އިސްދޫ-ކަލައިދޫގެ މައްސަލަ: ހައްލަކީ ބޯޑަރަކުން ދެ ރަށުގެ އިން ވަކިކުރުން!

އެއް ފަސްކޮށް އޮންނަ، ލ. އިސްދޫ-ކަލައިދޫގައި ދެ ކައުންސިލެއް އޮންނަ މައްސަލަ ހޫނުވެ، އިން ވަކިކޮށްގެން ވިޔަސް އެ މައްސަލަ ހައްލުކޮށްދޭން ތަކުރާރުކޮށް ސަރުކާރުގައި އެދިފައިވާ ކަމަށް އިސްދޫ ކައުންސިލުން މިއަދު ބުނެފި އެވެ.

ކައުންސިލްގެ ރައީސް އިބްރާހިމް ހަލީލް "މިހާރު" އަށް ވިދާޅުވީ ސަރުކާރުން އެއް ރަށެއްގައި ދެ ކައުންސިލް އުފެއްދުމުން، ދެ ރަށުގެ އިހުތިސާސްގައި ހިމެނޭ ސަަރަހައްދު ދައްކައި ކައުންސިލާ ހަވާލުކުރަން ޖެހޭ ކަމަށެވެ.

ހަލީލް ވިދާޅުވި ގޮތުގައި އިސްދުއަކީ ކޮބައި ކަމެއް، ކަލައިދުއަކީ ކޮބައި ކަމެއް މިހާރު އޮތް ގޮތަކުން ނޭނގެ އެވެ. އެހެންވެ، ކައުންސިލުން ރަށުތެރެ ސާފުކުރަން ކަހަލަ ކަންކަން އެ ރަަށެއްގެ ބަޔަކާ ހަވާލުކުރަމުން ދަނީ އެންމެ ކުރިއްސުރެ ވެސް އެގޮތަކަށް އަމަލުކުރާތީ ކަމަށް އޭނާ ވިދާޅުވި އެވެ.

މި ފަހުން މައްސަލަ ފެންމަތިވީ އިސްދޫގެ އަންހެންވެރިން، އެ ރަށުގެ އިޖުތިމާއީ ސަރަހައްދު ސާފުކުރަމުންދަނިކޮށް ކަލައިދޫ ކައުންސިލުން އެކަން ހުއްޓުވުމުންނެވެ.

ކަލައިދޫ ކައުންސިލުން ބުނާ ގޮތުގައި އެއީ ކައުންސިލްގެ ސަރަހައްދެކެވެ.

"އަޅުގަނޑުމެން ކައުންސިލުން ހަވާލުކޮށްފައި އޮންނާނީ އިޖުތިމާއީ ސަރަހައްދު ސާފުކުރުން ބަޔަކާ. އެއީ އެންމެ ކުރިއްސުރެ ވެސް އިސްދޫގެ ބައެއްގެ ގޮތުގައި ސާފުކުރަމުންދިޔަ ތަނެއް. އެ ސަރަހައްދުގެ ބިން ބޭނުންކުރުމުގެ ހުއްދަ ސަރުކާރުން ދީފައި ހުރި ލިޔުންތައް ވެސް އަޅުގަނޑުމެންގެ އަތުގައި އެބަހުރި،" ހަލީލް ވިދާޅުވި އެވެ.

ރަށުގައި ދެ ކައުންސިލެއް އޮންނަ މައްސަލަ އަށް ހައްލެއް ހޯދައިދޭން ތަކުރާރުކޮށް ކަމާ ބެހޭ އިދާރާތަކުގައި އެދިފައިވާ ކަމަށް އޭނާ ވިދާޅުވި އެވެ.

ހަލީލް ވިދާޅުވީ، ރަށުގެ ތަރައްގީ އަށް ބަލާއިރު އިސްދޫ ކައުންސިލުން ދެކެނީ އެންމެ ރަނގަަޅު ގޮތަކީ އެއް ކައުންސިލް އޮތުން ކަމަށެވެ. އެކަމަކު ބޯޑަރަކުން ދެ ރަށުގެ އިން ވަކި ކުރަން ވެސް ބައެއް މީހުން ތާއީދެވެ.

"ދެން ބޭނުމިއްޔާ ފެންނަ ނުފެންނަ ވޯޓަކަށް ގޮސްގެން ވެސް ގޮތް ނިންމިދާނެތާ. ދައުލަތުން އެބަޖެހޭ މި މައްސަލައިގައި ކޮންމެވެސް ގޮތެއް ނިންމައިދޭން،" އޭނާ ވިދާޅުވި އެވެ.

އިސްދުއަކީ 1،400 މީހުންގެ އާބާދީއެއް އޮންނަ ރަށެކެވެ. ކަލައިދޫގައި ހާހެއްހާ މީހުން އުޅެމުން އަންނައިރު އެއީ ދެ ރަށެއްގެ ގޮތުގައި ނިންމައި ދެ ކައުންސިލް އިންތިހާބުކުރީ 2014 ގައި ކަމަށް ވެ އެވެ. އޭގެ ކުރިން ދެ ރަށުގައި ދެ އޮފީސް ހިންގިޔަސް އޮންނަނީ އެންމެ ކައުންސިލެކެވެ.

ހަލީލް ވިދާޅުވި ގޮތުގައި އޭރު ދެ ރަށުގައި އެ ކަހަލަ މައްސަލަތަކެއް ވެސް ނުޖެހެ އެވެ. އެކަމަކު، މިހާރު އޮތްގޮތުން ކައުންސިލަށް ދަނޑު ބިންތަކުން ވެސް މަންފާ ނުވާ ކަމަށާއި ބިން ކުއްޔަށް ނުދެވޭ ކަމަށް އޭނާ ވިދާޅުވި އެވެ. އެންމެ ބޮޑު ކަންބޮޑުވުމެއްގެ ގޮތުގައި ވިދާޅުވީ އިހްތިސާސް ނޭނގޭތީ ލޭންޑް ޔޫސް ޕްލޭން ނުހެދޭ މައްސަލަ އެވެ.

އިސްދޫން އުޅެނީ ވަކި ތަނެއް ނުލިބިގެން: ކަލައިދޫ

ކަލައިދޫ ކައުންސިލްގެ ރައީސް އަހުމަދު ޝިޔާމް ވިދާޅުވީ، މައްސަލަ ބޮޑުުވީ ކަލައިދޫގެ ސަރަހައްދެއް އިސްދޫ މީހުން ކުނި ކަހައި ސާފުކުރާތީ ކަމަށެވެ.

އޭނާ ވިދާޅުވި ގޮތުގައި ރައީސް އޮފީހުން ގެޒެޓްކޮށްފައިވާ، އެ ރަށުގެ އިހްތިސާސް ހިނގައި ސަރަހައްދުގައި އެ ތަން ވެސް ހިމެނެ އެވެ. އެކަމަކު އިސްދޫ ކައުންސިލުން އެ ސަރަަހައްދު ސާފުކުރާތާ އަހަރެއްހާ ދުވަސްވެފައިވާ ކަމަށާއި އެ ކަން ކަމާ ބެހޭ އިދާރާތަކަށް އަންގައިގެން ވެސް ނުހުއްޓުވި ކަމަށް ވިދާޅުވި އެވެ.

"ގަވާއިދާ ހިލާފަށް ކަލައިދޫގެ ބައެއްް ސާފުކުރަނީ. ފުލުހުންނާއި ކަމާ ބެހޭ އިދާރާތަކަށް އަންގައިގެން ވެސް ނުހުއްޓީމާ އަޅުގަނޑުމެން ހުކުރު ދުވަހު ހުއްޓުވީ،" އޭނާ ވިދާޅުވި އެވެ.

ޝިޔާމް ވިދާޅުވީ، އިސްދޫ ކައުންސިލުން އުޅެނީ ކަލައިދޫގެ އިހްތިސާސް ހިމެނޭ ތަންތަން ވެސް އެ މީހުންގެ ބަޔަކަށް ހަދައިގެން ކަމަށެވެ. އެއީ އިސްދޫގެ ބިން ކުޑަވާތީ ކުރާކަމެއް ކަމަށް އޭނާ ތުހުމަތުކުރެއްވި އެވެ.

ޝިޔާމް ވިދާޅުވި ގޮތުގައި މީގެ 10 ވަރަކަށް ދުވަސް ކުރިން ޕްލޭނިން މިނިސްޓްރީގެ ލޭންޑް ސާވޭ އޮތޯރިޓީން ވަނީ ވަކިވަކިން ދެ ކައުންސިލާ ބައްދަލުކޮށް ހިޔާލު ހޯދައިފަ އެވެ. އަދި ވަރަށް އަވަހަށް ބޯޑަރު ލައިން ފާހަގަކޮށްދޭނެ ކަމަށް ވެސް އެ އޮތޯރިޓީން ބުނެފައިވަނިކޮށް އިސްދޫ ކައުންސިލުން މުޒާހަރާކުރުމަކީ ސިޔާސީ ސްޓަންޓެއް ކަމަށް އޭނާ ވިދާޅުވި އެވެ.

"ވަރަށް އަވަހަށް ބޯޑާލައިން ފާހަގަކޮށްދޭނެ ކަމަށް ބުނެފައި އޮއްވައި އިސްދޫ ކައުންސިލުން ރައްޔިތުން އެއްކޮށް މުޒާހަރާކުރަނީ ސިޔާސީ ސްޓަންޓެއް ޖެއްސުމަށް. އެ މީހުންނަށް ލިބޭ ބިން ކުޑަވާތީ އަޅުގަނޑުމެންގެ ބިމުން ބައެއް ހޯދަން ކުރާ ކަމެއް މިއީ،" ޝިޔާމް ވިދާޅުވި އެވެ.

ކަލައިދޫ ކައުންސިލުން ގަބޫލުކުރާ ގޮތުގައި އެ މައްސަލައަށް އޮތް ހައްލަކީ ވީ އެންމެ އަވަހަކަށް އިން ވަކިކުރުމެވެ.