާއި ރަށުގެ ތެރޭގައި ދަތުރުކުރަން އޭނާއަށް ހަމަޖައްސައިދިން ޕްރައިވެޓް ބަގީގެ ފޮޓޯއެއް ވެސް އިންސްޓަ ސްޓޯރީގައި ޕޯސްޓުކުރި އެވެ.

"ރާއްޖޭގެ އެންމެ ބޮޑު ރިސޯޓުގައި އަހަރެމެން ތިބީމަ، އަހަރެމެންނަށް ހާއްސަ ޕްރައިވެޓް ރައިޑެއް މިއީ. މިއީ ވަރަށް ރީތި އުޅަނދެއް ދޯ. ހިނގާ މީގައި ދަތުރުކޮށްލަން،" ހީނާ ބުންޏެވެ.

ހީނާ ވަނީ އިއްޔެ އިރުއޮއްސުނު މަންޒަރުގެ ބޫމަރޭންގެއް ވެސް ޝެއާކޮށްފަ އެވެ. އެ ގަޑީގައި އޭނާ އިނީ ރިސޯޓުގެ ބީޗުގަ އެވެ. އަދި ރޭގަނޑު ރާޅު ޖަހާ އަޑު އަހަން އިނދެ ޝެއާކުރި ވީޑިއޯއެއްގައި އޭނާ ބުނީ އެ އަޑުން ވަރަށް ހިތްހަމަޖެހުން ލިބޭ ކަމަށެވެ.

އުރަމަތީގެ ކެންސަރަށް ފަރުވާ ހޯދަމުން އަންނަ ކަމަށް ހީނާ ބުނީ މިދިޔަ ޖުލައި މަހު އެވެ. ބަލި ދެނެގަނެވުނު އިރު އޭނާ ހުރީ ކެންސަރުގެ ތިންވަނަ ސްޓޭޖުގަ އެވެ. އެ ބައްޔަށް ފަރުވާ ހޯދުމަށް މިދިޔަ މަހު އެކި ފަހަރު މަތިން އޭނާ ހޮސްޕިޓަލުގައި އެޑްމިޓުވި އެވެ.

ހީނާ ވަނީ މީގެ ކުރިން ވެސް އެކި ފަހަރު މަތިން ރާއްޖެ އައިސްފަ އެވެ.