ބިއްލޫރި ޝީޓެއްް ދަށުވެ ބިދޭސީއަކު މަރުވެއްޖެ

ސަޕްލައި ދޯންޏަކުން ބާލަން އުޅުނު ބިއްލޫރިޝީޓްތަކެއް ދަށުވެ ބިދޭސީންތަކަކަށް އަނިޔާވެ އޭގެ ތެރެއިން އެކަކު މަރުވެއްޖެ އެވެ.

އުނގޫފާރު ރީޖަނަލް ހޮސްޕިޓަލުގެ ސީނިއާ ކަސްޓަމާ ރިލޭޝަން އޮފިސަރު، ހަސަން ފަޒީލް، "މިހާރު" އަށް ވިދާޅުވީ ނ. އަތޮޅުގައި ސިނާއީ މަސައްކަތްކުރަމުން އަންނަ މާކުރަންދޫގައި ހިނގި އެ ހާދިސާގައި ތިން މީހަކަށް އަނިޔާވެގެން އެ ހޮސްޕިޓަލަށް ގެންދިޔައީ މިއަދު މެންދުރު 1:30 ހާއިރު ކަމަށެވެ.

އޭގެ ތެރެއިން އެކަކު މިރޭ މަރުވެފައި ވަނީ ލިބުނު ބޮޑެތި ޒަހަމްތަކަށް ފަރުވާދެމުން ދެނިކޮށް ކަމަށް ފަޒީލް ވިދާޅުވި އެވެ. އަދި އިތުރު މީހެއްގެ ހާލު ސީރިއަސް ކަމަށާއި މިރޭ 8:30 ހާއިރު އޭނާ މާލެއަށް ފޮނުވާލާފައިވާ ކަމަށް ވެސް ފަޒީލް ވިދާޅުވި އެވެ.

އޭނާ ވިދާޅުވި ގޮތުގައި ތިން ވަނަ މީހާގެ ހާލު ސީރިއަސްއެއް ނޫނެވެ. އެ މީހާއަށް ފަރުވާ ދިނުމަށް ފަހު ހޮސްޕިޓަލުން ދޫކޮށްލާފައިވާ ކަމަށް ވިދާޅުވި އެވެ.

ސަޕްލައި ދޯންޏަކުން ބިއްލޫރި ޝީޓްތަކެއް ބާލަން އުޅުމުގެ ތެރޭގައި ބިދޭސީއަކު މަރުވިއިރު މީގެ ދެ ދުވަހެއް ކުރިން ވަނީ ހުޅުމާލޭގައި މާބަލް ޝީޓްތަކެއް ދަށުވެ ދެ ބިދޭސީން ވަނީ މަރުވެފަ އެވެ. އެކަކު އެ ހާދިސާ ހިނގުމާ އެކު މަރުވި އިރު އަނެކަކު މަރުވީ ފަރުވާދެމުން ދަނިކޮށެވެ.