މިސްކިތެއްގައި ގިނަ އަދަދެއްގެ ބިދޭސީން ދިރިއުޅެން ބައިތިއްބާފައިވާ ވީޑިއޯއެއް

ރާއްޖޭގެ ރަށެއްގެ މިސްކިތެއްގައި ބިދޭސީންތަކެއް ދިރިއުޅެން ބައިތިއްބާފައި ތިބޭ ވީޑިއޯއެއް އާންމުވެއްޖެ އެވެ.

މާލޭގެ މޭޔަރު ޑރ. މުހައްމަދު މުއިއްޒު ޓުވީޓް ކުރެއްވި އެ ވީޑިއޯ އިން އެއީ ކޮން ރަށެއްގެ މިސްކިތެއް ކަމެއް އަދި އެ ތަން ބޭނުންކުރުން ހުއްޓާލި ސަބަބެއް ނޭނގެ އެވެ. އެކަމާ ގުޅޭގޮތުން ފުލުހުންގެ ބަހެއް ވެސް އަދި ނުލިބެ އެވެ.

ވީޑިއޯއިން ފެންނަ ގޮތުން މިސްކިތުގެ ނަމާދު ކުރާ ބައިގައި ބިދޭސީން ގޮދަޑި އަޅައިގެން ނިދާފައި ތިބޭއިރު، މިސްކިތުގެ ފެންޑާ ތެރެ އާއި ގޯތި ތެރޭގައި ރޯނު ދަމައިގެން އަންނައުނު ހިއްކަން އަޅާފައި ހުއްޓެވެ. އަދި ތުވާލި އަނދެގެން ބައެއް ބިދޭސީން އުޅޭ މަންޒަރު ވެސް ފެނެ އެވެ.

އެ ވީޑިއޯގައި ވާހަކަ ދެއްކި ދިވެހި މީހާ ބުނިގޮތުގައި 200 ވަރަކަށް އިންޑިއާގެ ބިދޭސީން އެ ތަނުގައި ތިއްބެވެ. އެއީ އެ ރަށުގައި ނަރުދަމާގެ މަޝްރޫއުގެ މަސައްކަތަށް ގެނެސްފައި ތިބި ބައެއް ކަމަށް އެ މީހާ ބުންޏެވެ.